Koloba ndenge omeseni koloba

SOKI ozali na ezaleli ya koloba ndenge omeseni koloba, yango ekosala mpenza ete bato bándimela yo. Okondima makambo oyo moto oyo alati maskɛ azali koloba? Okondima makambo moto yango azali koloba ata soki maskɛ oyo ye alati eleki elongi na ye moko na kikoto? Te. Yango wana, na esika ete omekola moto mosusu, zalá kaka ndenge ozalaka.

Koloba ndenge omeseni koloba elimboli te ete osengeli koloba kozanga kokanisa. Ezali malamu te koloba na bafoti, kobebisa ebengeli ya maloba mpe komɛlamɛla maloba. Esengeli mpe koboya elobeli ya balabala. Tosengeli ntango nyonso komonisa limemya mpe lokumu, ezala na maloba na biso to na ezaleli na biso. Moto oyo azali koloba ndenge ameseni koloba, asalelaka te elobeli moko boye ya kilo lokola nde azali koloba liboso ya bakonzi, mpe alukaka komilakisa te.

Na mosala ya kosakola. Ntango ozali kosakola, obangaka soki okómi pene ya ndako moko to soki olingi kotɛlɛmisa moto moko na balabala? Yango ekómelaka biso nyonso, kasi mpo na bato mosusu, kobanga wana esilaka te. Lokola azali kobanga, mongongo na ye ekozala lisusu ndenge ezalaka te, ekobanda kolɛnga, to mpe akobanda koningisaningisa mabɔkɔ to motó.

Ezali na makambo mingi oyo esalaka ete mosakoli azala na mokakatano yango. Mbala mosusu azali komituna soki bato bakomona ye ndenge nini, to soki akoloba malamu to te. Biso nyonso tomitunaka mpe bongo, kasi ekómaka mabe ntango moto azali komitungisa koleka ndelo mpo na likambo yango. Nini ekoki kosalisa yo soki ozali kobanga liboso ya kobanda kosakola? Esengeli komibongisa malamumalamu liboso mpe kobondela Yehova makasi. (Mis. 4:29) Kanisá ndenge oyo Yehova ayokelaka bato mawa, azali kobenga bango báya mpo bázala na nzoto ya kokoka mpe na bomoi ya seko na kati ya Paladiso. Kanisá mpe mpo na bato oyo ozali kosala makasi mpo na kosalisa bango mpe mposa oyo bazali na yango mpo na koyoka nsango malamu.

Kobosana mpe te ete bato bazali na bonsomi ya kopona, bakoki kondima to koboya nsango oyo ozali komemela bango. Ezalaki mpe bongo ntango Yesu azalaki kosakola na Yisalaele ya kala. Mokumba na yo ezali kaka ya koteya. (Mat. 24:14) Ata soki bato batikeli yo ntango ya koloba te, lokola bamoni yo, yango ezali litatoli mpo na bango mpe okokisi mokumba na yo mpamba te ondimi Yehova asalela yo mpo na kokokisa mokano na ye. Maloba na yo ekozala ndenge nini ntango bato bapesi yo nzela ete oloba? Soki oyekoli komibanzabanza mpo na bato mosusu, maloba na yo ekobenda bango mpe okoloba ndenge omeseni koloba.

Ntango ozali kosakola, soki ozali kosala mpe koloba ndenge omesaná koloba, yango ekosala ete bato oyo bazali koyoka yo bákitisa motema. Mbala mosusu kutu bakosepela mingi lisusu koyoka makanisi ya Makomami oyo olingi koyebisa bango. Na esika ete osalela bango lisukulu, luká nde kosolola mpenza na bango. Zalá na boboto. Monisá mpenza ete ozali kosepela na bango mpe yoká makanisi na bango. Soki lokota na bino to ndenge bato bamesaná kosala na mboka na bino esɛngi ete osala likambo boye to boye mpo na komonisa ete ozali na limemya ntango ozali kosolola na moto oyo oyebi ye te, ekozala malamu osala yango. Kasi okoki ntango nyonso kosɛka mwa moke.

Na makita. Ntango ozali koloba na bato ebele, ekozala malamu mingi oloba ndenge omeseni koloba, lokola nde ozali kosolola na moto moko. Ya solo, ntango bato oyo bazali koyoka yo bazali ebele mpenza, osengeli kotombola mpenza mongongo. Soki omeki kokanga lisukulu na yo nyonso na motó to soki okomi makambo ebele ebele na plan na yo, boye ozali mpenza komitungisa koleka ndelo ete oloba liloba mokomoko na ndenge esengeli. Ezali na ntina mingi kobimisa maloba oyo ebongi, kasi soki ozali komitungisa mpo na yango koleka ndelo, ekozala lokola nde maloba yango euti na yo moko te. Na ntango wana, okoloba ndenge omeseni koloba te. Liboso osala lisolo na yo, osengeli kobongisa malamumalamu makanisi oyo okoloba; tyá likebi mingimingi na makanisi, kasi te na liloba mokomoko oyo osengeli koloba.

