“Mudhowenganave m’a-relanga” Yesu mwamala badiziwa

1-2. N’nga mutu amala badiziwa unofwanya maraeli-o avi?

NINOSANGALALA maningi na badiziwa nokala banjani mwa Yohova. Atu abadiziwile wene anovwelana na vyevyo vyalembile Davide ira: “Osangalala ngu mutu wenuo usakuliwile na Yohova nokala vaduzi na liye ira akale mulimburolee.”—Sal. 65:4.

² Kaiira Yohova unorumeli-a ira mutu uliwethene avolowe mulimburolee. Ninga muonele i-yo muyofunjedha ivirile, Yohova unosakula awandamela atu enao anothonyi-edha ira mbofunechecha kala vauxamwali na liye. (Yak. 4:8) Mwavivelela nobadiziwa, munokala vauxamwali wavakundu na Yohova. Mwaira e-no munooda kala osikimiza ira mwabadiziwa, “unodha uva-ani maraeli-o thitho kamunodha rambulela yongo iliyothene.”—Mak. 3:10; Jer. 17:7, 8.

3. N’nga Makristau enao adhivelele nobadiziwa anokaana izo ilukulu ivi? (Namalaleya 5:4, 5)

³ Pyaimbarimbari ira badiziwa ndi maromelo baa-i. Mbwenye mwabadiziwa, munofwanela irangana yongo iliyothene inaode nyo ira mukwakwaneli-edhe yolanyedha inyu masiki mugumanengana vyowesedha. (Muleri Namalaleya 5:4, 5.) Ninga namafunjedha wa Yesu, munofwanela a-relanga ifwanafwani-oyee no vwelanga malamulwee mosamala maningi. (Mat. 28:19, 20; 1 Pe. 2:21) Yofunjedha yei inoukami-ani ona moda unairelenyo vyevi.

“MUDHOWENAVE A-RELANGA” YESU ANGALIVE IRA MUNOGUMANANA VYOWESEDHA

4. N’nga anamafunjedha a Yesu anotukula imuriwa “yoonelavo nyarwa” mundhila iivi? (Luka 9:23)

⁴ Kamuthuulelenga ira mwadha badiziwa kamunodha gumanangana nyarwa. Yesu atoonga movweya pama ira anamafunjedhee anofwanela tukula “imuriwa yoonelavo nyarwa.” Aliwa tafwanela irana vyevi, “dambo na dambo.” (Muleri Luka 9:23.) N’nga veva Yesu athapulela ira hora dhothene anama-arelee anongo rucheya? Kabe kaathapulela vyevyo. Yesu athapulela ira wenjedhela va maraeli-o anakaengana aliwa, hora dhinango anongo gumanana nyarwa. Nyarwa dhinango dhinagumanengana aliwa dhinongo kala dhilukulu.—2 Ti. 3:12.

5. N’nga Yesu alanyedhile ira atu anodhimana vyongo vinango anodha fwanya maraeli-o oi a-vi?

⁵ Vinooneya ira nyo munogumanana nyarwa ninga runi-iwa naabalinyu, venango mwatoorumela ira mwa-akaena vyongo vinjinji naifunelo yoi mu-elenga vyongo vyokuza Umwene wa Nlungu valimburo loroma. (Mat. 6:33) Akala ndi e-no idhiwani ira Yohova unoona vyongo vyothene vinoira nyo vom’labela mororomeleya. (Aeb. 6:10) Venango nyo mutoona kwakwaneli-edhiwa wa madhu a Yesu oonga ira: “Kavali mutu u-iidhe nyumba, abalee, arongolee, m’mee, babee, a-ima venango minda namwasa wa miyo thitho namwasa wa milanyu yapama, oi va-eni kanofwanya vyongo vyoinjiva weli-edha fendo 100 hora ino. Liye unodha fwanya nyumba, abalee, arongolee, m’mee, a-ima na minda, thitho a-ra-ariwa, mbwenye hora inodhiyo, unodha kaana ingumi yo-omala.” (Mrk. 10:29, 30) Maraeli-o anofuna nyo dhakaana, anodha kala malukulu kwaranya vyongo vyavimanile nyo.—Sal. 37:4.

