N’nga munaire a-vi ira malobelwinyu takalenga okumela vathi varima?

1-2. (a) Chini inaniimwanani-e m’mwadhelamo Yohova mwemo munodhivwela i-yo? (b) N’nga ninoidhiwa a-vi ira Yohova unovuruwana malobelwi-u moriya rima?

N’NGA hora dhinango munoona ira malobelwinyu anokalecha oweli-edha weli-edha, o-okumela vathi varima thitho ailemeelo? Akala ndi ee-no, kamulimwekene. Namwasa oi ninokalecha opingeya, hora dhinango ninolobelecha mogwandhela. Venango ninorucheya m’mwandhelamo Yohova mwemo munodhivwela i-yo namwasa odhionanga ira kanili ofwanelela onga na liye.

² Bibilya linoonga ira Yohova unoona ira yofuneya maningi kai madhu ano-indi-edha i-yo basa volobela, mbwenye ndi lobela mokhumela vathi varima. Liye unovwa “lobelo laatu opwaseya.” (Sal. 10:17) Thitho Yohova unovuruwana moriya rima madhu othene anoonga i-yo namwasa oi unonidhiveliwana maningi.—Sal. 139:1-3.

3. N’nga ninotapanya vyofuka viivi?

³ Ninooda difuka ira: Mwasiwa ngwan’ni ninofwanela lobelanga wa Yohova mothathuwa? N’nga ninanire a-vi ira malobelwi-u takalenga okumela vathi varima? N’nga malobelo aarumiwi a Yohova anofwanya i-yo Bibilyani ananikami-e a-vi ira nilobelenga mokumela vathi varima? N’nga ninaire a-vi akala nitosukwala maningi moi ninoimwanana m’mwadhelamo Yohova moda munodhivwela i-yo? Dhoweni nione vyowakhula vya vyofuka vyevi.

MULOBELENGA WA YOHOVA MOLIMBA RIMA

4. N’nga chini inanikami-e ira nilobelenga wa Yohova molimba rima? (Salimo 119:145)

⁴ Navwechecha ira Yohova ndi fwi-u ororomeleya wenuo unofuna ira vyongo viniwendhelenga pama, Ninolobela wa liye molimba rima. Ifwanafwani-o vamwasula ndi mulimbo lemba bukhu la Salimo 119 liye aona ira Yohova ali xamwalee ororomeleya. liye atoogumanana nyarwa dhinjinji vaingumiyee. Atu enango tanoom’mongela madhu othakala. (Sal. 119:23, 69, 78) Anoosukwala thitho namwasa wa vyongo vyadawi-a liye. (Sal. 119:5) Angalive vyali ee-no, liye kaaova m’mwadhelamo Yohova moda mwavivwela liye.—Muleri Salimo 119:145.

5. Mwasiwa ngwan’ni kaninofwanela rumeli-a mathuulelo anoniiri-a fooka aniimwanani-e lobela wa Yohova? Muonge ifwanafwani-o.

⁵ Yohova unofuna ira masiki atu tairile yodawa ilukulu talobelenga wa liye. (Esa. 55:6, 7) Ee-no kanirumeli-e ira mathuulelo anoniiri-a fooka aniimwanani-e lobela. Mwaifwanafwani-o, mulimbo wendi-a ndheka unoidhiwa ira unooda ongi-ana naatu anoing’anela moda munowendhela ndeka afuna kami-o. N’nga liye unoimwanana vepa kami-o akala ira utodimela venango dodomi-a vyongo vinangovyee namwasa wa manyadho? Kabe. Mofwanafwana na vyevi, i-yo thitho hora dhinango nadimela venango ira vyodawa, ninooda lobela wa Yohova molimba rima.—Sal. 119:25, 176.

N’NGA NINAIRE A-VI IRA MALOBELWI-U TAKALENGA OKUMELA VATHI VARIMA?

6-7. N’nga thuulela vya makalelo a Yohova unanikami-e a-vi ira malobelwi-u takalenga okumela vathi varima? Muonge ifwanfwani-o. (Muone thitho madhu achindo.)

⁶ Ira malobelwi-u takalenga okumela vathi varima, niongenga na Yohova mothathuwa nim’mwandelenga vyongo vili rimanimwi-u thitho mwemo munodhivwela i-yo. N’nga ninaire a-vi ira nilobelenga mundhila yen’na?