Osengeli mpe kosala bongo na makita, soki bakotuna yo mituna liboso ya bato. Omibongisa malamu mpenza, kasi kotánga biyano na yo te to kokanga yango na motó te. Ntango ozali kopesa biyano, bongoláká mpe mongongo mpo bato bámona ete makanisi wana euti mpenza na motema na yo mpe bakosepela na yango.

Ata soki moto ayebi mpenza koloba na miso ya bato, soki alekisi ndelo, yango ekosepelisa bato oyo bazali koyoka ye te, mpamba te azali koloba ndenge ameseni koloba te. Na ndakisa, osengeli kobimisa maloba polele mpe kobenga yango na ndenge esengeli, kasi kolekisa ndelo te noki te bato bakomona ete ozali koloba ndenge omeseni koloba te. Soki ozali kosala bajɛstɛ malamu mpenza mpo na konyata makanisi ya ntina to mpo na kolakisa ndenge eloko ezali, yango ekoki kosala ete lisolo na yo esepelisa bato. Kasi soki ozali kosala bajɛstɛ yango malamu te to olekisi ndelo, bato bakotya likebi na makambo oyo ozali koloba te. Lobá na mongongo malamu, kasi koloba makasimakasi te. Ezali malamu koloba na esengo mbala na mbala, kasi osengeli te koluka komilakisa. Ezala ozali kobongola mongongo to ozali koloba na esengo to mpe ozali komonisa mayoki na yo, osengeli te kosala yango mpo na kobenda likebi ya bato epai na yo, soki osali bongo bakomiyoka malamu te.

Bato mosusu bazali na momeseno ya konyata liloba mokomoko, ata soki bazali kosala lisukulu te. Ezali mpe na bato oyo, ntango bazali koloba, balobaka lokola nde bazali kosolola na bato oyo bameseni na bango. Likambo ya ntina ezali ete mikolo nyonso, osengeli koloba malamu mpe kozala na etamboli oyo ebongi na moklisto. Soki osali bongo, ntango okoleka liboso ya bato, okoloba mpe okosala ndenge omeseni koloba mpe kosala mpe yango ekobenda likebi ya bato.

Ntango ozali kotánga liboso ya bato mingi. Kotánga liboso ya bato mingi esɛngaka kosala milende mingi mpo moto asala yango ndenge ameseni koloba. Mpo na yango, luká makanisi ya ntina na makambo oyo okotánga mpe talá ndenge oyo yango elandani. Kobosana yango te; soki te, okotánga maloba, kasi ndenge makanisi elandani ekoyebana te. Luká ndenge batángaka maloba oyo omeseni na yango te. Meká kotánga na mongongo makasi mpo omesana komatisa to kokitisa mongongo mpe omesana kokangisa maloba na ndenge esengeli mpo ebimisa makanisi na yango polele. Zongelá yango mbala na mbala tii okobanda kotánga kozanga mabaku. Luká koyeba makambo yango malamu mpenza mpo ntango okotánga yango, eyokana lokola ozali kosolola na moto mpe ozali na esengo mpenza. Yango nde elimboli kotánga ndenge omeseni kotánga.

Ya solo, mbala mingi ntango totángaka liboso ya bato mingi, totángaka nde mikanda na biso oyo elimbolaka Biblia. Longolá kotánga na Eteyelo ya mosala ya Teokrasi, totángaka mpe bavɛrsɛ na mosala ya kosakola mpe ntango tozali kosala masolo na makita ya lisangá. Bandeko mibali mosusu bazwaka mokumba ya kotánga baparagrafe na Boyekoli ya Linɔ́ngi ya Mosɛnzɛli mpe na Boyekoli ya Mokanda. Bandeko mibali mosusu oyo bazali na makoki bazwaka mokumba ya kotánga bamaniskri na mayangani ya minene. Ezala ozali kotánga Biblia to mikanda mosusu oyo moto mosusu nde akomi yango, tángá yango malamu, lokola nde moto yango azali mpenza koloba. Soki bato mingi nde bazali koloba, bongolá mongongo na yo mwa moke mpo na kokesenisa moto mokomoko. Kebá: Kokómisa yango lokola lisano te, kasi luká nde ete botángi na yo esepelisa bato mpe eyokana mpenza ete ezali ndenge olobaka.

Soki ozali kotánga ndenge omeseni koloba, ekozala lokola nde ozali kosolola na moto mpe okobanda kobongola mongongo. Bato bakomona ete ozali kotánga ndenge omeseni koloba mpe ete ozali kondima makambo oyo ozali kotánga.