Elimo na Nzambe ekoki kozala na bopusi likoló na yo

NA EBANDELI Nzambe azalisaki likoló mpe mokili. Mokili mozalaki na lolenge te, bobele mpamba, mpe molili mozalaki na likoló na bisika na mozindo. Elimo na Nzambe ezalaki kotambola likoló na mai.” (Genese 1:1, 2, MN) Maloba ya Makomami mazali komonisa polele matomba oyo moto na moto azali kozwa na mosala ya elimo santu. Elimo yango ezalaki na mosala na ntango na kozalisama mpe, na mosala na yango, mabelé makómaki efandelo kitoko epesamaki na bato.

Kasi elimo santu ekoki komema bolamu mosusu epai na bato. Lisese moko lipemamaki na Nzambe lilobi ete: “Bongwana mpo na mpamela na ngai. Bongo nakosopela bino elimo na ngai, mpe nakolakisa bino maloba na ngai.” (Masese 1:23, MN) “Maloba” na Nzambe masangisamaki mpe lelo tozali kokuta yango kati na Biblia Mosantu, mokanda oyo mokomamaki na bato oyo “bapusamaki na elimo santu.” (2 Petelo 1:21; Malako 12:36; 2 Timote 3:16) Wana moto na bopóló azali kotanga Biblia, akozwaka lisalisi ya elimo santu.

Elimo santu mpe mosala ya kosakola

Ntango Témoin de Jéhovah moko ayei kotala yo mpo na kolobela yo nsango malamu ya Bokonzi, elimo santu ekoki mpe kozala na bopusi likoló na bomoi na yo na lolenge mosusu. Ndenge nini toyebi yango? Ntango Yesu abandaki kosakola nsango malamu, akokisaki maloba ya mosakoli Yisaya mpo na ye moko, ete: “Elimo na Jéhovah ezali likoló na ngai, mpo ete Jéhovah apakoli ngai mpo na koyebisa nsango malamu epai na babóla, . . . mpo na kosakola mbula malamu na Jéhovah.” (Luka 4:18, 19; Yisaya 61:1, 2, MN) Ee, Yesu apakolamaki na nzela ya elimo santu mpo na kosakola nsango malamu.

Lisusu, Yesu ayebisaki ete mosala ya kosakola nsango malamu mosengelaki kosalema nsima na kufa na ye. Apesaki esakweli oyo ete: “Mpe nsango malamu oyo na Bokonzi ekosakolama na mokili mobimba lokola litatoli na mabota nyonso, mpe bongo nsuka ekoya.” (Matai 24:14) Mwa moke nsima na komata na likoló, Yesu apesaki bayekoli na ye mosala oyo molandi: “Bokenda kozalisa bayekoli na mabota nyonso, kobatisa bango na nkombo ya Tata, mpe ya Mwana, mpe ya elimo santu, kolakisa mpe bango ete batósa nyonso esili ngai kolaka bino.” (Matai 28:19, 20) Nsima wana amataki na likoló, bayekoli na Klisto balandaki bongo kokokisa mosala yango ya kosakola mpe ya koteya oyo mokokisamaki na lisalisi ya elimo santu. Lelo, ba Témoins de Jéhovah bazali komekola bayekoli ya liboso na kosakoláká nsango malamu na mokili mobimba.

Elimo santu mpe batisimo

Yesu alobaki ete moto oyo akoyamba nsango malamu asengeli kobatisama “na nkombo ya Tata, mpe ya Mwana mpe ya elimo santu.” Na bongo nde bayekoli ya sika bazali kozwa bopusi ya elimo santu. Liloba “na nkombo ya” elimboli mpenza ete, “na bokonzi ya” to “na koyebáká etelemelo ya.”a Kobatisama na nkombo ya Tata elimboli kondima ete Nzambe azali na bokonzi likoló na bomoi na biso. Kozwa batisimo na nkombo ya Mwana elimboli kondima Yesu ete azali Mobikisi, azali Ndakisa mpe Mokonzi. Kobatisama na nkombo ya elimo santu elingi koloba kolikya likoló na lisalisi ya elimo mpe komitika kotambwisama na bokasi yango.”b

