Koloba lokola ozali kosolola na moto

MBALA mingi, bato bamiyokaka malamu ntango bazali kosolola na baninga na bango. Maloba ya koloba eyelaka bango yango moko. Bato mosusu bazalaka mwa mɔtɔmɔtɔ, nzokande bato mosusu balobaka mingi te. Atako bongo, bato basepelaka mingi soki ozali koloba lokola ozali kosolola na moto, ndenge oyo omeseni koloba.

Kasi ntango okutani na mopaya, ezali malamu te koloba na ye lokola nde ozali koloba na moninga na yo to kosalela elobeli ya bongo bongo. Kutu na bamboka mingi, ezali na maloba oyo eyebani oyo basalelaka ntango olingi kobanda koloba na mopaya. Nsima ya maloba wana oyo ekomonisa ete ozali moto ya limemya, okoki kotika maloba wana ya kilo mpe kosolola na ye ndenge osololaka na moto nyonso.

Ntango ozali koloba liboso ya bato na lisangá, osengeli mpe kokeba. Soki ozali koloba lokola ozali kosolola na baninga na yo, yango ekolongola lokumu ya makita ya boklisto mpe bato bakozwa makambo oyo ozali koloba na lisɛki. Na minɔkɔ mosusu, ezali na maloba oyo osengeli kosalela mpo na koloba na moto oyo azali mokóló na yo, na molakisi, na mokonzi moko ya Leta, to na moboti. (Talá maloba oyo esalelami na Misala 7:2 mpe 13:16.) Ezali mpe na maloba ndenge na ndenge oyo esalelamaka ntango ozali kosolola na molongani na yo to na moninga na yo moko ya motema. Atako tosengeli te koloba liboso ya bato na lisangá lokola nde tozali koloba na mokonzi moko, elobeli na biso esengeli mpenza komonisa ete tozali na limemya.

Nzokande, ezali na makambo oyo ekoki kotinda moto aloba lokola nde azali koloba liboso ya mokonzi moko. Moko na yango ezali lolenge oyo atii maloba ya bafraze, to lolenge oyo azali kotonga fraze yango. Mokakatano emonanaka mingimingi ntango molobi azali koluka kozongela maloba kaka ndenge ekomami na plan na ye. Ndenge maloba ekomamaka na papye ekeseni mpenza na ndenge oyo tolobaka. Ezali solo ete ntango tozali kobongisa lisukulu na biso, tolukalukaka makanisi na mikanda. Mbala mosusu mpe bakoki kopesa biso lisukulu ya plan. Kasi soki ozali kobimisa makanisi kaka ndenge ekomami na mokanda to soki ozali kotánga yango mbala moko na plan, ekozala mpasi ete osala lisukulu na yo lokola nde ozali kosolola na moto. Mpo oloba lokola ozali kosolola na moto, osengeli kobimisa makanisi yango na maloba na yo moko mpe kosalela bafraze ya mindɔndɔ te.

Likambo mosusu ezali ete ntango ozali koloba, lobáká ntango mosusu mwa mbangu ntango mosusu mwa malɛmbɛ. Mbala mingi emonanaka ete ntango ozali kosala lisolo oyo obongisi maloba nyonso liboso to oyo ezali kosɛnga oloba na limemya mpenza, okokoka kobongola ndenge ya koloba te. Nzokande, ntango tosololaka na bato, tobongolaka ndenge tozali koloba, tolobaka mwa mbangu to mwa malɛmbɛ na bisika mosusu mpe ezalaka na bisika oyo topemaka mwa moke to ntango molai.

Na ntembe te, ntango ozali kosala lisolo na yo liboso ya bato ebele, osengeli koloba lokola ozali kosolola na moto kasi nde na mongongo makasi, oyo ezali koyokana malamu, mpe na esengo mpenza mpo na kobenda likebi na bango.

Mpo olobaka na mosala ya kosakola lokola ozali kosolola na moto, osengeli kozala na momeseno ya koloba malamu mikolo nyonso. Yango elimboli te ete osengeli kosala bakelasi milaimilai. Kasi ezali malamu kokóma na momeseno ya koloba malamu mpo bato báyoka yo mpe bámemya makambo oyo ozali koloba. Kangá yango na makanisi na yo mpe talá soki osengeli kosala milende mpo na kobongisa makambo oyo elandi, na ndenge oyo osololaka na bato.

1. Bwaká maloba oyo eyokani te na ndenge lokota elobamaka, to oyo emonisaka ete moto oyo azali koloba bongo atosaka mitinda ya Nzambe te. Na kotalela toli oyo ezali na Bakolose 3:8, bwaká maloba nyonso ya mabe to ya bosɔtɔ. Kasi ezali mabe te kosalela maloba oyo bato basalelaka na masolo na bango ya mokolo na mokolo. Maloba yango elandaka mpenza te ndenge lokota esengeli kolobama, kasi eyokani na mitinda oyo etali lolenge na biso ya koloba.

2. Na likanisi nyonso oyo olingi kobimisa, kozongela te mbala na mbala maloba kaka mokomoko. Yekolá kosalela maloba oyo ekomonisa polele likambo oyo olingi koloba.

3. Kozongelaka mpambampamba te makambo oyo outi koloba; luká naino koyeba mpenza likambo oyo olingi koloba mpe na nsima, bandá koloba.

4. Kobimisa maloba ebele ebele te, mpamba te yango ezipaka makanisi ya ntina. Luká kokóma na momeseno ya koloba polele mpe na maloba ya pɛtɛɛ makanisi oyo bato basengeli kokanga na mitó na bango.

5. Zalá na elobeli oyo ekomonisa ete ozali komemya bato.