Dezembro

N’nga Yohova utokaana thitho kopolo dhooda venyathi-a atu okwa? Ee! Liye ngwa “kopolo dhothene.” (Apk. 1:8) Ee-no liye utokaana kopolo dhooda gonji-a mwidani uliothene thangani-avo wukwa. (1 Ak. 15:26) Mwasa unango unaniiri-e roromela ira Nlungu unodha venyathi-a atu okwa ngoi, unothuulela vyongo kwaranya mutu uliothene. Liye unoromola dhina la nyenyedi iliyothene. (Esa. 40:26) Unothuulela thitho atu enao takwide. (Yob. 14:13; Luk. 20:38) Liye unothuulela vyongo ving’ono ving’ono vyoonga atu anofuna dhavenyathi-iwa thangani-avo makalelwiwa na maoneelwiwa, vyevyo vyaireile vaingumiwa thitho vyevyo vyaidhiwa atu. Pyovweya roromela yolanyedha ya Yohova yoonga ira unodha venyathi-a atu okwa, neri-a nitoidhiwa ira unofunechecha thitho utokaana kopolo dhokwakwaneli-edha yolanyedhai. Kathuulelani mwasa unango unoniiri-a roromela yolanyedha ya Nlungu yoi atu okwa anodha venyathi. Yohova atooviirana vyevi ndulimu. Ndulimu atova-a alombwana angasi ororomeleya thangani-avo Yesu, kopolo dhooda venyathi-a atu okwa. w23.04 9-10 ¶7-9

Nawandelanga atu enango vyevyo vinororomela i-yo mwadodoliso na mopwaseya, atu anooda vuruwana thitho ninodha dhowanave tapanya naaliwa. Pyaimbarimbari ira mutu afuna ira aniruni-e venango nyoza vinororomela i-yo, kaninofwanela dhowanave tapanya na liye. (San. 26:4) Mbwenye kai atu othene anoirana vyevi, atu anjinji anooda vuruwana. Onga imbarimbari, ninoganyali maningi nadhilimbi-edha ira nikale opwaseya. Mum’vepenga Yohova ira auva-eni kopolo dhinofuneela nyo ira mudhowenave kala opwaseya mwawakulanga vyofuka vyorucha venango atu enango tauruni-angani. Thuulelani ira kala opwaseya unodha ukami-a ira i-yana mathuulelo va mwasa unangwee wa-afiye vorucha fiyedha kangana. Wakula mopwaseya thitho mwalemezo unodha iri-a ira atu tachinje mwemo munonionela aliwa thitho munoonela aliwa makundo a Bibilyani. Dhoweni “nikalenganive okozeya hora dhothene” m’rumela mutu uliwethene unofuna idhiwa vinororomela i-yo thitho niirengana vyevyo na “rima opwaseya na mwalemezo maningi.” (1 Pe. 3:15) Pwaseya kunothapulela kala ofooka! w23.09 19 ¶18-19

Kathuulelani ndhila dhokwakwana dhinaidhi dhedho dhinaniiri-e kala atu oleva rima. Yoroma, mutu oleva rima kanothakaleliwa mombaranya. Liye unodhilimbi-edha kala okurudheya akala osukwala thitho kanoweli-edha atu enango tamsukwali-a. (Eki. 34:6) Yanambili, mutu oleva rima unodedi-edhela mopwaseya. Akala ira vyongo vinaadimbela kwaranya mwemo mwadedi-edhela liye, mutu oleva rima unorambela nyanyuwa. (Mat. 18:26, 27) Yaneraru, mutu oleva rima kanoira vyongo motamanga rima. Mutu oleva rima afunanga irana vyongo vinango vyofuneya, kanotamangela viirana venango irana vyongovyo mombaranya. Malomwee unokaana hora yokwakwanela yokozeela vyongo vinofuna liye iravyo. Vasogolovee unoira vyongo movwelana na hora yofuneya vabasanivo. Yanenai, mutu oleva rima unovilela vyowesedha mo-odungunya. Liye unoira vyothene vinaode liye ira adhowenave vilela noonanga vyapama vinoireyavyo. (Ako. 1:11) Ee-no ninga Makristau, ninofwanela kala oleva rima muvikundu vyothene vaingumii-u. w23.08 20-21 ¶3-6

Yongo ilukulu yoniiri-a vunela rimi-u choi Yohova unosakasaka rimi-u. Vyevi vinothapulela ira kanoniona ninga mwemo munooneela i-yo waatu enango mbwenye unoona vili rimanimwi-u. Liye unodha dhowanave nidhiveliwana akala ninothuulela zeludhee dhedho dhinanikami-e ira nikaena ingumi yodhowa nodhowa. (Ju. 4:14) Naira e-no kaninodha dhodhomi-iwa navang’onovene na makalelo enao Satana na ilambo yothakalila, anolimbi-a aliwa. (1 Ju. 5:18, 19) Vevo vanodhilimbi-edha i-yo kala vauxamwali olimba na Yohova, ninoroma mdhiveliwana thitho mlemeza maningi. Namwasa oi kaninofuna msukwali-a Babi-u ninoidanana makalelo oirana vyongo vyothakala. Rongola unango wau Croacia dhinalee Marta, wenuo awesedhiwile ira airena makalelo othakala atoolemba ira: “Ndanoona ira vyanoondirucha kaana mathuulelo ofwanelela thitho limbanana rima olavela irana vyongo vyothakala vyevyo vyafuna miyo sangalalana vahora yoyeva baa-i. Mbwenye m’mova Yohova watoondivunela.” N’nga m’mova Nlungu wamkami-idhe a-vi Marta? Liye atoothuulela vyongo vyafuna ireya aakale ira atoosakula irana vyongo vyodaweya. I-yo thitho ninooda irana vyongo vimbo-ive. w23.06 20-21 ¶3-4

