Udhivela wa Nlungu unodha kalavo modhowa nodhowa

1-2. N’nga Makristau manjinji tanogumanana nyarwa dhiivi?

MUFWANAFWANI-EDHE ira mutogwela barukuni mbwenye mutogumanana mabimbi akopolo. Mabimbao tanondunyedha barukulo wu nawu. Barukulo linolimba akala mutu utoimeli-a na nangula. Nanguluo unokami-a ira barukulo la-atukuleyenga namabimbi mbwenye lilimbe.

² Akala munogumanana yorucha ilukulu, munooda dhivwanga ninga muli mu barukuli. Munongo chinjachinja mwemo munodhivwela nyo. Hora dhinango munooda ona ira Yohova unoudhiveliwanani. Mbwenye hora dhinango munoroma kaikela akala Yohova unoona vyongo vinouirelani. Fwinyu unooda uwandelani madhu anaulimbi-eni vahora yoyeva. Amala munoroma kaikela okoka akala Yohova unoudhiveliwanani. Munoona thitho akala Yohova unouonani ira muli ofuneya. N’nga nangulinyu opipirisa unaukami-eni a-vi vahora yanyarwila? N’nga munaire a-vi ira mwa-akaikelenga nodhowanave roromela ira Yohova unoudhiveliwanani thitho ukami-ani?

3. N’nga madhu oi “udhivela ororomeleya” ava Salimo 31:7 na Salimo 136:1 anothapulela n’ni, mwasiwa ngwan’ni ninoonga ira Yohova ngunothonyi-edha maningi udhivela ororomeleya? (Muone thitho iruthiruthi.)

³ Yongo imbo-i inaukami-eni mwagumanana nyarwa, ndi thuulela udhivela ororomeleya wa Yohova. (Muleri Salimo 31:7; 136:1.) Madhu oi “udhivela ororomeleya” tanoonga vyaudhivela wakopolo wenuo mutu unathonyi-edhe liye wa mutu mwinango thitho unodhowanave m’thonyi-edha masiki viruche. Yohova ngwenuo unothonyi-edha udhivela ororomeleya maningi, kwaranya mutu uliwethene. Thitho Bibilya linoonga ira, liye utokaana “udhivela ororomeleya Maningi.” (Eki. 34:6, 7) Bibilya thitho linoonga ira Yohova ‘unothonyi-edha udhivela ororomeleya maningi waatu othene tanom’mwitana.’ (Sal. 86:5) N’nga malembala anoniwandela vyan’ni? Yohova kano-iya arumiwee ororomeleya. Thuulela ira Yohova ngororomeleya, unoukami-ani ira muvilele mwagumanana nyarwa dhinjinji.—Sal. 23:4.

MUTHUULELENGA IRA UDHIVELA WA YOHOVA NDILIMBO-I MWA MAKHUNDO OROMA A BIBILYANI

4. Muonge vifwanafwani-o vya makhundo oroma a Bibilyani, thitho muonge mwasee unoniiri-a ira naaroromele maningi.

⁴ Yongo inango inanikami-e ira nikaleve olimba rima nagumanangana nyarwa, ndithuulela ira likhundo loi Yohova unonidhiveliwana ndi limbo-i mwa makhundo oroma a Bibilyani. N’nga munothuulela n’ni mwavwa madhu oi “makhundo oroma a Bibilyani”? Venango munothuulela makhundo aimbarimbari afunjedhile nyo mu Madhu a Nlungu. Mwaifwanafwani-o, mwatoofunjedha ira dhina la Nlungu ndi Yohova, Yesu ndi Mwana Nlungu obaliwa ekhene, atu okwa katinoidhiwa yongo iliyothene thitho sogolou ilambo inodhakala Paradaizo thitho atu tanodhakala mwemo modhowa nodhowa. (Sal. 83:18; Nam. 9:5; Ju 3:16; Apk. 21:3, 4) Mungaromile roromela makhundo enala, kamwarumeli-idhe ira mutu uliwethene au-i-eni liroromela. Mwasiwa ngwan’ni? Namwasa oi mwatoidhiwa ira makhundo enala mbokhumela Bibilyani. Dhoweni nione mwemo idhiwa ira Yohova unonidhiveliwana ndi limbo-i mwa makhundo oroma a Bibilyani munanikami-edhe aliwa khumi-a mathuulelo oi Yohova kanoona venango khumbanyedha nyarwa dhedho dhinogumanana i-yo.