⁷ Muthuulelenga makalelo a Yohova.a Nathuulelanga maningi vya makalelo a Yohova, paevo thitho vanakale i-yo othathuwa m’mwandelamo Yohova mwemo munodhivwela i-yo. (Sal. 145:8, 9, 18) Kathuulelani ifwanafwani-o ya rongola Kristine, oi babee ali wauwalanga. Liye aongile ira: “Kavyali vyokweya ira ndiongenga na Yohova ninga babanga. Ndaona ira Yohova kaandidiveliwana namwasa wa vyongo vyadawi-a miyo.” N’nga ndi kalelo livi la Yohova lam’kami-idhe? Liye aongile ira: “Udhivela ororomeleya wa Yohova unondikami-a ona ira ndili obareleya. Nditoidhiwa ira liye kanodha i-ya ndikami-a. Masiki ndidawi-e vyongo vinango, liye unodhowanave ndidhiveliwana thitho ndikami-a. Vyevi vinondikami-a ira ndikalenga othathuwa m’mwandela vyongo vindisangalali-idhe thitho na vyongo vinondisukwali-a.”

8-9. N’nga thuulela vyongo vinofuna i-yo onga una upama oi a-vi? Muonge ifwanafwani-o.

⁸ Muthuulelenga vyongo vinofuna nyo onga. Mwa-analobele munofwanela ndifuka vyofuka ninga vi: ‘N’nga ndi nyarwa dhivi dhinogumanana miyo va-eeni? N’nga vatokala mutu unofwanela miyo m’levelela? N’nga vatokala yongo ichinjile vaingumiyanga yeniyo inofuna miyo ira Yohova andikami-e?’ (2Ma. 19:15-19) Ninooda thitho sazi-edha lobelo laifwanafwani-o la Yesu, mothuulela vyongo vinavepe i-yo Yohova voonga dhinale na vyongo vinofuna liye.—Mat. 6:9, 10.

⁹ Rongola mwinango dhinalee Aliska angaidhi ira mam’ne utokaana marenda a kansa muugogoni thitho angaidhi ira kanoila vyanom’rucha ira alobele. Liye aongile ira: “Ndatoosukwala maningi moi vyanoondirucha thuulela madhu oi ndionge ndalobelanga.” N’nga chini yam’kami-idhe? Liye aongile ira: “Nda-analobele ndaroma thuulela vyongo vyafuna miyo m’mwandela Yohova. Vyatoondikami-a ira nda-aongenga vyofuna vyanga baa-i. Vyevi vyatooiri-a ira rimanga ukurudheye thitho ira mathuulelwanga akaatheye ndalobelanga.”

10. Mwasiwa ngwan’ni nonofwanela lobela wahora indendai? (Muone thitho iruthiruthi.)

¹⁰ Mulobelenga wahora indendai. Pyaimbarimbari ira ninooda lobela, lobelo lokwivela, mbwenye nalobelanga malobelo olapela ninokaana ngari yom’mwandelamo Yohova vyongo vinothuulela i-yo thitho mwemo munovivwela i-yo.b Man’ne Aliska’s dhinalee Elijah aongile ira: “Ndinolobela fendo dhinjinji vadambo thitho vinondikami-a ira ndikale va uxamwali olimba na Yohova namwasa oi ndinokaana hora yoi ndilobele. Yohova kanoona ira ndinodhimbela ndalobelanga ee-no ndinolobela wa liye wahora yolapela.” Muwesedhe irana vyevi: Mukaengana hora na limburo lapama vanofunanga nyo lobela. Venango munooda onga mogweli-a madhu mo-ododomi-iwa thitho mukaena ilemeelo yolobelanga malobelo olapela.

MUTHUULELENGA MALOBELO OKUMELA VATHI VARIMA ENAO ALEMBIWILE BIBILYANI

11. N’nga thuulela malobelo okumela vathi varima enao alembiwile Bibilyani unonikami-a a-vi? (Muone thitho kwadru loi “N’nga mwatooroma gumanana vyongo ninga vyaguman’nena arumiwi andulimu?”)

¹¹ Thuulela malobelo aarumiwi a Yohova anoongiwa Bibillyani, thitho nyumbo dhiwa unonikami-a maningi. Mwathuulela vyongo vyawandenle aliwa Yohova mokumela vathi varima, vinooda ukami-ani ira mulobelenga mundila ninga yen’na. Malobelwiwa anonikami-a fwanya madhu apama enao anaonge i-yo volobela. Thitho munodha fwanya malobelo olandana na vinowuireelani vaingumi inyu

12. N’nga ninooda difuka vyofuka vyoi a-vi nathuulelanga malobelo enao alembiwile Bibilyani?

¹² Mwathuulelanga malobelo enao alembiwile Bibilyani, mudhifukenga ira: ‘N’nga baani uongile madhu enala? N’nga agumanana vyongo vyoi a-vi? N’nga vyongo viongile liyevi ndivimbo-ive na vinondireela? N’nga ndinofunjedhavon’ni?’ Munofwanela sakasaka mofwanelela vyowakula vya vyofukavi thitho munoganyali maningi. Dhoweni nitapanyeni vifwanafwani-o vingaasi.