Yesu anoidhiwa ira ifunelo ya Yohova kucheni-a dhinalee thitho runi-a vyonama vyothene vyevyo vyaongiwa vyokuza liye. Ngumwasiwa Mbwii-u atoofunji-a anama-arelee ira talobelenga ira: “Babi-u wadhulu dhina linyu licheni-iwe.” (Mat. 6:9) Yesu anoovwechecha ira cheni-iwa wa dhina la Nlungu, ngumwasa nlukulu okuza vyopanduchiwa vyothene. Kavali uliwethene, dhulu na vailambo yavathi, wenuo unocheni-a maningi dhina la Yohova kwaranya Yesu. N’nga vahora yamangiwa Yesu, amwidanee tam’momba landu wan’ni? Taonga ira unonyoza Nlungu. Mo-okaikela Yesu atoidhiwa ira nyoza dhina lochena la Babee chodawa ilukulu maningi. Voi e-no atoosukwala maningi voona ira amwidanee anom’momba landu wen’na. Pyooneelatu ira vyevi ndi vyevyo vyam’muiri-idhe Yesu ira “arucheyenga maningi rimanimwee” unga-adhi malambo oyeva ira a-indiwe na amwidanee.—Luk. 22:41-44. w24.02 11 ¶11

Vapikisano wi-u odhowa mawachela ingumi, ninofwanela mdhiveliwana maningi Yohova na Yesu kwaranya mwemo munodhiveliwana i-yo abali-u. (Mat. 10:37) Mbwenye vyevi kavinothapulela ira ninofwanela pwaza vizo vi-u vya banjani kalanga ninga pivizo vyevyo vinaniiri-e ira na-aodenga msangalali-a Nlungu na Kristu. Malomwee ira nikale orumeleya wa Nlungu na Kristu ninofwanela kwakwaneli-edha vizo vi-u vya banjani. (1 Ti. 5:4, 8) Nairangana vyevi, ninodha kala osangalala. Thitho Yohova atoosaka-edha vyoi banja likalenga losangalala, akala lombwana na i-yanee tanodhivelana thitho lemezana, anamabala taadhiveliwengana thitho afunji-a a-imiwa thitho a-ima tavwelenga anamabaliwa. (Aef. 5:33; 6:1, 4. Mo-obala izo inanyo banjani, mu-indi-edhenga basa zelu dhofwanyeya Bibilyani malo moiranga vyongo movwelana na mwemo munoonelanyo vyongo, ikalelwinyu venango atu oidhiwa vyongo vinoonga aliwa.) Thitho mu-indi-edhenga basa mabukhwi-u. Mabukhwala anoonga vyevyo vinairenyo vo-arela makundo a Bibilyani. w23.08 28 ¶6-7

I-yana wa Ikristau unofuneela funjedha madodoliso o-iyana-iyana. Madodoliso enao Kristau wasikana anofunjedha liye angali mwana, anom’kami-a vaingumiyee yothene. Mufunjedhenga leri nolemba phama. Muvikhalelo vinango atu anoonga ira i-yana kanofwanela funjedha leri nolemba phama. Mbwenye dodoliso leli tofuneya maningi wa Kristau uliwethene. (1 Ti. 4:13) Ee-no kamurumeli-e ira yongo iliyothene iuwimwanani-eni idhiwa leri nolemba phama. N’nga dodoliso leli linaukami-eni a-vi? Dodolisoli linooda ukhami-ani ira mulembiwe basa nofwanyanga kobiri. Linodha ukami-ani thitho ira mufunjedhenga madhu a Nlungu noafunji-anga atu enango. Kwaranya vyongo vyothene vyevi, dodolisoli linodha ukami-ani khala vauxamwali olimba maningi na Yohova namwasa oi munongo leri madhwee noathuulelanga modi-a.—1 Ti. 4:15. w23.12 20 ¶10-11

Mvepa Yohova ira anikami-e limbanana vyowesedha. Voi kanili atu olongomana, hora dhinjinji ninolimbanana rima ofuna ira vyongo vyothakala. Satana unodhilimbi-edha irana vyongo vilivyothene vinaode liye voniiri-a ira nirucheyenga irana vyongo vyofwanelela. Ndhila imbo-i inoirela liye vyevi kudodomi-a mathuulelwi-u vo-indi-edha basa vyosangalali-a vyothakala. Moi e-no ninoroma thuulela vyongo vyothakala vinaniiri-e ira na-akale olongoma vamethoni va Yohova thitho niire yodawa ilukulu. (Mrk. 7:21-23; Yak. 1:14, 15) Ninofwanela kami-iwa na Yohova ira niode limbanana mathuulelo ofuna irana vyongo vyothakala. Mulobelolee laifwananafwani-o, Yesu atoongamo makundo oi: “Kamunivoloche muvyowesedha mbwenye muniombole mandhani mwaothakaluo.” (Mat. 6:13) Yohova unofuna nikami-a, mbwenye ninofwanela mvepa ira anikami-e. Thitho ninofwanelela irangana vyongo movwelana na malobelwi-u. w23.05 6-7 ¶15-17