5. Muonge vyongo vinakami-e mutu ira akonde vyongo vyonama vinofunji-a marelijiau onama.

⁵ Mungaromile funjedha Bibilya, chini yaukami-idheni ira mu-iye roromela vyongo vyonama vinofunji-a mareligiau? Pyo-okaikeli-a ira mwanoofwanafwani-edha na vyafunjedha nyo mungali mureligiau linyu na vinofunji-a Bibilya. Kathuulelani ifwanafwani-o ila: Venango voroma mwathuulela ira Yesu ndi Nlungu Wakopolo dhothene. Mungadhowilenave funjedha Bibilya venango mwanoovifuka ira, N’nga vyafunji-iwile miyo vile ali vyaimbarimbari? Mungafunjedhile vinoonga Bibilya vamwasula, mwatoozindiyela ira Yesu kai Nlungu. Ee-no mwatoo-iya roromela vyevyo noroma roromela likhundo la Bibilyani loi, Yesu ndi “oroma baliwa va vyopanduchiwa vyothene” thitho “Mwana obaliwa ekhene wa Nlungu.” (Ako. 1:15; Ju. 3:18) Ee-no vyongo vyonama vinofunji-a mareligiau ‘vinokaatheya maningi rimani’ thitho vinokala vyorucha i-ya viroromela. Mbwenye mungafunjedhile imbarimbari, mwato-iya viroromela thitho kamwavithuuleleve okoka.—Afl. 3:13.

6. Mwasiwa ngwan’ni kaninokaikela ira “udhivela ororomeleya” wa Yohova unodha kalao modhowa nodhowa?

⁶ Ninooda ira vyolandana na vyairile i-yo vamwasa unofunji-a Bibilya oi Yohova unonidhiveliwana. Mwagumanana nyarwa, nokaikelanga ira Yohova kanoudhiveliwanani, mudhifukhenga ira, ‘n’nga ndinothuulela pama?’ Mufwanafwani-edhelenga vinokaikela nyo vyoi Yohova unoudhiveliwanani, na vinoonga lemba la Salimo 136:1 lelo linosogolela yofunjedha yei. Mwasiwa ngwan’ni Yohova unoonga ira udhivelee “ngororomeleya?” Mwasiwa ngwan’ni madhu oi “udhivelee ororomeleya unodha kalavo modhowa nodhowa” tatoweli-edhiwa fendo 26 mukapitululi? Ninga muonele i-yo, likhundo loi Yohova unothonyi-edha udhivela ororomeleya waatwee, tilimbo-i mwamakhundo oroma a Bibilyani anofwanela i-yo aroromela molandana na mwemo munororomela i-yo makhundo enango oroma a Bibilyani. Mathuulelo oi Yohova unouonani ira muli o-okaana basa thitho kamuli ofwanelela udhivelee, mbonama. Mukondenga vyonama vyevi ninga mwemo munokondelanyo mafunji-edho onama.

7. Muonge malemba enao anonisikimizeli-a ira Yohova unonidhiveliwana.

⁷ Bibilyani mutokala maumboni manjinji anothonyi-edha ira Yohova unonidhiveliwana. Mwaifwanafwani-o, Yesu atoowandela anamafunjedhe ira: “Muli ofuneya maningi kwaranya mbalame dhinjinji.” Yohova atooawandela atwee ira: ‘Ndinoulimbi-ani, mwaimbarimbari ndinoukami-ani, ndinou-indani mwakopolo nadhandha langa lodyana lalongomano.’ Maverswala tanoonga vyongo mosikimiza. Yesu kaonga ira munooda kala ufuneya maningi mwaimbarimbari Yohova kanoonga ira ‘ndinooda ukami-ani.’ Mbwenye unoonga ira: “Muli ofuneya maningi” thitho “mwaimbarimbari ndinoukami-ani.” Ee-no mwagumanana nyarwa kamukaikele ira Yohova unoukami-ani, malemba ninga enala tanoukami-ani dhivwa ira Yohova unoudhiveliwanani thitho sikimizela ira unoudhiveliwanani. Malembala tanoonga likhundo laimbarimbari. Nalobelanga wa Yohova nom’mwandela munodhivwela i-yo thitho thuulela modi-a malembala, ninooda onga madhu ali va 1 Juwau 4:16 oi: “I-yo ninoidhiwa thitho roromela ira Nlungu unonidhiveliwana.”a

8. N’nga munofwanela iran’ni akala hora dhinango munokaikelecha ira Yohova unoudhiveliwanani?

⁸ N’nga munaire a-vi akala munokaikela ira Yohova unoudhiveliwanani? Mufwanafwani-edhelenga mwemo munodhivwela nyo na vyongo vinoidhiwa nyo vyokuza Yohova. I-yo hora dhinango ninochinja moda munodhivwelecha i-yo. Mbwenye makhundo amalemba oi Yohova unonidhiveliwana, katinochinja. Kaikela ira Yohova unonidhiveliwana, ndipwaza kalelo nlukhulu la Yohova loi ndiudhivela.—1 Ju. 4:8.

