N’nga dhina la Yohova ndilofuneya maningi wa Yesu?

1-2. (a) N’nga Yesu airile n’ni anga-adhi vang’ono ira aphiwe? (b) N’nga ninotapanya vyofuka viivi muyofunjedha yen’na?

YA-ANAFIYE maulo va chinayi, Nisani 14 yawa ya 33 K.A.B., Yesu anga-adhi vang’ono funa veleliwa, tongiwa, oni-iwa nyarwa thitho phiwa. Liye naarumiwee ororomeleya tali tangamari-idhe wene udya yodya ya na maulo wu kwartu ladhulu ya nyumba inango. Tangamari-idhe udya yodya yavakhudwila, Yesu atoovelela malangi-o omari-a owakozeli-edha nowalimbi-a arumiwee. Anga-adhi vang’ono funa khuma, Yesu atooimela vahora yoyeva noroma lobela mosembezela maningi vambo-i naaliwa. Rumiwi Juwau tatoolemba lobeloli thitho ninooda lifwanya va Juwau kapitulu 17.

² N’nga lobelo la Yesu linothonyi-edha ira liye anoovikhumbanyedha maningi vya n’ni? N’nga lobeloli linothonyi-edha ira chini yali yofuneya maningi wa liye vahora yothene ya urumiwee? Dhoweni nitapanyeni vyowakhula vya vyofuka vyevi.

“NDITOIRI-A IRA ALIWA AIDHIWE DHINA LINYU”

3. N’nga Yesu aongile n’ni vyokhuza dhina la Yohova, n’nga athapulela n’ni? (Juwau 17:6, 26)

³ Mulobelolee, Yesu aongile ira: “Miyo nditoiri-a ira aliwa taidhiwe dhina linyu.” (Muleri Juwau 17:6, 26.) Fendo mbilidhene liye atoonga ira atoidhiwi-a dhinalo waanamafunjedhee. N’nga Yesu athapulelan’ni? N’nga athapulela ira atowaidhiwi-a dhina loi aliwa kataliidhiwa? Anamafunjedha a Yesu tali Ayuda, ee-no tatooidhiwa wale ira dhina la Nlungu ndi Yohova. Dhina leli lanoofwanyeya fendo unjinjiwene mu Malemba Aiebere. Ee-no Yesu kaathapulela aidhiwi-a dhina la Nlungu, malomwee aonga vyongo vyathapulela dhinalo. Yesu atoofunji-a anamafunjedhee m’mwidhiwa pama Yohova, idhiwa vifunelovyee, vyoiravyee thitho makalelwee. Ndi Yesu baa-i wenuo angaodile funji-a pama vyongo vyothene vyevi namwasa oi utom’mwidhiwa pama Yohova kwaranya mutu uliwethene.

4-5. (a) N’nga idhiwa dhina la mutu unothapulela n’ni? Muone ifwanafwani-o. (b) N’nga anamafunjedha a Yesu taidhiwa dhina la Yohova mundhila dhiivi?

⁴ Nifwanafwani-edhe ira m’mbo-i mwaandimuwa avapingoni mwinyu dhinalee ndi Davide, liye thitho ndi ifirimero oira operasau. Mutom’mwidhiwa wa vyawa vinjinji. Ee-no dambo n’nango mwatoobulela mo-odedi-edhela thitho mwatootamangela ximitari weo unolabecha baluo basa. Baluo uno-indi-edha basa dodolisolee ira avulumuche ingumiinyu. Khumela va dambo lelo chini inadhenga mathuulelonimwinyu mwavwa dhina la baluo? Kaiira ndibali um’mwidhi nyo baa-i, mbwenye ndi ifirimero avulumuchile ingumiinyu.

⁵ Mofwanafwana na vyevi, anamafunjedha a Yesu tali tangaidhiwile wale dhina la Nlungu. Mbwenye dhinila lalilofuneya maningi waaliwa namwasa oi dhela mwa Yesu, tatoofiya vom’mwidhiwa pama Yohova. Mwasiwa ngwan’ni ninoonga ee-no? Namwasa oi vyongo vyaonga Yesu thitho irana vyanoothonyi-edha pama makalelo a Babee. Ee-no, anamafunjedhao tatoom’mwidhiwa “pama” Yohova vovwechecha ndhila dhafunji-a liye thitho na mwemo mwairela liye vyongo naatu.—Ju. 14:9; 17:3.

