Mokanda ya liboso ya Samwele
27 Nzokande, Davidi alobaki na motema na ye: “Mokolo mosusu Saulo akoboma ngai. Likambo ya malamu oyo nasengeli kosala ezali nde kokima+ na mokili ya Bafilistia. Boye, Saulo akotika koluka ngai na teritware mobimba ya Yisraele,+ mpe nakobika na lobɔkɔ na ye.” 2 Bongo Davidi ná mibali 600+ oyo bazalaki elongo na ye batɛlɛmaki mpe bakendaki epai ya Akishe+ mwana ya Maoke, mokonzi ya Gate. 3 Davidi ná bato na ye bafandaki elongo na Akishe na Gate; mobali mokomoko azalaki elongo na libota na ye. Davidi azalaki elongo na basi na ye mibale: Ahinoame+ moto ya engumba Yizireele mpe Abigaile,+ moto ya engumba Karamele, oyo azalaki mwasi ya Nabale. 4 Ntango bayebisaki Saulo ete Davidi akimi na Gate, atikaki koluka ye.+
5 Na nsima Davidi alobaki na Akishe: “Soki nandimami na miso na yo, tiká bápesa ngai esika na engumba moko ya moke, mpo nafanda kuna. Mpo na nini mosaleli na yo asengeli kofanda elongo na yo na engumba ya mokonzi?” 6 Na yango Akishe apesaki ye Ziklage+ na mokolo wana. Yango wana Ziklage ekómá engumba ya bakonzi ya Yuda tii na mokolo ya lelo.
7 Davidi afandaki na mokili ya Bafilistia mbula moko na sanza minei.+ 8 Davidi azalaki komata elongo na bato na ye mpo na kobundisa Bageshure,+ Bagirize mpe Baamaleke,+ mpo bazalaki kofanda na mokili oyo ebandi na Telame tii na Shure+ mpe kitá tii na mokili ya Ezipito. 9 Soki Davidi abundisi mokili moko, azalaki kotika ata mobali to mwasi moko te na bomoi,+ kasi azalaki kozwa bitonga ya bampate mpe ya bangɔmbɛ, bampunda, bakamela mpe bilamba, mpe na nsima azalaki kozonga epai ya Akishe. 10 Bongo Akishe azalaki kotuna ye: “Lelo okendaki kobunda wapi?” Davidi azalaki kozongisa: “Nakendaki kobunda na sudi* ya Yuda”+ to “na sudi ya Bayerameele”+ to mpe “na sudi ya Bakeni.”+ 11 Davidi azalaki koboma moto nyonso: ezala mobali to mwasi; mpo moto moko te akende na Gate koyebisa likambo oyo ye ná bato na ye basali mpe aloba: “Davidi asali boye to boye.” (Asalaki bongo mikolo nyonso oyo afandaki na mokili ya Bafilistia.) 12 Bongo Akishe andimelaki Davidi, alobaki na motema na ye: ‘Boye akómi mpenza eloko ya nsolo mabe epai ya bato na ye Yisraele. Na yango akozala ntango nyonso mosaleli na ngai.’