MUTHUULELENGA MODI-A MWEMO “MUNOUDHIVELIWANANI YOHOVA”

9-10. N’nga Yesu aonga vyan’ni vevo vaongile liye ira “Babuo unoudhiveliwanani” va Juwau 16:26, 27? (Muone thitho iruthiruthi.)

⁹ Ninooda funjedha udhivela wa Yohova, nathuulela vyaawandela Yesu anamafunjedhee vyoi: “Babuo unoudhiveliwanani.” (Muleri Juwau 16:26, 27.) Yesu kaawandenle anamafunjedhee madhwala vofuna asangalali-a baa-i. Kathuulelani maversu enango ndulimu, Yesu a-anaonge maverswala ninooda ona mwemo anamafunjedhee mwadhivwela aliwa. Malomwe aongile mwasa unango oi ndi lobelo.

¹⁰ Yesu atooandela anamafunjedhee ira talobelenga dhela waliye a-kala ira tam’lobelelenga liye. Vyali vyofuneya maningi ira anamafunjedhee taidhiwe mwasa wen’na. Yesu angavenyathi-iwile, vinooneya ira anamafunjedhee tafuna ira tam’lobelelenga liye. Aliwa taona ira Yesu ali fwiwa. Namwasa oi tanooidhiwa ira Yesu anoadhiveliwana, tathuulela ira liye unongo avuruwana vovepa Yohova ira aakami-e. Mbwenye Yesu atooawandela ira katikaena mathuulelo enala. Mwasiwa ngwan’ni? Namwasa oi liye atoawandela ira: “Babuo unoudhiveliwanani.” Likhundo leli ndiikhundu ya makhundo oroma anofunji-a Bibilya vyokhuza lobelo. Kathuulelani mwemo likhundoli munoukhuzelani aliwa. Namwasa ofunjedha Bibilya mwatoom’mwidhiwa Yesu thitho mwatooroma m’dhiveliwana. (Ju. 14:21) Molandana na anamafunjedha oroma, nyo thitho munooda lobela mwairoromelo voidhiwa ira “Babuo unoudhiveliwanani.” Vahora iliyothene inolobela nyo wa Yohova, munothonyi-edha ira munororomela madhu enala.—1 Ju. 5:14.

MUZINDIELENGA VYONGO VINOUIRI-ANI KAIKELA AKALA YOHOVA UNOUDHIVELIWANANI

11. Mwasiwa ngwan’ni Satana unosangalala akala ninokaikela ira Yohova unonidhiveliwana?

¹¹ N’nga mbaani unoiri-a ira nikaikelenga ira Yohova kanonidhiveliwana? Venango munowakhula ira unoiri-a ngu Satana. Thitho vyevi pyaimbarimbari. Namanami-a unofuna “nikopa” thitho unosangalala aidhiwa ira ninokaikela akala Yohova unonidhiveliwana. (1 Pe. 5:8) Namwasa oi Nlungu unonidhiveliwana, atooniva-a yotuva ya khuto. Mbwenye Satana unofuna ira nidhionenga ira nili o-ofwanelela wachela yotuva yei. (Aeb. 2:9) N’nga mbaani unosangalala nakaikelenga ira Yohova kanonidhiveliwana? Ndi Satana. N’nga mbaani unasangalale akala nitofooka no-iya m’lambela Yohova? Ndi Satana. Satana unofuna ira nithuulelenga ira Yohova kanonidhiveliwana. Mbwenye vyevi kai vyaimbarimbari. Satanuo ngwa-anom’dhiveliwina Yohova. Thitho imbo-i mwandhila dhee “dhainyengo” ndi dhoi nidhivwenga ira Yohova kanonidhiveliwana thitho kanosangalala na-iyo. (Aef. 6:11) Nazindiela vyongo vinofuna ira mwidani-u namanami-a, ninooda ira vyongo vyothene vinaode i-yo ira “nim’runi-e.”—Yak. 4:7.