“NDHINA LINDIVA-IDHE NYO”

6. N’nga Yohova avelenle dhinalee wa Yesu mundhila yoi a-vi? (Juwau 17:11, 12)

⁶ Yesu atoolobela anamafunjedhee ira: “Mwaaing’anele namwasa wa dhina lindiva-idhe nyo.” (Muleri Juwau 17:11, 12.) N’nga vyevi vinothapulela ira Yesu unofwanela idhiweyana dhina loi Yohova? Kabe. Muone ira valobeloli Yesu atoonga dhina loi Yohova ira “dhina linyu.” Ee-no vinoonelatu ira Yesu katukhunle dhina la Yohova kala dhinalee. N’nga Yesu athapulelan’ni vevo vaonga ira Nlungu unom’va-a dhinalee? Yoroma, thuulelani ira Yesu anom’mwimelela Yohova thitho anoonga malo mwa liye. Liye atoodha mudhina la Babee thitho atooira vyongo vyakopolo mudhinaleli. (Ju. 5:43; 10:25 ) Wenjedhela vevo dhina loi Yesu linothapulela ira “Yohova ndi namavulumucha.” Ee-no dhina la Nlungu ndi lovwelana maningi na dhina la Yesu.

7. Muonge ifwanafwani-o yothonyi-edha ira Yesu anoonga dhina la Yohova.

⁷ Nifwanafwani-edhele vyevi na oimelela ilambo. Liye unoimelela namaing’anela wailambo. Vyongo vinaonge wanambilula, vinokala vyakopolo vyolandana na vinaonge unowasogolela. Molandana na vyevi, Yesu unoimelela Yohova thitho anoonga naatu mudhina la Yohova.—Mat. 21:9; Luk. 13:35.

8. N’nga dhina la Yohova lali “mwa” Yesu mundhila yoi a-vi a-anadhe vailambo yavathila? (Ekisodo 23:20, 21)

⁸ Vaizoyee ninga madhu, Yesu ukadhi am’labelanga Yohova ninga om’mwimelela vovelela milanyu thitho malangi-o waangelo na waatu. (Ju. 1:1-3) Vinooneya ira Yesu ali ngelo wenuo arumiwile na Yohova ira amasamalele Aisaraeli vyali aliwa u-runi. Vowandela Aisaraeli ira tam’vwele ngeluo Yohova aongile ira: “Dhina langa ili mwa liye.”a (Muleri Ekisodo 23:20, 21) Dhina la Yohova lali “mwa” Yesu namwasa oi liye aimelela Yohova thitho ngwenuo alilemeza maningi nocheni-a dhina la Babee.

“BABA, LEMEZANI DHINA LINYU”

9. N’nga dhina la Yohova lali lofuneya a-vi wa Yesu? Muongemo.

⁹ Ninga muonele i-yo wale, dhina la Yohova lali lofuneya maningi wa Yesu masiki a-anadhe vailambo yavathila. Ngumwasee vahora yali liye vailambo yavathila, vyongo vyothene vyaira Yesu vyanoothonyi-edha ira dhina la Yohova lali lofuneya maningi wa liye. Komoni waurumiwee Yesu atoolobela ira: “Baba mulemeze dhina linyu.” Vahora yeniyo, Babee atoowakhula na madhu akopolo khumela dhulu ira: “Mwakopolo maningi, enao tavweile ninga gudha wa dhongwe. Yohova aongile ira: “Nditolilemeza thitho ndinodha lilemeza okoka.”—Ju. 12:28.

10-11. (a) N’nga Yesu alemezile a-vi dhina la Yohova? (Muone thitho iruthiruthi.) (b) Mwasiwa ngwan’ni dhina la Yohova linofwanela cheni-iwa?

¹⁰ Naliyene thitho Yesu, atoolemeza dhina la Babee. N’nga airilena a-vi vyevi? Ndhila imbo-i yali wandela atu enango vyokhuza makalelo na vyoira vya Babee. Naliyene thitho atooira vyongo vinjinji volemeza dhinali. Dhina la Yohova thitho limbililee lanoofwanela cheni-iwa.b Yesu atoothonyi-edha funeya oira vyongo vyevi vahora yafunji-a liye anamafunjedhee ira talobelenga ira: “Babi-u wa dhulu, dhina linyu licheni-iwe.”—Mat. 6:9.