Atu othelana anoona ira uxamwaliwa na Babiwa wadhulu ngofuneya maningi, anokala okozeya a-rela malangi-oe, vyevi vinoakami-a rambela thitho limbanana nyarwa dhedho dhinairi-e ira udhiveliwa uyeve. Atu ali vauxamwali olimba na Yohova anodhilimbi-edha a-rela thitho anokaana makalelo ninga oriya rima, leva rima thitho olevelela. (Aef. 4:32–5:1) Atu othelana anothonyi-edha makalelo enala, kavinoarucha ira tadhivelanengana maningi. Rongola unango dhinalee Lena, uli banjani wa vyawa vyokwaranya 25, aongile ira: “Vinokala vyo-orucha mdhiveliwana thitho mlemeza mutu unomdhiveliwana Yohova.” Kathuulelani ifwanafwani-o ya Bibilyani. Vaatu anjinji a banja la Davide, Yohova amsakunle Yosefe na Mariya ira takale anamabala a Mesiya. Mwasiwa ngwan’ni? Namwasa oi ambinlene enala tali vauxamwali olimba na Yohova thitho liye atoidhiwa ira anodha kaana banja lapama maningi namwasa omdhiveliwana. w23.05 21 ¶3-4

Yohova unoniwandela ira “nivwelenga enao anosogolela” pingo. Angalive ira Namasogoleli-u Yesu ngolongomana, atu anoa-indi-edha liye basa ira tanisogolelenga, kai olongomana. Ee-no vinooda niruchanga avwela simbwasimbwa akala atoniwandela irana vyongo vya-anofuna i-yo. Vahora inango, rumiwi Pedru kaafuna vwela malangi-o ava-iwile liye. Ngelo angam’mwandele ira adye nyama yothakali-iwa movwelana na ilamulo ya Mose, liye atookonda, a-kala fendo umbo-i baa-i mbwenye fendo uraru! (May. 10:9-16) Mwasiwa ngwan’ni atookonda? Namwasa oi aona ira malangi-o mapyao tali o-ovweya phama. Rumiwi Paulo atovwela andimuwa awu Yerusalemu tangamva-idhe malangi-o ira adhowe kachisini naalombwana 4 thitho amadhicheni-e vothonyi-edha ira uno-arela ilamulo. Paulo atoidhiwa ira Makristau katino-arela ilamulo thitho kaadawi-idhe yongo iliyothene. Mbwenye hora imbo-ive yeniyo liye atoorumela vyevyo vyam’mwandele aliwa. Voi e-no Paulo “atootukulana naalombwanao dambo lo-arela nodhowa maira mwambo odhicheni-a vambo-i naaliwa.” (May. 21:23, 24, 26) Vyaireilevyo vyatookami-a ira vakale vwelano.—Aro. 14:19, 21. w23.10 10 ¶15-16

Mo-okaikela, munooda onga ira axamwali aimbarimbari anofwanela dhivelangana thitho kami-ana. Pyoodeya ira kamunathuulelevo ira ova tikalelo lofuneya ira atu takale vauxamwali wapama. Atu anofuna kala vauxamwali olimba na Yohova anofwanela “m’mova.”Akala ninomlabela Yohova wa hora indendai moi a-vi, i-yo othene ninofwanela dhowanave m’mova maningi. N’nga m’mova Nlungu unothapulelan’ni? Mutu unom’mova Nlungu mofwanelela unomdhiveliwana thitho kanofuna irana yongo iliyothene yeniyo inadodomi-e uxamwalee na liye. “Yesu anom’mova Nlungu” mwandhila yen’na. (Aeb. 5:7) Liye kaam’mova Yohova ninga mutu unango oopi-a. (Esa. 11:2, 3) Malomwee, anomdhiveliwana maningi thitho anofuna mvwela. (Ju. 14:21, 31) Moladana na Yesu, i-yo thitho ninomlemeza maningi Yohova namwasa oi ngwaudhivela, wazelu, walongomano thitho wakopolo. Ninoidhiwa thitho ira Yohova unonidhiveliwana thitho unokuziwa na vyevyo vinoira i-yo aniva-a malangi-o. Ninooda m’mwiri-a ira avwenga upa rimanimwee venango sangalali-a rimee.—Sal. 78:41;San. 27:11. w23.06 14 ¶1-2; 15 ¶5