13. N’nga ninofunjedhavon’ni va lobelo la Hana (1 Samueli 1:10, 11) (Muone thitho yavakapani.)

¹³ Muleri 1 Samueli 1:10, 11. Vahora yalobela Hana lobeloli, agumanana nyarwa mbili dhilukulu. Liye ali o-obala thitho kasibee anom’ruchi-a maningi. (1Sa. 1:4-7) Akala munogumanana nyarwa dhinango n’nga munofunjedhavon’ni na lobelo la Hana? Hana atoolobela wa Yohova wahora yolapela thitho atom’mwandhela Yohova vyongo vyothene vyam’sukwali-a ee-no atooluluveliwa. (1Sa. 1:12, 18) Na-iyene thitho ninooda luluveliwa akala ira “ninom’rulela Yohova vyokumbanya vi-u” vom’mwandela moda munovivwela i-yo va vyongo vinango vyorucha vinogumanana i-yo.—Sal. 55:22.

14. (a) N’nga ndivyongo viivi vinafunjedhe i-yo wa Hana? (b) N’nga thuulela modi-a madhu a Nlungu unanikami-e a-vi ira nikaena vyongo vyoonga mulobelo li-u? (Muone madhu achindo.)

¹⁴ Vangavirile hora Samueli angabaliwile, Hana atoom’dowane wa Eli wenuo ali ndimuwa waalimbo velela sembe. (1Sa. 1:24-28) Namwasa wa lobelolee lokumela vathi varima, Hana atom’simba Yohova namwasa obarela nosamalela arumiwee ororomeleya. c (1Sa. 2:1, 8, 9) Nyarwadhee kadhamanle mbwenye Hana athuulela maningi mwemo Yohova mwam’raeli-idhe liye. N’nga ninofunjedhavon’ni? Ninooda vilela vyarwa dhinogumanana i-yo nathuulela monda munonikami-edhela Yohova fiyedha va-eeni.

15. N’nga ninofunjedhavon’ni valobelo la namaongela Jeremiya nagumanana vyongo vyo-olongomana? (Jeremiya 12:1)

¹⁵ Muleri Jeremiya 12:1. Vahora inango namaongela Jeremiya, atoosukwala angaoni ira atu othakala vyongo vyanoawendela pama thitho namwasa wa vyongo vyam’mwirela Aisraeli afwee. (Jer. 20:7, 8) Ninooda vwechecha vyongo vyevi nathuulela mwemo munodhivwela i-yo naona atu othakala vyongo viawendelanga pama thitho taninyozanga. Angalive ira Jeremiya atoonga mwemo mwadhivwela liye, kaaombile Nlungu landu namwasa wa vyongo vyo-olongomana vyaireya. Angaoni ilango yavelenle Yohova waatu opanduwa, Jeremiya atooroma m’roromela maningi Yohova wenuo ngwalongomano. (Jer. 32:19) I-yo thitho ninooda m’mwandela Yohova mothathuwa mwemo munodhivwela i-yo, nororomelanga ira vahora yofwanelela Yohova unodha saka-edha vyongo vyothene vyo-okaana longomano.

16. Akala ninoona ira kaninaode irana vyongo vinango, N’nga ninafunjedhevon’ni wa levi wenuo ali udhaari? (Salimo 42:1-4.) (Muone thitho iruthiruthi.)

¹⁶ Muleri Salimo 42:1-4. Nyumbwila yalembiwile na Mulevi mwinango wenuo ali udhaari thitho kataoda lambela vambo-i na Aisraeli afwee. Nyumbwila, inothonyi-edha mwemo mwadhivwela liye. Ninooda dhivwa ninga mwemo mwadhivwela Levi ula akala ninoimwanana kuma vandhe vi-u venango akala nili perezoni. Ninooda dhivwa mo-iyana i-yana mbwenye mulimothene munakalele vyongo nim’mwandelenga Yohova. Vyevi vinooda nikami-a ira nirome thuulela pama thitho ona vyongo mofwanelela. Mwaifwanafwani-o, Levi ula atoona thitho ira unooda m’titimi-a Yohova mundhila dho-iyana i-yana. (Sal. 42:5) Anoothuulela thitho mwemo mwam’kami-edhela Yohova. (Sal. 42:8) Lobela wa Yohova mokumela vathi varima unonikami-a ira niidhiwe mwemo munodhivwela i-yo, noroma okoka ona vyongo mofwanelela thitho fwanya kopolo ira nivilele va nyarwa dhi-u.

