N’nga muli okozeya vivelela wa Yohova?

1-2. N’nga mutu a-anabadiziwe unofwanela irana n’ni?

VYAWA 5 vivirilevi, atu okwaranya milyau imbo-i tatobadiziwa nokala Amboni dha Yohova. Mofwanafwana na Timoteo wa muhora ya arumiwi, anjinji mwaatwala tatoofunjedha imbarimbari “romela tangali a-ima.” (2 Ti. 3:14, 15) Atu enango tafunjedhile tangamadhi ulukula voi enango tafunjedhile tangamadhi ulula. M’ma mwinango wenuo afunjedha Bibilya na Amboni dha Yohova, ubadiziwile chineneeva angana vyawa 97.

² Akala munaafunjedha Bibilya venango akala anamabalinyu ndi Amboni, pyooneelatu ira munothuulela vyobadiziwa. Yei chiifunelo yapama maningi. Mbwenye mwa-anabadiziwe munofwanela vivelela wa Yohova. Yofunjedha yei inoonga vyevyo vinothapulela vivelela. Inoukami-ani thitho ona mwasee unofwanela nyo a-ova vivelela nobadiziwa akala munoona ira munooda irana vyevyo.

N’NGA VIVELELA UNOTHAPULELA N’NI?

3. Muonge vifwanafwani-o vyaatu enao tavivelenle wa Yohova.

³ Bibilya laonganga madhu oi vivelela, linoonga vya mutu wenuo unosakula ira airenga vyongo vinangovyee vyopambuleya. Aisraeli tali tundu ovivelela wa Yohova. Mbwenye Aisraeli enango tanoodhivelela wa Yohova mwavakundu. Mofwanafwani-a, Aroni anoowara “izindiyelo yothonyi-edha ira ali ovivelela,” yeyo yali iximomba yovyerimela yagolide yakalecha vadukunivee. Iximombila yathonyi-edha ira Aroni atoosakuliwa ira alabenga basa lavakundu ninga ndimuwa waalimbo velela sembe wa Aisraeli. (Lev. 8:9) Anaziri thitho tanoovivelela wa Yohova mundhila yavakundu. Madhu oi “Anazir” enao akumele mumadhu Aiebere oi nazir, anothapulela “Osakuliwa” venango “Ovivelela.” Anaziri tafuneela a-rela malamulo enango avakundu enao tafwanyeya muilamulo yava-iwile Mose na Nlungu.—Num. 6:2-8.

4. (a) N’nga mutu uvivelenle wa Yohova unothonyi-edha a-vi ira utopambuliwa mwavakundu? (b) N’nga “vikonda wekene” unothapulela n’ni? (Muone thitho iruthiruthi.)

⁴ Mutu avivelela wa Yohova, unosakula kala namafunjedha wa Yesu Kristu thitho unoona ira irana ifunelo ya Nlungu kofuneya maningi vaingumiyee. N’nga vivelela unothangani-avo n’ni? Yesu aongile ira: “Akala mutu unofuna ndi-arela, avikonde ekene.” (Mat. 16:24) Madhu Aigiriki athapuleliwe ira, “vikonda wekene” anooda ongiwa thitho ira “vikondi-a irana yongo inangwee.” Ninga rumiwi ovivelela wa Yohova, ninofwanela vikondi-a ira na-aire yongo iliyothene ya-anom’sangalali-a Yohova. (2 Ak. 5:14, 15) Vyongo vyevi vinothangani-avo “mabasa amanungo” ninga mararuo. (Agl. 5:19-21; 1 Ak. 6:18) N’nga vikondi-a vyongo ninga vyevi korucha? Kabe, simbwasimbwa akala ninom’dhiveliwana Yohova kaninokaikela ira vwela malamulwee unonikami-a ira vyongo viniwendelenga pama. (Sal. 119:97; Esa. 48:17, 18) Bali mwinango dhinalee Nicholas aongile ira: “Munooda sakula ira muonenga malamulo a Yohova ninga mavarau omangiwana perezo enao anouimwanani-ani irana vyongo vinofuna nyo, venango ninga mavarau enao abareliwilena limburo munolokotiwa vinyama ira kalamu ya-aupei-eni.”

5. (a) N’nga mutu unovivelela a-vi wa Yohova? (b) N’nga vivelela uno-iyana a-vi no badiziwa? (Muone thitho iruthiruthi.)