Mwene Uziya angana kopolo atodiwala ira Yohova ngwava-idhe kopolodho thitho m’kami-a ira vyongo vimwendelenga phama. N’nga ninofunjedhavon’ni? Nithuulelenga ira Yohova ngunoniva-a vyaphama vyothene vyevyo vinosangalalana i-yo va ingumii-u thitho vom’labela. Malo modhigweli-a namwasa wa vyevyo viodile i-yo irana, nivelelenga titimi-o lothene wa Yohova. . (1 Ak. 4:7) Ninofwanela kala atu odhiyevi-a nozindiyelanga ira kanili olongomana thitho ninofuneela langi-iwa. Bali mwinango wenuo una vyawa 60 alembile ira: “Nditofunjedha ira kandinyanyuwenga venango thakaleliwa mombaranya atu enango tandiwandela ira nditodawi-a yongo inango. Atu enango tandiva-a malangi-o namwasa oi nditoira vyongo mo-othuulela phama, ndinodhilimbi-edha chinja ira vyongo vyevyo vinaode miyo vom’labela Yohova.” Pyaimbarimbari ira nam’movanga Yohova nodhowanganave kala odhiyevi-a, vyongo vinoniwendela phama vaingumii-u.—San. 22:4. w23.09 10 ¶10-11

Makristau awale tanofuneela vilela. Wenjedhela va nyarwa dha dambo na dambo dhedho atu othene dhagumanana aliwa, thitho aliwa tanogumanana vyowesedha. Anjinji mwa Makristauala tanooni-iwa nyarwa, a-kala na anamasogolela Aiyuda venango anamatonga Airoma baa-i, mbwenye tanooni-iwa nyarwa na abaliwa aututuni. (Mat. 10:21) Mbwenye thitho hora dhinango tanofuneela limbanana mafunji-edho opanduwa enao tafuna mwadhani-a pingo. (May. 20:29, 30) Mbwenye Makristauala tatoovilela. (Apk. 2:3) N’nga chini yaakami-idhe? Aliwa tathuulela vifwanafwani-o vyofwanyeya malembani vya atu enao tavilenle, ninga Yobo. (Yak. 5:10, 11) Tanomvepa Yohova ira aava-e kopolo. (May. 4:29-31) Mbwenye thitho tanothuulela vyo-arelavo vyapama vyevyo vyafwanya aliwa namwasa ovilela. (May. 5:41) I-yo thitho ninooda vilela akala ira hora dhothene ninofunjedha nothuulela vifwanafwani-o vyoongiwa mumadhu a Nlungu thitho mumabukhwi-u vya atu enao tavilenle. w23.07 3 ¶5-6

Yohova na Yesu anonisikimizeli-a ira katinodha ni-iyachi navang’onovene. Angamkondile Yesu Pedru anofwanela sakula vyoira va mwasa ofuneya. Anofwanela sakula vari vo-iyachi arela Yesu nodhowanave kala namafunjedhee. Yesu ali angamlobelele Pedru ira iroromelwee ya-afooke. Yesu atom’mwandela Pedru ira atom’lobelela thitho atothonyi-edha ira kaakaikela ira unodha alimbi-a abalee. (Luk. 22:31, 32) Pedru anolimbi-iwa athuulela vyevyo Yesu vyam’mwandele liyevi. I-yo thitho nafunanga sakula vyongo va mwasa ofuneya Yohova unooda i-ndi-edha basa anamakumbiza audhivela ira tanisikimizeli-e ira ninooda kalave ororomeleya wa Yohova. (Aef. 4:8, 11) Yohova atomkami-a Pedru na arumiwi afwee fwanya vyofuneya vyava ingumi. I-yo thitho na-elanga urumiwi valimburo loroma vaingumi-u liye unodha nikami-a fwanya vyongo vinofuneela i-yo. w23.09 24-25 ¶14-15

Yohova unoidhiwa masiki vikale vyongo ving’ono ving’ono vyevyo viirile i-yo voriela rima atu enango. Liye unoona ira vyevi ndi sembe yapereso yavadhulu thitho mangawa anofuna liye dhaweli-edhaKala mwatolamba ninga rumiwi okami-a venango dimuwa, Yohova unothuulela vyevyo vyaira nyo vomlambela thitho mwanoira vyevyo namwasa waudhivela. (1 Ak. 15:58) Liye unoona udhivela wenuo unodhowanave nyo thonyi-edha atu enango. Yohova unofuna ira nimdhiveliwengana maningi thitho dhiveliwena atu enango. I-yo, ninooda mdhiveliwana maningi Yohova akala ninoleri nothuulela madhwee nolobelanga wa liye hora dothene. Ninooda adhiveliwana maningi abali naarongoli-u voakami-a mundhila dho-iyana-iyana. Vevo udhiveli-u vanodhowanave aliwa ulukula, ninodha kala vauxamwali wapama na Yohova na banja li-u lauzimu. Thitho ninodha sangalala na vyevi modhowa nodhowa! w23.07 10 ¶11; 11 ¶13; 13 ¶18