6. Mwasiwa ngwan’ni mwamala badiziwa munofwanela dhowanave limbanana vyongo “vinolavela manungwinyu”?

⁶ Mwamala badiziwa, munofwanela dhowanave limbanana vyongo “vinolavela manungo.” (1 Ju. 2:16) Vyevyo vili e-no namwasa oi ninga ziza la Adamu, muli odawa. Hora dhinango munooda vivwanga ninga mwavivwela rumiwi Paulo. Liye alembile ira: “Rimani mwanga ndinosangalala maningi na malamulo a Nlungu, mbwenye ndinoona lamulo n’nango manungoni mwanga liwananga na malamulo amathuuleloni mwanga, nondiiri-a kala dhaari wa lamulo la vyodawa lelo nli manungoni mwanga.” (Aro. 7:22, 23) Munooda fooka namwasa wa vyongo vyothakala vinolavela nyo. Mbwenye thuulela vyongo vyam’lanyedhile nyo Yohova vahora yadhivelela nyo, vinooda uva-ani kopolo ira muodenga limbanana vyowesedha vyothene vinagumanengana nyo. Imbarimbari choi mwagumanangana vyowesedha, yolanyedha inyu yodhivelela inodha ukami-ani kaana ingumi yo-ofuna vyongo vinjinji. N’nga vinoukami-ani a-vi?

7. N’nga vivelela winyu wa Yohova unoukami-ani a-vi ira mudhowenganave kala ororomeleya?

⁷ Mwavivelela wa Yohova, munodhikonda mwekene. Vyevyo vinothapulela ira munokonda vyolavela na vifunelo vinyu vyevyo vinoona nyo ira kavinom’sangalali-a Yohova. (Mat. 16:24) Mwaira e-no, mwagumanangana vyowesedha kamunodha dembuwa thuulela vyongo vinaire nyo. Munodha kala mungamadhi idhiwa wale vyoira nokalave ororomeleya wa Yohova. Munodha funechecha dhowanave m’sangalali-a Yohova. Mwairangana vyevyo munodha landana na Yobo. Angalive ira Yobo atoogumanana vyowesedha viluku, liye atoonga mosikimizela rima ira: “Kandinodha i-ya kala ororomeleya.”—Yob. 27:5.

8. N’nga thuulela vyongo vyalanyedhile nyo wa Yohova mulobelo vahora yadhivelela nyo, unaukami-eni a-vi limbanana vyowesedha?

⁸ Thuulela vyalanyidhile nyo wa Yohova vahora yadhivelela nyo, unooda uva-ani kopolo ira muode konda vyowesedha vyothene vinogumanana nyo. Mofwanafwani-a, N’nga munoroma kopeya na lombwana venango i-yana wa mwinyaa? Pyooneelatu ira kamunoirana vyevyo, namwasa oi mwatoolanyedha wa Yohova ira kamunodha irana vyongo ninga vyevyo. Akala kamunorumela ira mathuulelo othakala takaatheye mathuuleloni mwinyu, kamunodha rucheya amali-a. “Munodha kumavo” ira “mwa-atukulele vyoira vyaatu amakalelo othakala.”—San. 4:14, 15.

9. N’nga thuulela vyongo vyalanyedhile nyo mulobelo vahora yadhivelela nyo wa Yohova, unaukami-eni a-vi ira mu-elenga vyongo vyokuza Umwene valimburo loroma?

⁹ N’nga a-vi akala mutokaana ngari yolaba basa yeniyo inauimwanani-engani fwanyeya vamigumanoni hora dhothene? Vevo munodha idhiwelatu vyoira. Ninoonga e-no namwasa oi mwa-anafwanye basiyo, mwali mungasakunle ira kamunodha laba basa ninga lelo, ee-no kamunodha rumela basiyo mwathuulela ira mutofwanya ndhila yoi mu-elenga vyongo vyokuza lambela valimburo loroma. Mwathuulelanga mwemo Yesu mwakalele liye osikimizela ira asangalali-enga Babee, unodha ukami-ani ira mombaranya thitho molimba rima mukonde vyongo vyothene vyevyo vinoidhiwa nyo ira kavinom’sangalali-a Nlungu wenuo wadhivelele nyo wa liye.—Mat. 4:10; Ju. 8:29.

10. N’nga mwamala badiziwa Yohova unodha ukami-ani a-vi ira “mudhowenave m’a-rela” Yesu?

¹⁰ Vyowesedha vinogumanana nyo, vinouva-ani ngari yoi muthonyi-edhe ira muli ofunechecha “dhowanave a-rela” Yesu. Thitho munooda kala osikimiza rima ira Yohova unodha ukami-ani. Bibilya linoonga ira: “Nlungu ngororomeleya thitho kanodha rumeli-a ira muwesedhiwe fiyedha vevo va-anaodenyo vilela, mbwenye vevo vanogumanana nyo vyowesedhavyo liye unodha velela ndhila youvulumuchani ira muode vilela.”—1 Ak. 10:13.