12-13. N’nga madao abaliwilena i-yo anoniiri-a a-vi ira nikaikelenga ira Yohova unonidhiveliwana?

¹² Vatokala yongo inango inaniiri-enga ira nikaikelenga ira Yohova kanonidhiveliwana. N’nga yongoyee chini? Mbamadao enao abaliwilena i-yo. (Sal. 51:5; Aro. 5:12) Madao tatoododomi-a uxamwali-u na Yohova. Madao tatoononga mathuulelwi-u, rimi-u, thitho tutuli-u.

¹³ Madao tatoododomi-a mwemo munodhivwela i-yo thitho tatooiri-a ira nidhiombenga landu, nidhikhumbanyedhenga, dhionanga ira kanili obareleya, thitho nikaengana manyadho. Mwemu ndi mwemo munodhivwela i-yo naira yodawa. Ninooda uvwa ee-no namwasa oi hora dhothene ninothuulela ira kanili olongomana, vyevyo pyo-iyana maningi namwanipanduchele Yohova. (Aro. 8:20, 21) Molandana na karo yopwa roda yoi kinaode tamanga ninga mwemo mwali aliwa yapamane, i-yo thitho namwasa oi nili o-olongomana kaninaode irana vyongo mwapama ninga mwemo mwafuna irelanga i-yo naakale olongomana. Pyo-odabwi-a ira hora dhinango, ninolimbanana mathuulelo oonanga ira Yohova kanonidhiveliwana. Vyongo ninga Vyevyi vyaireya, nithuulelenga ira Yohova ndi “Nlungu Nlukulu thitho Nlungu oopi-a. Mbwenye unothonyi-edha udhivela ororomeleya waatu anom’dhiveliwana nolokota malamulwee.”—Nee. 1:5.

14. N’nga thuulela vya khuto unanikami-e a-vi i-yachi kaikela ira Yohova unonidhiveliwana? (Aroma 5:8) (Muone thitho kwadru loi, “Muire polepole na ‘inyengo yakopolo ya madao’”)

¹⁴ Pyaimbarimbari ira hora dhinango ninooda dhiona ira nili ofwanelela dhiveliwiwa na Yohova. Mbwenye onga mwaimbarimbari i-yo atu kanili ofwanelela dhiveliwiwa na Yohova. Ngumwasee udhivelee ngwavakundu maningi. Yohova kaaromile nidhiveliwana namwasa oi i-yo natooira vyongo vinangovyee. Mbwenye namwasa oi Yohova unonidhiveliwana, atoovelela khuto ira madawi-u taleveleliwe. (1 Ju. 4:10) Muthuulelenga ira Yesu adhidhe dhavulumucha atu odawa a-kala olongomana. (Muleri Aroma 5:8.) Kavali mutu unaire yongo iliyothene mo-ododoma, thitho Yohova kanodedi-edhela ira niirenga vyongo mundhila yen’na. Navwechecha pama likhundo loi madao tanoniiri-a ira nikaikelenga ira Yohova kanonidhiveliwana, vinonikami-a ira niire yongo illiyothene ira nilimbanena mathuulelo enala.—Aro. 7:24, 25.

MUSAKULENGA KALAVE OROROMELEYA

15-16. N’nga kaninokaikela vyan’ni akala ninodhowanave kala ororomeleya wa Yohova n’nga mwasiwa ngwani?

¹⁵ Yohova unofuna ira niirenga vyongo mwazelu vokalave “ororomeleya wa liye.” (Dot. 30:19, 20) Nairangana vyevi, kaninokaikela ira Yohova unodha kala ororomeleya wa-iyo. (Muleri 2 Samueli 22:26.) Nadhowanave kala ororomeleya wa Yohova kaninokaikela ira Yohova unodha nikami-a vilela nyarwa dhothene dhinagumanena i-yo vaingumii-u.

¹⁶ Nitoona ira nitokaana myasa dhinjinji dhinanikami-e ira nikale olimba rima, nagumanana nyarwa va-eeni thitho sogolou. Ninoidhiwa ira Yohova unonidhiveliwana thitho unodhowanave nikami-a. Vyevi ndi vinofunji-a Bibilya. Nakaikelanga vyoi Yohova Unonidhiveliwana, nithuulelenga vyevyo vinoidhiwa i-yo vyokhuza udhivela wa Yohova, malo mothuulelanga mwemo munodhivwela i-yo vahoriyo. Ee-no dhoweni nidhowenave roromela vinoonga Bibilya vyoi udhivela ororomeleya wa Yohova unodha kalao modhowa nodhowa.