Elimo santu kati na bomoi na yo

Kozanga sembo, pite, mobulu mpe ezaleli ya kobuka mibeko oyo epalangani kati na mikili oyo mizali komiloba ete mizali ya boklisto, emonisi na mawa mpenza ete mingi na baoyo bakomilobaka baklisto bazali kotemela elimo santu. Na kokesene, baoyo bakomitikaka kotambwisama na yango bakozwaka bolamu. Bazali bongo kotosa oyo ezali bango kotanga kati na Biblia, oyo epemami na elimo, mpe bazali kosalela yango kati na bomoi na bango. Bazali bongo kozwa mayele, bokebi mingi, koyeba kotalela makambo, bwanya, boyebi mpe bososoli. (Masese 1:1-4) Ezali wana ebele na myango kitoko mpo na kolónga na ntango na yikiyiki oyo tozali na yango.

Elimo santu ekoki lisusu kosalisa bato oyo bazali kondima bopusi na yango ete balonga mikakatano minene. Na ntango na kala, Nzambe alimbolaki epai na basaleli na ye, baoyo basengelaki kokokisa mokumba monene, na nzela nini basengelaki kokokisa yango. Jéhovah amonisaki ete “ezali na bokasi na basoda te, soko na nguya mpe te, kasi na elimo [na ye].” (Zakari 4:6, MN) Soki totosi Nzambe mpe elimo na ye, tokozwa lisalisi lisengeli mpo na kokokisa mikumba mpe kolónga mikakatano miye mikozala mbala mosusu minene mpo na biso.​—Matai 6:33; Bafilipi 4:13.

Lisusu, elimo na Nzambe ezali kopesa biso nzela na kozwa bonsomi oyo mokili eyebi yango te. Ntoma Paulo akomaki ete: “Esika elimo na Jéhovah ezali, bonsomi ezali wana.” (2 Bakolinti 3:17, MN) Baoyo batambwisami na elimo na Nzambe basili kosikwa na lingomba ya lokuta, na biyambayamba, na bobangi mpe na bikila mosusu. Elimo na Nzambe ezali bokasi oyo bokokokisaka misala malamu. Elimo yango ekoki nkutu komema bato mingi na kobongwana Biblia elobeli likambo yango kolobáká ete: “Nde mbuma na elimo ezali bolingo, esengo, kimya, motema petee, bobóto, malamu. kondima, bopóló mpe komikanga motema. Liboso na makambo oyo, Mibeko mizali te.” (Bagalatia 5:22, 23, MN) Soki bato banso bandimaki bopusi ya elimo na Nzambe, mbele mokili mozali lolenge mosusu. Lokola lisangá, baklisto ya solo bazali na “bomoko ya elimo kati na ekanganeli ya kimya.” (Baefese 4:3) Nzokande, bomoko mpe kimya ezali komonana mingi te na mikolo na biso. Nzokande ezali na esika oyo elimo na Nzambe ezali kosala mosala. Kati na ba Témoins de Jéhovah, ekanganeli oyo, elimo santu, esili komema bato ya mposo nyonso, ya minoko nyonso mpe ya bikólo nyonso na kosala ‘libota ya bandeko.’​—1 Petelo 2:17.

Elimo na Nzambe mpe yo

Omibanzabanzaka mpo na litomba oyo likozwamaka na kozala na mayele mauti na Nzambe mpe na kozwa bonsomi ya solo? Okanisi te ete ezali malamu kozwa lisalisi ya Nzambe mpo na kosilisa mikakatano mpe mpo na kolona bolingo, esengo, kimya, motema petee, bobóto, malamu, kondima, bopolo mpe komikanga motema? Soki bongo, omitika kotambwisama na makasi ya elimo santu na Nzambe. Kasi, ndenge nini kosala yango?

Tika Liloba na Nzambe, Biblia, ezala na bopusi likoló na elimo mpe motema na yo. Sangana na bato oyo bazali kopesa nzela ete elimo santu ezala na bopusi likoló na bomoi na bango. Kamata bibongiseli uta sikawa mpo na koyekola koyeba mokano na Nzambe mpe na kosalela yango. Boye, “tika ete Nzambe na elikya atóndisa yo na esengo mpe kimya nyonso kati na kondima, mpo ete otónda na elikya na nguya na elimo santu.”​—Baloma 15:13.

[Maloba na nse ya lokasa]