Ndenge nini tosengeli kobondela Nzambe?

KOSOLOLA na Mozwi-ya-Nguya-Nyonso mpe koyebisa ye makambo oyo ezali na motema na biso ezali lokumu moko monene. Nzokande, bato mingi bayebaka te ndenge oyo basengeli kobondela, mpe basusu bazalaka na mposa ya kobongisa mabondeli na bango. Emonani lokola bayekoli mosusu ya Yesu bazalaki mpe na mposa wana. Moko na bango asɛngaki ye ete: “Nkolo, teyá biso kobondela.” (Luka 11:1) Na yango, Yesu alakisaki bango libondeli oyo mbala mingi ebengamaka Libondeli ya Nkolo to ya Tata wa biso. Libondeli wana ya kitoko mpe ya pɛtɛɛ esalisaka biso tóyeba kosolola na Nzambe na ndenge oyo andimaka, mpe emonisaka likambo ya ntina oyo Biblia mobimba elobeli.

Libondeli oyo Yesu alakisaki

Yesu alobaki boye: “Yango wana, bosengeli kobondela boye: ‘Tata na biso na likoló, nkombo na yo esantisama. Bokonzi na yo eya. Mokano na yo esalema, lokola na likoló, ndenge moko mpe na mabele. Pesá biso lelo bilei na biso mpo na mokolo oyo; mpe limbisá biso banyongo na biso, ndenge biso mpe tolimbisi bato oyo bazali na nyongo na biso. Mpe salisá biso tókwea na komekama te, kasi bikisá biso na moto mabe.’”​—Matai 6:9-13.

Simbá ete Yesu alobaki: “Bosengeli kobondela boye.” Alingaki koloba nini? Yesu alingaki koloba te ete bayekoli na ye bázongelaka maloba na ye mbala na mbala. Kutu, autaki kopekisa momeseno wana. (Matai 6:7) Nzokande, libondeli na ye emonisi makambo oyo eleki ntina, elingi koloba makambo oyo ezali na ntina mingi mpo na Nzambe, kasi kaka mpo na biso moko te. Mpo na koyeba makambo yango oyo eleki ntina, tosengeli naino kokanga ntina ya makambo oyo Yesu alobelaki. Na yango, tótalela makambo yango mokomoko.

Ndimbola ya libondeli yango

“Tata na biso na likoló, nkombo na yo esantisama.” Ebongaki mpenza ete Yesu abenga Nzambe “Tata” mpamba te alingaka mpe abatelaka biso, kaka ndenge tata ya malamu asalaka. Nzambe azali mpe na nkombo na ye mpenza, Yehova, oyo ekeseni na bibengeli na ye mingi ya lokumu lokola Mozwi-ya-Nguya-Nyonso, Nzambe mpe Nkolo.a (Nzembo 83:18) Kasi mpo na nini nkombo ya Nzambe, oyo esangisi mpe lokumu na ye, esengeli kosantisama? Mpo babebisá lokumu ya nkombo yango mpe bafingisá yango.

Bato mosusu bapesaka Nzambe foti ntango bakutani na likambo moko ya mpasi; nzokande bato mosusu bamilukelaka bampasi bango moko, to ekwelaka bango mpo bazali na esika mpe na ntango oyo likama esalemi. (Masese 19:3; Mosakoli 9:11) Bato mosusu balobaka ete Nzambe nde moto abimisaka makama lokola koningana ya mabele to mopepe makasi. Kasi Biblia elobi ete “Nzambe akoki komekama na makambo ya mabe te mpe ye moko akoki komeka moto na ndenge wana te.” (Yakobo 1:13) Lisusu, mangomba mingi eteyaka ete Nzambe anyokolaka bato mabe na lifelo ya mɔtɔ, liteya oyo asepelaka na yango ata moke te. (Yirimia 19:5; 1 Yoane 4:8) Baroma 6:23, elobi ete “lifuti oyo lisumu ezali kofuta ezali liwa,” kasi te minyoko ya seko!b

“Bokonzi na yo eya.” Bokonzi ya Nzambe ezali guvɛrnema moko oyo Yesu Kristo azali Mokonzi na yango. Etikali moke ayangela mabele mobimba. Danyele 7:14 elobi ete “bapesaki ye boyangeli, lokumu ná bokonzi.” Bokonzi ya Nzambe ‘ekoya’ ntango ekozwa makambo ya mokili oyo na mabɔkɔ; ekosukisa makonzi nyonso mosusu oyo ezali kotɛmɛla yango, mpe ekoyangela mabele mobimba.​—Danyele 2:44.

