Nkoma ya batángi
Bamaniskri ya kala—Ndenge nini bayebaka bambula oyo eumeli? (Febwali 2008, na Lifalanse) Lisolo yango esepelisaki ngai ata moke te. Nayebi ete T.B. elimboli “ntango na biso” mpe L.T.B. elimboli “liboso ya ntango na biso.” Nazali na mbula 70 mpe namonaka ete na badati, basalelaka maloba L.K. oyo elimboli liboso ya Klisto mpe N.K. oyo elimboli nsima ya Klisto. Namonaka ete kosalela L.T.B. to T.B. ezali lokola kowangana ete Yesu abotamaki.
R. W., États-Unis
Eyano ya “Lamuká!”: Atako L.K. (liboso ya Klisto) mpe N.K. (Nsima ya Klisto) esalelamaka na mikili oyo bato mingi bamibengaka baklisto, biso toponá kosalela maloba T.B. (ntango na biso) mpe L.T.B. (liboso ya ntango na biso). Mpo na nini? Ya liboso, ezali na elembeteli monene oyo emonisi ete Yesu abotamaki na mobu ya 2 L.T.B. Ya mibale, Batatoli ya Yehova babimisaka mikanda na minɔkɔ mingi oyo etángamaka na bato ebele oyo bazali baklisto te. Ya misato, liloba “Klisto” elimboli “Mopakolami.” Yesu akómaki Masiya, to Klisto, ntango apakolamaki na elimo santu ya Nzambe, ntango abatisamaki na mobu 29 T.B. (Matai 3:13-17) Na yango, Yesu abotamaki Klisto te; akómaki Klisto na mbula oyo azwaki batisimo. Kutu, maloba T.B. mpe L.T.B. ekómi kosalelama mingi, mpe ezali na badiksionɛrɛ mingi ya mikolo oyo mpe na babuku ya bato mingi ya mayele. Tosɛngi yo oyeba ete Batatoli ya Yehova bandimaka ete Yesu azali na esika monene mpe mbeka oyo apesaki ezali na ntina mingi mpo na kokokisama ya mokano ya Nzambe mpe lobiko na biso.
Mituna oyo bilenge batunaka . . . Ndenge nini nakoki kobunda na maladi na ngai? (Febwali 2008, na Lifalanse) Nazangi maloba mpo na koyebisa bino ndenge nasepelaki na lisolo yango oyo eyaki mpenza na ntango oyo ebongi! Nabɛlaki mpe nakɔtaki lopitalo pɔsɔ misato. Nazwaki zulunalo yango ntango kaka nabimaki na lopitalo. Ngai mpe nakokani na bilenge oyo lisolo yango elobeli na makambo mingi. Matondi mingi mpo na bandakisa mpe batoli oyo bopesi.
K. P., Canada
Koyeba ete Yehova Nzambe abɔndisaka, ata baoyo bazali ebɔsɔnɔ lokola ngai, esimbaki motema na ngai. Ntango nazalaki mwana moke, bazwaki ngai na maladi ya bɔɔngɔ oyo ekómisaka paralize. Atako nakokaka kotambola te, nazali mobongisi-nzela mosungi. Nazali kozela ntango oyo, na Paladiso awa na mabelé, bibɔsɔnɔ nyonso ‘bakopumbwa lokola mboloko.’—Yisaya 35:5, 6.
J. J., République de Corée
Nazongelaki kotánga lisolo yango mbala na mbala. Nazalaki kolela ntango namonaki ete Yehova asepelaka na biso mingi. Ezalaki lokola nde afiniki biso bolangiti oyo epesaka mɔtɔ mpo mabe ekómela biso ata moke te. Matondi mingi.
M. T., Japon
Liwa ezali mpenza nsuka? (Yuli–Sɛtɛmbɛ 2007) Mama na ngai akufaki eleki mwa basanza; yango wana, bandimbola oyo ezali na masolo yango, mingimingi elikya ya lisekwa, esimbaki mpenza motema na ngai. Matondi mingi. Ebɔndisaki mpe elendisaki ngai mpenza.
M. R., Madagascar