VYONGO VINAIRE NYO IRA MUDHOWENAVE M’A-RELA YESU

11. N’nga ndindhila imbo-i iivi yapama inanikami-e m’a-rela Yesu? (Muone thitho iruthiruthi.)

¹¹ Yesu anom’lambela Yohova na rimee othene thitho lobelo latom’kami-a ira adhowenave kala vauxamwali na liye. (Luk. 6:12) Ndhila yapama yodhowanave m’a-rela Yesu mwamala badiziwa, kukaana ilemeelo yoiranga vyongo vinaukami-eni m’kwivela Yohova. Bibilya linoonga ira: “Mbwenye mwandhila iliyothene idhowile i-yo vasogolo, dhoweni nidhowenanive iranga vyongo vinoira i-yovyo.” (Afl. 3:16) Hora dhinjinji muvwenga vyongo vyevyo viireele abali naarongolinyu, enao tadhilimbi-edha ira tairenga vyongo vinjinji vom’lambela Yohova. Venango aliwa tatoodhowa xikola ya Makristau olaleela vya Umwene venango tatoothamela weo wafuneela anamalaleela anjinji a Umwene. Nyo thitho munooda dhi-elela vifunelo ninga vyevi. Atu a Yohova anofunechecha ira tairega vyongo vinjinji vom’labela. (May. 16:9) N’nga a-vi akala kamunaode irana vyongo ninga vyevi va-eeni? Kamuthuulelenga ira muli oimwanana vofwanafwani-edha na atu enango enao taodile irana vyevyo. Yofuneya maningi choi mudhowenave m’lambela. (Mat. 10:22) kamudiwale ira Yohova unosangalala na vyongo vinoira nyo vom’labela, movwelana na dodoliso linyu thitho mwemo vyongo mukalele aliwa vaingumi inyu. Yen’na ndi ndhila yofuneya maningi ya mwemo munadhowenavenyo m’a-rela Yesu mwamala badiziwa.—Sal. 26:1.

12-13. N’nga munaire a-vi akala kamunom’labela Yohova mwathindhi ninga walelene? (1 Akoritiyo 9:16, 17) (Muone thitho kwadru la muru oi “Dhowananive tamanga.”)

¹² N’nga munaire a-vi akala mutoroma ona ira malobelwinyu kai okumela vathi varima venango kamunosangalala na basa yolaleela ninga walelene? N’nga a-vi akala kamunosangalala mwaleringa Bibilya? Akala vyevi vitoroma uireelanivo vasogola vomala badiziwa, kamuthuulelenga ira Yohova uto-iya ukami-ani na zimwee. Ninga mutu o-olongomana, hora dhinango munooda chinja moda munodhivwela nyo. Akala mutoroma ona ira kamuna thindhi, muthuulelenga ifwanafwani-o ya rumuwi Paulo. Angalive ira anoodhilimbi-edha m’a-rela Yesu, anooidhiwa ira kai hora dhothene vevo vanairenga liye vyongo vinolavela manungwee. (Muleri 1 Akoritiyo 9:16, 17.) Liye aongile ira: “Angalive ira ndilabile mokanyi-edheya, ndilive namaing’anela movwelana na izo ina miyo.” Mumadhu enango ninooda onga ira Paulo ali osikimiza kwakwaneli-edha urumiwee mo-otukulela mwemo mwadhivwela liye.

¹³ Molandana na vyevi, nyo thitho kamurumeli-enga ira musakulenga vyoira votukulela mwemo munovwela nyo. Muvisikimizeli-enga irana vyongo vyofwanelela angalive ira kai vyevyo vinodhiveliwana nyo irana. Mwairangana vyongo vyofwanelela hora dhothene, munooda chinja mwemo munovivwela nyo. Mwadhowanave kaana ilemeelo yoiranga vyongo vyokuza lambela, vinodha ukami-ani dhowanave m’a-rela Yesu mwamala badiziwa. Thindhi linyu lom’labela Yohova linooda limbi-a thitho abali naarongolinyu.—1 At. 5:11.