Kristau uliwethene unofwanela sakula ekene vyoira vamwasa osamalela manungwee. Mbwenye vamwasula, Bibilyani muli malamulo oyeva aimbarimbari, ninga lamulo lokuza rambela sangiri na vyamizimu, thitho vyevi vinokuza pedhelo lamirombwe lelo Makristau linasakule aliwa wachela. (May. 15:20; Agl. 5:19, 20) Mbwenye vamyasa inango mutu unosakula ekene. Akala ninoona ira ndhila inangwee yosamalela manungwi-u njapama maningi, ninofwanela lemeza ufulu wa abali naarongoli-u vosakula ndhila inoona aliwa ira njapama maningi waaliwa. Va mwasa wen’na, hora dhothene ninofwanela thuulelanga makundo o-arelala: (1) Umwene wa Nlungu baa-i ngunofuna dha mali-a marenda othene. (Esa. 33:24) (2) Kristau uliwethene unofwanela kala “osikimizela rimee othene” vavyevyo vinofuna dham’kami-a maningi. (Aro. 14:5) (3) Kaninofwanela tonga atu enango venango asukwali-a. (Aro. 14:13) (4) Makristau tanothonyi-edha udhivela thitho tanoona ira kala ovwelana pingoni kofuneya maningi kwaranya ufulwiwa osakula vyoira.—Aro. 14:15, 19, 20. w23.07 24 ¶15

N’ngamunom’dhiveliwana maningi Yohova? Pyo-oira fuka. Thitho idhiwanai ira kai nyo mwekene unom’dhiveliwana Yohova. Romela walelene atu o-olengeseya takadhi tam’dhiveliwangana ninga munoirela nyo. (Sal. 104:33, 34) Atu anjinji anovimana muvyongo vinangovyee ira tam’labelenga Yohova. Vyevi ndi vyevyo thitho Aisraeli enao taitaniwa Anaziri venango ovivelela mwairela aliwa. Madhu enala anoonga vya Aisraeli athindhi enao tavimana vyongo vinango naifunelo yoi tam’labelenga Yohova mundhila yavakundu. Ilamulo yava-iwile Mose na Nlungu, yanoorumeli-a ira lombwana venango i-yana aire yolanyedha yavakundu wa Yohova vosakula kala Naziri wa hora inangoyee. (Num. 6:1, 2) Mutu airana yolanyedhiyo anofwanela a-rela malamulo enango mo-iyana na Aisraeli afwee. N’nga chini yairi-a ira Muisraeli aire yolanyedha yei? Vinooneya ira tanoirana yolanyedha yen’na namwasa oi tanom’dhiveliwana maningi Yohova thitho simba maraeli-o ava-iwa aliwa.—Dot. 6:5; 16:17. w24.02 14 ¶1-2

Bibilyani madhu Aieberi athapuleliwile ira “roromeleya,” venango “udhivela ororomeleya,” Hora dhinjinji ano-indi-edha basa vofuna onga udhivela una Nlungu wa arumiwee. Madhwala ano-indi-edheliwa thitho basa vofuna onga udhivela ulivo vari vaarumiwi a Nlungu. (2 Sa. 9:6, 7) Roromeleya wi-u unowenjedheleya vira wa hora. Likundo leli taimbarimbari nathuulela vyaireile vaingumi ya Danieli.Vaingumiyee yothene Danieli anoowesedhiwa vamwasa okala ororomeleya wa Yohova. Mbwenye vinango mwavyowesedha vilukulu agumanena angana vyawa 90. Atu enao talaba va nyumbani ya mwene katam’dhiveliwana Danieli thitho katam’lemeza Nlungu wam’lambela liye, e-no tatoira masaka-edho oi Danieli aphiwe. Aliwa tatokaathei-a malamulo enao tairi-e ira Danieli asakule kalave ororomeleya wa Nlungu venango wa mwene. Ira athonyi-edhe ira ali ororomeleya wa mwene , Danieli afuneela i-yachi lobela wa Yohova wa malambo 30. Mbwenye atosakula ira akaleve ororomeleya wa Yohova. —Dan. 6:12-15, 20-22. w23.08 5 ¶10-12

Yohova unofuna ira kani-iye thonyi-edha udhivela abali naarongoli-u. Akala kristau mwinango utoimwanana thonyi-edha makalelo aphama, nionenga ira unofuna a-rela makundo a Bibilyani thitho uirile vyongo mo-othuulela phama. (San. 12:18) Nlungu unodhiveliwana arumiwee ororomeleya angalive ira anodawi-a vyongo vinango. Kano-iya nidhiveliwana nadawi-a vyongo vinangovyee thitho kanonilokotedha vya rimani. (Sal. 103:9) Ee-no ninofwanela m’sazi-edhanga Babi-u wenuo unolevelela! (Aef. 4:32–5:1) Nithuulelenga ira vevo komoni vanowandamela aliwa, ninofwanela vwelananga naabali naarongoli-u. Nidedi-edhelenga ira i-yo Makristau, ninooda oni-iwa nyarwa maningi venango mangiwa namwasa wa vyongo vinororomela i-yo. Akala vyevyo vitoniireela, ninooda funafuna maningi ira abali naarongoli-u tanikami-e.—San. 17:17. w24.03 15-16 ¶6-7