“Mokano na yo esalema, lokola na likoló, ndenge moko mpe na mabele.” Ntango Bokonzi ekoyangela na mabele, bato nyonso bakotosa mokano ya Nzambe. Yango ekosala ete kimya ya solosolo ezala mpe bato nyonso básambela Nzambe na solo. Makambo ya politiki oyo ekabolaka bato mpe losambo ya lokuta ekozala lisusu te. Emoniseli 21:3, 4 elobi na maloba ya elilingi ete “hema ya Nzambe” ekozala “esika moko na bato . . . mpe akopangwisa mpisoli nyonso na miso na bango, mpe liwa ekozala lisusu te, ná lilaka ná koganga ná mpasi ekozala lisusu mpe te. Makambo ya kala eleki.”

“Pesá biso lelo bilei na biso mpo na mokolo oyo.” Nsima ya kolobela liboso nkombo ya Nzambe mpe Bokonzi na ye, Yesu alobelaki bamposa na biso. Maloba na ye emonisi ete tosengeli te koboma nzoto mpo na koluka kozwa biloko koleka oyo tozali na yango mposa “mpo na mokolo oyo.” Kasi tosengeli kolanda toli ya Masese 30:8, oyo elobi ete: “Kopesa ngai bobola te, bomɛngo mpe te. Tiká nalya bilei oyo esengeli na ngai.”

“Limbisá biso banyongo na biso, ndenge biso mpe tolimbisi bato oyo bazali na nyongo na biso.” Awa, liloba “banyongo” elimboli “masumu.”c Biso nyonso tosengeli kotosa Nzambe. Na yango, ntango tozangi kotosa ye, elingi koloba tosaleli ye lisumu, ezali lokola nde tokɔti nyongo. Atako bongo, Yehova azalaka pene ya kolimbisa biso nyongo yango soki tolimbisi na boboto nyonso baoyo basaleli biso masumu.​—Matai 18:21-35.

“Salisá biso tókwea na komekama te, kasi bikisá biso na moto mabe.” “Moto mabe” ezali Satana Zabolo oyo abengami mpe “Momeki.” (Matai 4:3) Lokola tozali bato ya bolɛmbu mpe ya kozanga kokoka, tozali na mposa ya lisalisi ya Nzambe mpo tólonga Satana mpe bato na ye.​—Marko 14:38.

Tiká ete libondeli ya Yesu oyo apesaki lokola ndakisa esalisa yo obongisa mabondeli na yo, mbala mosusu mpo oyeba kotya makambo oyo eleki ntina na esika ya liboso. Kasi, ndenge nini libondeli yango emonisi likambo ya ntina oyo Biblia mobimba elobeli? Ndenge maloba ya Yesu emonisi yango, likambo ya ntina oyo Biblia mobimba elobeli ezali kosantisama ya nkombo mosantu ya Nzambe, kolongolama ya mabe nyonso, mpe koyangelama ya mabele na kimya na nzela ya Bokonzi ya Nzambe. Ya solo, libondeli oyo Yesu apesaki lokola ndakisa etondi na mateya kitoko!

[Maloba na nse ya lokasa]

OSILÁ KOMITUNA?

● Yesu alingaki koloba nini ntango alobaki ete: “Yango wana, bosengeli kobondela boye”?​—Matai 6:9.

● Makambo nini Yesu amonisaki ete tosengeli kotyaka na esika ya liboso na mabondeli na biso?​—Matai 6:9, 10.

● “Banyongo na biso,” ezali nini, mpe mpo na nini tosengeli kolimbisa basusu masumu oyo basaleli biso?​—Matai 6:12.

[Elilingi na lokasa 29]

Libondeli oyo Yesu apesaki lokola ndakisa ekoki kosalisa yo oyeba kotya na esika ya liboso makambo oyo eleki ntina mpo na Nzambe, kasi kaka mpo na yo moko te