¹¹ Mwasiwa ngwan’ni dhina la Yohova lanoofwanela cheni-iwa? Namwasa oi mundani mwa Edeni, Satana Namanami-a atoonyoza thitho onga vyonama vyokhuza Yohova Nlungu. Liye aongile ira Yohova ngonama thitho anom’mana Adamu na Eva vyongo vyapama. (Mar. 3:1-5) Voonga vyevi, Satana atoothonyi-edha ira Yohova kanoiravo yongo mundhila yofwanelela. Vyonama vya Satanavi vyatoothakali-a limbili la Yohova, venango ira dhinalee. Ee-no muhora ya Yobo, Satana atoonga ira atu anom’labela Yohova namwasa wa vyongo vyapama vyevyo vyaairele liye. Ngelo onamula atoothonyi-edha thitho ira kavali mutu wenuo unam’dhiveliwena Yohova moi unooda m’labelangave agumanangana nyarwa. (Yob. 1:9-11; 2:4) Ee-no vanoofuneela hora yokwakwanela ira viidiweye ira onama mbaani vari va Yohova na Satana.

“NDINOVELELA INGUMI YANGA”

12. N’nga Yesu ali ofunechecha iran’ni namwasa odhiveliwana dhina la Yohova?

¹² Voi anoom’dhiveliwana Yohova, Yesu anoofunechecha irana yongo iliyothene inaode liye ira acheni-e dhina la Babee. Liye aongile ira: “Ndhinovelela ingumiyanga.” (Ju. 10:17, 18) Vyevi vinothonyi-edha liye ali okozeya kwela dhina la Yohova.c Adamu na Eva enao tali olongomana katavwele Yohova thiho tatoosakula kala wuikhundu ya Satana. Mo-iyana naatu ambilala, Yesu ali ofunechecha udha vailambo yavathi dhathonyi-edha ira unom’dhiveliwana Yohova. Liye atooira vyevi vom’vwela Yohova va vyongo vyothene. (Aeb. 4:15; 5:7-10) Liye atookalave ororomeleya fiyedha wukwa opha maningi va muri oonelavo nyarwa. (Aeb. 12:2) Moirana vyongo vyevi, atoothonyi-edha ira unom’dhiveliwana Yohova na dhinalee.

13. Mwasiwa ngwan’ni Yesu ali okhozeya idhiwi-a ira Satana ngonama? (Muone thitho iruthiruthi.)

¹³ Va vyongo vyothene vyaira liye, Yesu anoothonyi-edha ira Satana ngonama, a-kala Yohova. (Ju. 8:44) Yesu atoom’mwidhiwa pama Yohova kwaranya mutu uliwethene. Aakale ira vyongo vyaonga Satana vom’monga Yohova vyali vyaimbarimbari, Yesu angaidhiweletu vyevi. Mbwenye Yesu atoosikimizelatu ira unodha cheni-a dhina la Yohova thitho limbililee namwasa oi anooidhiwa ira vyongo vyaonga Satana, vyali vyonama. Angalive ira vyaoneya ninga Yohova utom’iya, Yesu ali ofunechecha wukwa angalive ororomeleya malo mo-iya m’vwela Babee.—Mat. 27:46.d

“NDITOMARI-A . . . LABA BASA YANDIVA-IDHE NYO”

14. N’nga Yohova araeli-idhe moi a-vi Yesu namwasa okhalave ororomeleya?

¹⁴ Lobelo lavelenle liye, vadambo la-adhi liye vang’ono wukwa, Yesu aongile ira: “Nditomari-a laba basa yandiva-idhe nyo.” Liye anoororomela ira Yohova unodha um’va-a yotuva namwasa okalave ororomeleya. (Ju. 17:4, 5) Thitho Babee kaam’nami-idhe. Yohova karumeli-idhe ira liye akaleve masiyeni. (May. 2:23, 24) Atoom’venyathi-a thitho atoom’va-a izo ilukhulu dhulu. (Afl. 2:8, 9) Vamamari-edhovee, Yesu atooroma tonga ninga Mwene ya Umwene wa Nlungu. N’nga Umwenula unodha iran’ni? Ikhundu yanambili ya lobelo yaifwanafwani-o yairile liye, Yesu aongile ira: “Umweninyu udhe. Ifunelwinyu iireye vailambo yavathivano ninga mwemo muli aliwa dhulu.”—Mat. 6:10.