Bibilyani mutokala myasa ya azombwe enao tali vauxamwali na Yohova. Liye anowadhiveliwana thitho vyatoawendela phama vaingumiiwa. Davide ali mbo-i mwa azombwala. Liye atosakula lambela Nlungu angali zombwe thitho vasogolovee atokala mwene ororomeleya (1 Ma. 3:6; 9:4, 5; 14:8) Mwa funjedhanga vya Davide, ifwanafwani-oyee inooda ulimbi-ani ira mulabelenga Yohova mororomeleya. Munooda thitho ira masaka-edho oi mufunjedhe vinjinji vyokuza Marku venango Timoteo. Munooda ona ira aliwa taromile mlabela Yohova tangali azombwe thitho tatodhowanave m’sangalali-a Nlungu Vinoira nyo va e-ni ndi vyevyo vinodha uwiri-ani ira vyongo vidha uwendeleni phama venango kabe. Mwam’nyindelanga Yohova akala nyindelanga dodoliso linyu lovwechecha vyongo, liye unodha ukami-ani ira musakulenga vyongo mwazelu. Mwaira e-no, munodha kala osangalala thitho ingumi inyu inodha kala yaphama. Muthuulelenga ira Yohova unosimba vyevyo vinoira nyo vom’labela. Kavali thitho ndhila inango yaphama yo-indi-edha basa ingumi inyu yeniyo inakwaranye mlabela babi-u waudhivela Yohova. w23.09 13 ¶18-19

Rumiwi Paulo anooidhiwa ira abali naarongolee kai olongomana. Mofwanafwani-a, abali enango tatom’tonga modaweya angaromile vwelana na pingo. (May. 9:26) Vasongolovee abali enango tanom’mongela mafyeda vofuna nonga limbililee. (2 Ak. 10:10) Paulo atom’mona bali mwinango wa izo airangana vyodaweya vyevyo vyasukwali-e abali enango. (Agl. 2:11, 12) Fwee mwinango dhinalee Marku atom’sukwali-a maningi. (May. 15:37, 38) Paulo angaodile sakula ira a-avwelanenga naabali enao tam’sukwali-idhe. Mbwenye liye atoodhowanave ona vyongo vyapama mwaabali naarongolee thitho anom’lambela Yohova mwathindhi. N’nga chini yam’kami-idhe Paulo dhowanave m’lambela Yohova? Paulo anoodhiveliwana abali naarongolee. Dhiveliwana atu enango watom’kami-a Paulo ira athuulelenga makalelwiwa apama a-kala vyongo vyadawi-a aliwa. Udhivela watom’kami-a Paulo ira airengana vyongo vyevyo viongiwile mulemba la penene. w24.03 15 ¶4-5

Bibilyani mutokala myasa injinji yothonyi-edha funeya okala opwaseya. Ifwanafwani-o va mwasula ndi Izaki. Vahora yakala liye wutatamu n’nango lau Gerar, atu abivu tatoovu-elela visime vya babee vyevyo anamalabee vya-umbile aliwa. Malo mowana naaliwa ira taawaki-e visimevyo, Izaki na banjalee tatoothamela undendai thitho tatoo-umba visime vinango wewo. (Mar. 26:12-18) Mbwenye Afilisiti tatoodhowanave onga ira ma-inje atatamulo thitho tali i-wa. Angalive ira vyali e-no Izaki atoodhowanave iranga vyongo mwarendele. (Mar. 26:19-25) N’nga chini yam’kami-idhe dhowanave kala opwaseya angalive ira atu enango tafuna ira takanganenga na liye? Vinooneya ira atukulele ifwanafwani-o ya babee thitho anoona mwemo Abrahamu mwairela liye vyongo mwarendele thitho anoona “zimu opwaseya” wa Sara.—1 Pe. 3:4-6; Mar. 21:22-34. w23.09 15 ¶4

Yohova atom’tumiza Mwanee oroma baliwa vailamboi ira adhafunji-e atu vyokuza Umwenuo thitho dhavelela ingumee ninga khuto ira aniombole wu vyodawa na wukwa. Voi e-no Yesu atoovenyathi-iwa nowelela dhulu ira amakale Mwene wa Umwene wa Nlungu. Mwasa nlukulu oongiwa Bibilyani ngoi dhina la Yohova linodha cheni-iwa adhakwakwaneli-edhanga ifunelwee yokuza ilambo yavathi, vo-indi-edha basa Umwene otongiwa na Kristu. Ifunelo ya Yohova kinodha chinjiwa. Liye unodha kwakwaneli-edha yongo iliyothene ilanyedhile liye thitho kinodha imwananeya. (Esa. 46:10; Aeb. 6:17, 18) Vasogolovee ilambo inodha chinjiwa nokala paradaizo thitho a-ima a Adamu na Eva olongomana “anodha kaana ingumi yo-omala muilambwiyo.” (Sal. 22:26) Wenjedhela vevo vatokala vyongo vinjinji vyevyo Yohova vinofuna liye dhaira. Ifunelwee ilukulu choi othene dhulu na availambo yavathi takale ovwelana. Thitho atu othene anofuna dhakaana ingumi anodha gonjelanga Nlungu ninga Namatongiwa. (Aef. 1:8-11) Onga imbarimbari, Yohova unaakwakwaneli-edha ifunelwee mundhila yova-a ifunelo. w23.10 20 ¶7-8