⁵ N’nga mutu unovivelela a-vi wa Yohova? Unolanyedha mulobelo ira unam’lambelenga Yohova baa-i no-elanga vyongo vinofuna Yohovuo valimburo loroma. Aira e-no unokala alanyedhanga Yohova ira unodha dhowanave m’dhiveliwana na “rimee othene, ingumiyee yothene, mathuulelwee othene na kopolodhee dhothene.” (Mrk. 12:30) Mutu uliwethene unovivelela ekene thitho ngu mwasa wa liye na Yohova baa-i. Mbwenye badiziwa unoireya vamwinjini thitho unosikimizeli-a atu enango ira mutuo utovivelela wa Yohova. Vivelela cholanyedha yavakundu thitho munofuneela ikwakwaneli-edhanga namwasa oi Yohova unodedi-edha thitho ira mukwakwaneli-edhenga.—Nam. 5:4, 5.

MWASIWA NGWAN’NI NINOFWANELA VIVELELA WA YOHOVA?

6. N’nga chini inom’muiri-a mutu ira avivelele wa Yohova?

⁶ Mwasa nlukulu unoniiri-a ira nivivelele wa Yohova, ngoi ninom’dhiveliwana. Kaiira udhivela unotukulela moda unovivwela i-yo. Malomwee udhivela unodha namwasa “oidhiwa vyongo vyaimbarimbari novwechecha vyongo vyauzimu.” Vyevyo vinoniiri-a ira nim’dhiveliwengana maningi Nlungu. (Ako. 1:9) Funjedha malemba utoukami-ani sikimizela ira (1) Yohova ngwaimbarimbari, (2) Bibilya ndi madhwee ovudheleliwa (3) Yohova uno-indi-edha basa gululee vofuna kwakwaneli-edha ifunelwee.

7. N’nga mutu a-anavivelele wa Yohova unofwanela irana n’ni?

⁷ Atu anovivelela wa Yohova, anoidhiwa makundo oroma ofwanyeya m’madhu a Nlungu noa-arelanga vaingumi yiwa yothene. Anodhilimbi-edha irana vyevyo vinaode aliwa ira tawandelenga atu enango vyongo vinororomela aliwa. (Mat. 28:19, 20) Anom’dhiveliwana maningi Yohova thitho anofunechecha m’lambela liye ekene. N’nga piyevyo vinoirana nyo thitho? Mwakaana udhivela ninga wen’na, kamunodha ona vivelela nobadiziwa ninga vyongo vinoira nyo vofuna m’sangalali-a mutu unoufunji-ani Bibilya venango anamabalinyu, thitho kamunodha viona ninga moda unoirecha nyo vyongo vosazi-edha afwinyu.

8. N’nga simba unaukami-eni a-vi ira muvivelele wa Yohova? (Salimo 116:12-14)

⁸ Vinooda kala vyo-orucha vivelela wa Yohova akala munothuulela vyongo vyothene viuirelene liye. (Muleri Salimo 116:12-14.) Bibilya linoonga ira Yohova ngunovelela “yotuva iliyothene yapama na yolongomana.” (Yak. 1:17) Yotuva ilukulu iniva-idhe liye ndi sembe ya Mwanee Yesu. Kathuulelani, kuto utoiri-a kala vyoodeya i-yo kala vauxamwali na Yohova. Kuto utoukami-ani ira mukaena ngari yodha kaana ingumi yokalao dhowa nodhowa. (1 Ju. 4:9, 10, 19) Vivelela ndi ndhila yapama yothonyi-edha ira munosimba riya rima ulukulu wa Yohova uuthonyi-edheni liye na maraeli-o othene anouva-ani liye. (Dot. 16:17; 2 Ak. 5:15) Mwasa oonga simba utoongiwa muyofunjedha 46 likundo 4 mubukhu loi Ingumi Yokalao Dhowa Nodhowa! Vevo vali vidiyo ya maminutu mararu yoi velela yotuva wa Nlungu.

N’NGA NYO MULI OKOZEYA VIVELELA NOBADIZIWA?