15. N’nga Yesu unodha ira vyongo vyoi a-vi?

¹⁵ Vachineneeva, Yesu unodha khoma khondo yolimbanana amwidani a Nlungu thitho nonga vyongo vyothene vyothakala va khondo ya Armagedo. (Apk. 16:14, 16; 19:11-16) Vasogolovee unodha m’ponya Satana ‘lindini’ moi kanaode iranga yongo iliyothene. (Apk. 20:1-3) Ee-no Yesu unodha weli-edha rendele thitho kami-a atu ira takhale ovwelana muitongi wa vyawa 1.000. Liye unodha venyathi-a atu okwa thitho saka-edha ilambwila ira ikhale okoka paradaizo. Veva ifunelo ya Yohova inodha khala ingamadhi kwakwaneli-edhiwa!—Apk. 21:1-4.

16. Chini inofuna dhaireya vofiya komoni wautongi wa vyawa 1.000?

¹⁶ N’nga vyongo vinodha khala a-vi vofiya komoni wautongi wa vyawa 1.000? Vyodawa vinodha khala vingamaleletu. Atu katinofuneela thitho vepha ira taleveleliwe dhela mu sembe ya khuto. Khatinodha funeela thitho muto vowasogolela vovelela sembe. ‘wukwa [wadhidhe namwasa wa Adamu,] wenuo ndi mwidani omari-a, unodha khala ungamaleletu.’ Vahora yeniyo atu okwa anodha khala tangavenyathi-iwile thitho atu othene vailambo yavathi tanodha khala olongomana.—1 Ak. 15:25, 26.

17-18. (a) N’nga chini inofuna ireya komoni wautongi wa vyawa 1.000? (b) N’nga Yesu unodha iran’ni hora yautongee yamala? (1 Akoritiyo 15:24, 28) (Muone thitho iruthiruthi.)

¹⁷ Chini inofuna dhaireya thitho komoni wautongi wa vyawa 1.000? Vahora yeniyo vanodha ireya yongo yavakhundu maningi. Mwasa okhuza cheni-iwa wa dhina la Yohova unodha khala ungamadhi. Mwasiwa ngwan’ni ninoonga e-no? Kathuulelani ira mudani mwa Edeni, Satana aongile ira Yohova ngonama thitho kanotonga atu mwaudhivela. Khumela vahora yeniyo, atu enao anom’dhiveliwana thitho m’lemeza takadhi tacheni-anga dhinalee. Limbililee likadhi licheni-iwanga. Yohova ukadhi athonyi-edhanga ira ndi Baba waudhivela.

¹⁸ Vamamari-edhovee, vyongo vyothene vinoonga Satana vyokhuza Yohova vinodha idhiweya ira vyali vyonama. N’nga Yesu unodha iran’ni horee yadhamala? Liye kanodha dhimbinuwela utongi wa Yohova ninga mwemo mwairile Satana. (Muleri 1 Akoritiyo 15:24, 28.) Yesu unodha weli-edha Umwene wa Babee. Liye unodha vwela utongi wa Yohova. Mo-iyana na Satana, Yesu ngokhozeya irana vyevi namwasa oi liye unom’dhiveliwana maningi Yohova.

19. N’nga dhina la Yohova ndi lofuneya moi a-vi wa Yesu?

¹⁹ Yohova ali ofunechecha velela dhinalee wa Yesu. Yesu atoothonyi-edha pama maningi mwemo muli Babee. N’nga dhina la Yohova ndi lifuneya moi a-vi wa Yesu? Ndi lofuneya maningi kwaranya yongo iliyothene. Liye ali ofunechecha namwasa wa dhinali thitho ali okhozeya dhakwakwaneli-edha yongo iliyothene wa Yohova vasogolo vautongi wa vyawa 1.000. N’nga ninam’sazi-edhe a-vi Yesu? Ninodha tapanya yowakhula ya yofuka yei muyofunjedha yo-arela.