Ayuda tali wu Babulo tangafiile wu Yerusalemu, kavavirile hora indendai ira tarome gumanana nyarwa dhafuma, nyarwa dha ndale thitho runi-iwa. Ee-no anjinji mwaaliwa vyatoarucha e-la mathuulelwiwa va basa yomanga kachisi wa Yohova. Yohova atooruma anamaongela ambili, Agai na Zakariya ira tamaalimbi-e. (Aga. 1:1; Zka. 1:1) Vangavirile vaduzi duzi vyawa 50, Ayudao tatofooka okoka. Ezara wenuo ali wa dodoliso volemba ilamulo, atoodhowa wu Yerusalemu kumela wu Babulo ira amalimbi-e atu a Nlungwao ira ta-ele vasogolo vyongo vyokuza lambela waimbarimbari. (Eza. 7:1, 6) Maulosi a Agai na Zakariya tatoakami-a atu a Nlungu awalelene ira tadhowenave m’roromela Yohova vevo varuni-iwa aliwa. Maulosala anooda nikami-a thitho i-yo vano ira nidhowenave roromela ira Yohova unooda nikami-a vevo vanogumanana i-yo nyarwa.—San. 22:19. w23.11 14-15 ¶2-3

Mwasiwa ngwan’ni ninofwanela dhivelangana maningi malamboano? Nitoona ira nadhivelangana maningi naabali naarongoli-u, ninothonyi-edha ira ninom’dhiveliwana Yohova. N’nga ninathonyi-edhe a-vi ira ninodhiveliwana abali naarongoli-u? Ndhila imbo-i yoirela vyevyo, “kulimbi-ana venango didili-ana.” (1 At. 4:18) Tangaranga dhinonilimbi-a ira nidhowenganave didili-ana. N’nga ninaire a-vi ira nidhiveliwengana maningi abali na arongoli-u? Ninooda irana vyevyo vodhilimbi-edhanga alevelela abali naarongoli-u vinodawi-a aliwa. Mwasiwa ngwan’ni pyofuneya ira nidhivelanenga maningi malamboano? Pedru atoovelela mwasee voonga ira: “Khomoni wa vyongo vyothene utowandamela. E-no, . . . mudhivelanenga maningi.” (1 Pe. 4:7, 8) N’nga chini inofuna ireya khomoni wa vyongo vyothene wawandamelanga? Vaonga liye na anama-arelee, Yesu aongile ira: “Atu amaziza othene anodha idana na nyo namwasa wa dhina langa.” (Mat. 24:9) Ira niode vilela, ninofwanela vwelananga maningi. Naira e-no, Satana khanaode ni-iyani-a namwasa oi nitokhaana udhivela.—Afl. 2:1, 2. w23.11 13 ¶18-19

Imbarimbari ya madhu a Nlungu chakopolo maningi. Nafunji-anga atu imbarimbari yokuza Yohova thitho mwemo mukalele liye, vanoireya yongo inangoyee yondabwi-a. A-ona wewo unoiri-a Satana mathuuleloni mwaatwale unoroma mala thitho anoroma ona makalelo aphama a Babi-u odhiveliwiwa, ninga mwemo munoirela i-yo. Aliwa anodabwa na kopolodhee dho-okaana madile. (Esa. 40:26) Anoroma roromela mwasee unoonela aliwa ira ngolongomana. (Dot. 32:4) Anofunjedha vyongo vinjinji vyokuza zeludhee dhavadhulu. (Esa. 55:9; Aro. 11:33) Anolimbi-iwa thitho idhiwa ira liye ngwaudhivela (1 Ju. 4:8) Karoma kala vauxamwali na liye, idedi-edho yiwa yodhakaana ingumi yokalao dhowa nodhowa ninga a-imee, inokala yosikimizeleya. Nitokaana ngari ilukulu maningi yokami-a atu ira takale vauxamwali na Babi-u wadhulu. Nairanganani vyevi, Yohova unoniona ira nili “anamalaba afwee.”—1 Ak. 3:5 w24.02 12 ¶15

Akala muli namafunjedha Bibilya venango mulukhulile mu banja la Mboni N’nga munothuulela vyobadiziwa? Yeyi chiifunelo yapama maningi, mwa-ana badiziwe munofwanela vivelela wa Yohova. N’nga mutu unovivelela a-vi wa Yohova? Unolanyedha mulobelo ira unam’lambelenga Yohova baa-i no-elanga vyongo vinofuna Yohovuo valimburo loroma. Aira e-no unokala alanyedhanga Yohova ira unodha dhowanave m’dhiveliwana na “rimee othene, ingumiyee yothene, mathuulelwee othene na kopolodhee dhothene.” (Mrk. 12:30) Mutu uliwethene unovivelela ekene thitho ngu mwasa wa liye na Yohova baa-i. Mbwenye badiziwa unoireya vamwinjini thitho unosikimizeli-a atu enango ira mutuo utovivelela wa Yohova. Vivelela cholanyedha yavakundu thitho munofuneela ikwakwaneli-edhanga namwasa oi Yohova unodedi-edha thitho ira mukwakwaneli-edhenga.—Nam. 5:4, 5. w24.03 2 ¶2; 3 ¶5