9. Mwasiwa ngwan’ni mutu kanofwanela vikanyi-edha ira avivelele wa Yohova?

⁹ Venango munooda onanga ira kamunakozeele ira muvivelele nobadiziwa. Pyoidhiweelatu ira munofuneela chinja vyongo vinango ira mu-arelenga makundo a Yohova. Venango munofuneela hora injinji ira mulimbi-e iroromelwinyu. (Ako. 2:6, 7) Kaiira anamafunjedha othene anodhowa vasogolo mofwanafwana na enango thitho a-ima katinokala okozeya vivelela nobadiwa vatunga lofwanafwana. Muvilimbi-edhenga ona dhowa winyu vasogolo, movwelana na vyongo vinooda nyo thitho kamuvifwanafwani-edhenga na mutu mwinango.—Agl. 6:4, 5.

10. N’nga munofwanela iranan’ni akala munoona ira kamunakozeele ira muvivelele wa Yohova nobadiziwa? (Muone thitho kwadru ya muru oi “Atu enao aulukulele banjani mwa Amboni.”)

¹⁰ Akala munoona ira kamunakozeele vivelela wa Yohova, mudhowenganave kaana ifunelo yen’na. Mum’vepenga Yohova ira aukami-eni saka-edha vyongo vinofuna nyo chinja. (Afl. 2:13; 3:16) Idhiwani ira Yohova unodha vuruwana malobelwinyu thitho unodha ukami-ani.—1 Ju. 5:14.

MWASIWA ATU ENANGO ANOVWALAVWALI-A

11. N’nga Yohova unanikami-e a-vi ira nikaleve ororomeleya?

¹¹ Atu enango angalive ira anokala tangamadhi kozeela, anovwalavwali-a ira tavivelele wa Yohova nobadiziwa. Aliwa anothuulela ira ‘N’nga a-vi ndamala badiziwa miyo irana yongo yothakala nokumi-iwa pingoni? Akala mathuulelo ananyo mbenao, idhiwani ira Yohova unodha uva-ani yongo iliyothene inofuneela nyo ira “mukaena makalelo ovwelana na vyongo vinofuna [Yohova] ira mum’sangalali-enga va yongo iliyothene.” (Ako. 1:10) Yohova unodha uva-ani kopolo ira muirenga vyongo vyofwanelela. Liye utothonyi-edha ira unodha irana vyevi namwasa oi utokami-avo atu anjinji ndulimu ira tairengana vyongo vyofwanelela. (1 Ak. 10:13) Ngumwasiwa mbaatu oyeva maningi anokumi-iwa pingoni. Yohova unokami-a atwee ira takaleve ororomeleya.

12. N’nga ninaire a-vi ira nirambele irana vyodawa vilukulu?

¹² Mutu uliwethene oi kai olongomana, unowesedhiwa ira airena vyongo vyothakala. (Yak. 1:14) Mbwenye munooda sakula vyongo vinaire nyo mwagumanangana vyowesedha. Likundo toi, nyo nguna izo yosakula vyongo vinofuna nyo iranga vaingumi inyu. Angalive ira atu enango anoruni-a vyevi, munooda vifunji-a ira mwa-airenga vyongo vyothakala. Mwaira e-no masiki mufunafunenga irana vyongo vyothakala, munooda vikondi-a ira mwa-aviirena. Ira vyevi viodeye, mulobelenga dambo nlilothene, mukaengana ilemeelo yofunjedha madhu a Nlungu vamwekene, mufwanyeyenga vamigumanoni thitho muwandelenga atu enango vyongo vinororomela nyo. Irana vyongo vyevi hora dhothene, unodha ukami-ani ira mukwakwaneli-edhe yolanyedha inyu yovivelela. Thitho kamudiwale ira Yohova unodha ukami-ani.—Agl. 5:16.

13. N’nga Yosefe uni-iyedhele ifwanafwani-o yoi a-vi?

¹³ Vinooda kala vyo-orucha ira mukwakwaneli-edhe yolanyedha inyu yovivelela akala mwatoosakulelatu vyongo vinaire nyo mwadha gumanana vyowesedha. Bibilya linoonga vyaatu angasi enao tairilena vyongo vyevi, angalive ira naaliwene thitho tali atu o-olongomana. Mofwanafwani-a, mwadhi Potifara atom’mwesedha Yosefe moweli-edha weli-edha thitho mom’nyengelela. Mbwenye Yosefe ali angamadhi idhiwa vyoira. Bibilya linoniwandela ira Yosefe “atookonda,” thitho atoonga ira: “Ndinairelen’ni vyongo vyothakala maningi ee-ni nom’dawela Nlungu?” (Mar. 39:8-10) Vyaongile liyevyo, vinooni-a ira Yosefe atooidhiwa vyongo vyaire liye mwadhi Potifara a-anarome m’nyengelela. Vyevyo vyato’mkami-a ira airena vyongo vyofwanelela angaguman’nena vyowesedha.