17 (a) N’nga ninofunjedhavon’ni valobelo la namaongela Yona (Yona 2:1, 2.) (b) Madhu enango oongiwa mu nyumbo ya bukhu la Salimo ananikami-e a-vi nagumanana nyarwa? (Munone thitho madhu achindo.)

¹⁷ Muleri Yona 2:1, 2. Namaongela Yona atoolobela angali mbani mwa somba ilukulu. Angalive ira vahoriyo Yona kam’vwele Yohova, liye kaakaikela ira Yohova unovwa lobelolee. Volobela, Yona atoo-indi-edha basa madhu manjinji enao ali munyumbo la bukhu la Salimo.d Mo-okaikela, liye anoodiidiwa pama nyumbo dhedhi. Ee-no vothuulela nyumbodhi, watom’sikimizeli-a ira Yohova unom’kami-a. Na-iyene thitho nilokotenga maverso enango a Bibilyani, nowathuulelanga ira tanikami-e nalobelanga wa Yohova vahora inogumanana i-yo nyarwa.

LOBELA UNONIKAMI-A IRA NIKALE VAUXAMWALI WAPAMA NA YOHOVA

18-19. N’nga hora dhinango vinonirucha onga mwemo munodhivwela i-yo nalobelanga, N’nga lemba la Aroma. 8:26, 27 linanikami-e a-vi? Muonge ifwanafwani-o.

¹⁸ Muleri Aroma 8:26, 27. Hora dhinango ninokala okumbanya maningi moi ninoimwanana m’mwandelamo Yohova moda munodhivwela i-yo. Mbwenye vahora ninga yen’na, zimu ochena wa Nlungu “unonisembezela” malo mwaatu. N’nga unoirana a-vi vyevi? Vo-indi-edha basa zimu ochena, Yohova atookami-a atu enao talembile Bibilya ira talembe malobelo manjinji. Naimwanangana onga pama mwemo munodhivwela i-yo, Yohova uno-indi-edha basa pama vyongo vilembiwile mumalobelwala, akala malobelwao unofuna vepa ndi i-yo liye unowakula.

¹⁹ Likhundo leli latookami-a rongola mwinango wau Rusiya ndhinalee Yelena. Liye atoomangiwa namwasa olobela thitho leri Bibilya. Yelena anoodhikhumbanyedha maningi moi anoorucheya lobela. Liye aongile ira: “Ndatoothuulela ira akala nditosukwala maningi noimwanana lobela, Yohova unoona malobelo aarumiwee enao alembiwile Bibilyani . . . Ninga malobelo afuna miyo lobela. . . . Vyevi vyatoondikami-a maningi vahora yoruchila.”

20. N’nga chini inaukami-eni ira muodenga lobela mwasukwala?

²⁰ Nasukwala ninoroma thuulela vyongo vinango vahora inolobela i-yo. Ira mathuulelwi-u takaatheye, ninooda leri venango vuruwana nyumbo dhinofwanyeya mubukhu la Salimo. Mofwanafwana na mwene Davide i-yo thitho ninooda lemba mwemo munodhivwela i-yo. (Sal. 18, 34, 142; namadhu avadhulu.) Mwaimbarimbari kavali lamulo linofwanela i-yo arela nakozeelanga lobela. (Sal. 141:2) Muirengana vyongo vinoona nyo ira vinooda ukhami-ani.

21. Mwasiwa ngwan’ni ninofwanela lobelanga na rima othene?

²¹ Pyolimbi-a idhiwa ira Yohova unovwechecha mwemo munodhivwela i-yo masiki na-am’mwandhele yongo iliyothene. (Sal. 139:4) Mbwenye Yohova unosangalala naonga madhu othonyi-edha ira ninom’nyidhela. Ee-no kamuvwalavwali-enga lobela wa Babinyu wadhulu. Ninooda thitho i-ndi-edha basa madhu anofwanyeya mumalobelo a Bibilyani. Mulobelenga na rima wethene. Mum’mwandelenga Yohova vyongo vinousangalali-ani thitho vyongo vinoukumbanyi-ani. Voi Yohova ndi fwi-u wavarimani, liye unoda ukami-ani hora dhothene!