Mabanja othene anogumanana nyarwa. Bibilya linoonga mo-ovira kundu ira atu enao tali va banjani, “anogumanana nyarwa vaingumiiwa.” (1 Ak. 7:28) Vili ee-no namwasa oi banja ndi vwelano waatu ambili oi kai olongomana. Thitho anokaana makalelo o-iyana-iyana, vyongo vinodhiveliwana aliwa na vyongo vinoidanana aliwa. Anooda i-yana vikalelo namwasa wa weo ulukulele aliwa thitho hora dhinango anooda kaana makalelo oi kataoneya va hora yali aliwa ta-anakale vabanjani. Vyongo ninga vyevi, vinooda romi-a nyarwa. Malo moi mutu uliwethene va banjanivo azindiyele yoruchayee noimali-a, anoroma ombana landu unango nafwee. Thitho anooda onanga ira mwadhana ndi ndhila imbo-i inaode aliwa mali-edha nyarwadho. N’nga vyevi pyaimbarimbari? Kabe Yohova unofuna ira atu othelana talemezengana angalive ira lombwana venango i-yana ngorucha. w24.03 16 ¶8; 17 ¶11

Vadivelelanyo no badiziwa, idedi-edho inyu yokaana ingumi yo-omala yatoodhowanave ulukula vevo vafunjedha nyo vyongo vinjinji nokhala oulukula mwauzimu. (Aeb. 5:13–6:1) Vinooneya ira vili va lemba la Aroma 5:2-4 vikadhi viuireelangani. Mukadhi mugumanangana nyarwa dho-iyana i-yana mbwenye mutovilela thitho mukadhi muonanga ira Yohova unosangalala na nyo. Voi kamunokaikela ira Nlungu unoudhiveliwanani, va-eeni mutokaana mwasa nlukulu odedi-edhela vilanyedhile liye. Idedi-edho inyu chakopolo maningi kwaranya voromavene. Munoona ira vinodedi-edhela nyo pyaimbarimbari thitho vinokuza maningi ikhundu iliyothene yaingumi inyu, vitoukami-ani chinja mwemo munairele nyo vyongo naatu abanjani mwinyu, thitho sakula mwemo muna-indi-edhelenga nyo basa horinyu. Rumiwi Paulo atoonga likhundo lofuneya maningi vamwasa wa idedi-edho inokaana i-yo vasogolo vokala orumeleya wa Nlungu. Liye atoonisikimizeli-a ira vinodedi-edhela i-yovyo, vinodha kwakwaneli-ediwa.—Aro. 15:13. w23.12 12-13 ¶16-19

Nagumanangana nyarwa dhilukhulu ninovwa upha rimani mwi-u, rucheya mathuulelo thitho vyevi vinoniiri-a ira na-airenga vyongo ninga munoirecha i-yo hora dhothene. Ninooda kala ninga barku inotukuliwa na lipevo nlukhulu dhowanga wu na wu. N’nga Yohova unonikami-a a-vi naromanga vivwa e-no? Liye unonisikimiza ira unodha nikami-a ira na-atekenyeye. Barku lagumanana lipevo nlukulu vabara, inoroma ndunyiwa dhowanga wu na wu thitho vyevo vinokala vyoophi-a maningi. Mbwenye mabarku enango anokaana vyongo vinango khundu mwiwa vyoi vinokami-a ira barkwiyo ya-andunyiwenga. Vyongo vyevi vinokami-a ira barkwiyo ya-andunyiwenga thitho vinokami-a ira atu tagwenle barkunimo takale obareleya. Vyongo vinjinji vyevyo vinokami-a barkwiyo ira la-atekenyeyenga, vinolaba basa mwapama barkwiyo yawendanga. Mofwanafwana na vyevi, Yohova unodha nikami-a ira na-atekenyeye akala ninodhowanave m’lambela mororomeleya vahora inogumanana i-yo nyarwa. w24.01 22 ¶7-8

Mwaovanga mudhifukenga ira, ‘N’nga ndi vyongo viivi viirile Yohova walelene?’ Muthuulelenga vyongo vipandhuchile liye. Mofwanafwani-a, “mwaing’anechecha” mwemo munosamalela liye mbalambe na mafolori, vyongo vyoi kavipanduchiwile muifwanafwani-oyee thitho kavinaode m’lambela, munoroma m’nyindela maningi Yohova ira nyo thitho unodha usamalelani. (Mat. 6:25-32) Muthuulelenga thitho vyongo viirele liye arumiwee. Munooda leri thitho vya mutu mwinango oongiwa Bibilyani, wenuo athonyi-edhile iroromelo yolimba venango munooda leri vyongo vinango vyam’mwireele rumiwi wa Yohova wa malamboano. Wenjedhela vevo, muthuulelenga vyongo viirile Yohova vousamalelani. N’nga uukami-idheni a-vi ira mufunjedhe imbarimbari? (Ju. 6:44) N’nga ukadhi awakhulanga malobelwinyu moi a-vi? (1 Ju. 5:14) N’nga kuto wa Mwanee odhiveliwiwa unoukami-ani a-vi dambo nlilothene?—Aef. 1:7; Aeb. 4:14-16. w24.01 4 ¶6; 7 ¶17