14. N’nga ninaire a-vi ira niodenga konda irana vyongo vyothakala?

¹⁴ N’nga munaire a-vi ira mukaleve ororomeleya ninga Yosefe? Musakulelengatu va-eeni, vyongo vinofuna nyo dhaira mwadhagumanana vyowesedha. Mufunjedhenga konda mombaranya vyongo vinoidanana Yohova thitho kamuvithuulelenga. (Sal. 97:10; 119:165) Vyevyo vinodha ukami-ani ira mwa-aire vyodawa, namwasa oi munodha kala mungamadhi idhiwa vyongo vyofwanelela irana.

15. N’nga mutu unathonyi-edhe a-vi ira “unom’funafuna Yohova na rimee wethene”? (Aebere 11:6)

¹⁵ Pyooneelatu ira nyo mwatoofwanya imbarimbari thitho munofuna m’labela Yohova na riminyu othene, mbwenye munovwalavwali-a ira muvivelele nobadiziwa. Akala ndi e-no, munooda irana vyongo vyairile Mwene Davide. Mum’vepenga Yohova ira: “Ndisakesakeni nyo Nlungu thitho muidhiwe rimanga. Ndisakesakeni thitho ira muidhiwe mathuulelwanga enao anondisukwali-a. Muone akala mwa miyo mutokala yongo iliyothene yothakala thitho mundisogolele mundhila yokalao modhowa nodhowa.” (Sal. 139:23, 24) Yohova unoraeli-a atu “anom’funafuna na rimiwa othene.” Mwavilimbi-edhanga ira mukwakwaneli-edhe ifunelwinyu yovivelela nobadiziwa, munothonyi-edha ira munom’funafuna Yohova na riminyu othene.—Muleri Aebere 11:6.

MUDHOWENGANAVE M’KWIVELA YOHOVA

16-17. N’nga Yohova unoitana a-vi atu enao taulukulele mubanja la Amboni? (Juwau 6:44)

¹⁶ Yesu atoonga ira Yohova unodhi veliwana anamafunjedhee. (Muleri Juwau 6:44.) Likundo leli tova-a ifunelo maningi thitho kathuulelani moda munoukuzelani aliwa. Yohova unoona yongo inangoyee yapama mwa mutu uliwethene unom’muitana liye. Yohova unom’mona mutuo ninga “fumee yapereso yavadhulu.” (Dot. 7:6) Mwemu ndi mwemo munouonelani Yohova.

¹⁷ Venango nyo muli mwana thitho anamabalinyu mba Amboni. Vinooneya ira munooda onanga ninga munom’labela Yohova namwasa oi anamabalinyu mba Amboni a-kala namwasa oi Yohova nguuwitanileni. Mbwenye Bibilya linoonga ira: “M’mwandameleni Nlungu naliyene thihto unodha uwandamelani.” (Yak. 4:8; 1 Li. 28:9) Mwaroma m’mwandamela Yohova naliyene thitho unouwandamelani. Kaiira Yohova unouonani ninga mutu uli gulunimwee mbwenye liye unom’mwitana mutu uliwethene vaekene thangani-avo enao aulukulele banjani mwa Amboni. Mutu aroma m’mwandamela Yohova, naliyene thitho unom’mwandamela ninga mwemo muonele i-yo va lemba la Yakobo 4:8.—Mufwanafwani-edhe na lemba la 2 Atezalonika 2:13.

18. N’nga ninodha tapanyan’ni muyofunjedha yo-arela? (Salimo 40:8)

¹⁸ Mwavivelela wa Yohova nobadiziwa, munokala mum’sazi-edhanga Yesu. Liye atoovivelela wa Babee ira airenga vyongo vyothene vinam’mwandele liye. (Muleri Salimo 40:8; Aeb. 10:7) Muyofunjedha yo-arela ninodha tapanyani vyongo vinaukami-eni ira mum’labelenga Yohova mororomeleya mwamala badiziwa.