“MUDHOWENAVE VIWESEDHA”

14. N’nga hora dhothene munofwanela irangan’ni, n’nga mwasiwa ngwan’ni? (2 Akoritiyo 13:5)

¹⁴ Vinodha kala vyokami-a akala mwamala badiziwa munodhowanave visakasaka. (Muleri 2 Akoritiyo 13:5.) Hora dhothene muonenga vyongo vinoira nyo vaingumi inyu ira muone akala munolobela dambo nlilothene, leri nofunjedha Bibilya, fwanyeya vamigumanoni thitho laba basa lolaleela. Muthuulelenga vyongo vinaire nyo ira musangalalenga na vyongo vyokuza lambela. Mofwanafwanani-a, muvifukenga vyofuka ninga vi: ‘N’nga ndinooda wandela atu enango makundo oroma a Bibilyani? N’nga vatokala vyongo vinango vinaire miyo ira ndisangalalenga na basa yolaleela? N’nga malobelwanga anokalecha okumela vathi varima thitho othonyi-edha ira ndinom’nyindela maningi Yohova? N’nga hora dhothene ndinofwanyeyecha vamigumanoni? N’nga ndinachinje vyongo viivi ira ndivuruwanenga mopwaseya thitho wakula vamigumanoni?’

15-16. N’nga munofunjedhavon’ni va vyongo viirile bali mwinango vokonda vyowesedha?

¹⁵ Munoira phama visakasaka moona rima ira muidhiwe vyofooka vinyu. Munooda vwechecha vyongo vyevi voona vyongo vyam’muireele bali mwinango dhinalee Robert. Liye aongile ira: “Ndangana vyawa 20, ndatoofwanya basa yeniyo yalaba miyo wa malambo oyeva. Dambo n’nango ndingaweruwile, sikana mwinango wenuo walabana i-yo vambo-i basa atoondiitanela waniwa. Liye atoondiwandela ira ninamakaleo okene thitho ninosangalala maningi. Voromavene ndatoonga myasa yovweya, mbwenye voi e-no ndatookonda voonga mwasee.” Robert atookonda vyowesedhavyo thitho atooira phama maningi. Mbwenye vasogolovee atoona ira angaodile ira phama maningi va vyevyo vyam’muireelevyo. Liye atoorumela ira: “Kandakondile mwakopolo thitho mombaranya ninga mwairile Yosefe vokonda vyongo vyevyo vyafuna mwadhi Potifara. (Mar. 39:7-9) Thitho ndatoodabwa ira vatoovira hora indendai ira ndikonde. Vyevi vyatoondikami-a ona ira ndafuneela limbi-a uxamwalanga na Yohova.”

¹⁶ Nyo thitho munooda ira phama visakasaka ninga mwemo mwairile Robert. angalive ira mutolimbanana vyowesedha vinangovyee, muvifukenga ira, ‘N’nga vatoovira hora indendai yoi a-vi ira ndikonde vyowesedhavyo?’ Akala mutoona ira vatokala vyongo vinango vinofuneela nyo chinja, kamufooke. Musangalalenga ira mutozindiyela yoruchiyo. Mulobelelenga mwasuo thitho muirenga vyongo vinaukami-eni ira mu-arelenga makundo a Yohova amakalelwee aphama.—Sal. 139:23, 24.

17. N’nga dhina la Yohova linokuziwa a-vi na vyevyo vagumanena Robert?

¹⁷ Vatokala yongo inango inafunjedhevo i-yo kumela va vyevyo vyam’muireele Robert. Liye atoodhowanave onga ira: “Ndingakondile dhowa waniwa wa sikanuo, liye atoondiwandela ira, ‘Utooda limbanana vyowesedha.’ Ndangam’fukile vyathapulela liye, atoondiwandela ira fwee mwinango wenuo voroma vene ali wa Mboni, atom’mwandela ira azombwe othene a Mboni ingumiiwa chainyengo, thitho anooda irana vyongo vyothakala akala vatofwanyeya ngari. Voi ee-no atom’mwandela fweuo ira awesedhe irana vyevyo na miyo. Ndatoosangalala maningi ndingaoni ira nditoiri-a ira dhina la Yohova lilemeziwe.”

18. N’nga mwamala badiziwa muli ofunechecha dhowanave irangan’ni? (Muone thitho kwadru loi “Myasa dhedho dhinaukami-eni.”)

¹⁸ Vahora yadhivelele nyo wa Yohova nobadiziwa, mwatoothonyi-edha ira munofuna cheni-a dhinalee masiki vyongo viruche moi a-vi. Yohova unoidhiwa nyarwa dhinogumanana nyo na vyowesedha vinolimbanana nyo. Liye unodha uraeli-ani namwasa odhilimbi-edha winyu kalave ororomeleya. Kamukaikelanga ira vo-indi-edha basa zimwee, Yohova unodha uva-ani kopolo yoirela vyongo vyevyo. (Luk. 11:11-13) Ee-no mokami-iwa na Yohova, munodha dhowanave m’a-rela Yesu mwamala badiziwa.