Mituna ya batángi

Na ndenge nini Mobeko ya Mose oyo epekisaki libala kati na bandeko ya libota moko etaleli mpe baklisto lelo oyo?

Mibeko oyo Yehova apesaki ekólo ya Yisalaele elobi makambo mingi te na ntina etali milulu mpe makambo mosusu oyo esalemaka mokolo ya libala. Kasi, yango epekisaki mabala mosusu. Na ndakisa, na Levitike 18:6-20, tokokuta molɔngɔ molai ya makambo oyo epekisamaki, kati na ‘bandeko ya libota moko.’ Mokapo yango emonisi polele ete bandeko ya makila bakoki kosangisa nzoto te. Ya solo, baklisto bazali na nse ya Mibeko ya Mose te, batambwisami mpe na yango te. (Baefese 2:15; Bakolose 2:14) Atako bongo, yango elingi koloba te ete bakisto basengeli kotyela likambo yango likebi te ntango bazali kopona moto oyo balingi kobala. Libala na kati ya bandeko ya libota moko epekisami mpo na bantina mingi.

Ya liboso, ezali na mibeko ya Leta oyo epekisi bandeko ya libota moko kobalana, mpe baklisto basengeli mpenza kotosa mibeko ya ekólo oyo bazali kofanda. (Matai 22:21; Baloma13:1, NW) Kasi, mibeko yango ekeseni na kotalela mboka na mboka. Na mikolo na biso, mpo na kotya mibeko ya ndenge wana, batalelaki mingimingi mikakatano ya kolɔngɔnɔ ya nzoto oyo baboti bakoki kolekisa epai ya bana na bango. Eyebani malamu mpenza ete libala kati na bandeko ya libota moko ekoki kolekisa mikakatano ya kolɔngɔnɔ ya nzoto to mpe maladi na nzoto ya bana oyo bakobotama. Ezali mpo na ntina yango, mpe mpo na ‘kotosa bakonzi oyo bazali liboso’ nde baklisto batosaka mibeko ya libala oyo epesami na mboka oyo bango bazali.

Lisusu, mboka na mboka ezalaka na makambo oyo bato bandimaka mpe makambo oyo baboyaka. Bato na bikólo penepene na nyonso bazali na mibeko mpe mimeseno na bango oyo epekisi bandeko ya libota moko kobalana. Libala ya lolenge wana ezali ekila. Atako esika na esika ezali na mibeko na yango oyo ezali komonisa polele ete kosangisa nzoto kati na bato ya libota moko epekisami, buku moko (Encyclopædia Britannica) elobi ete, “emonanaka mbala mingi ete soki bato bazali bandeko ya makila, libala kati na bango ezalaka mpenza ekila makasi, oyo epekisaka kosangisa nzoto kati na bandeko ya libota moko.” Nzokande, ata na bamboka oyo libala kati na bandeko epekisami, baklisto basengeli kotya likebi na mimeseno ya mboka mpe kotosa mibeko ya esika oyo bango bafandi mpo na kobwaka nsɔni te na lisangá mpe na nkombo ya Nzambe.​—2 Bakolinti 6:3.

Tóbosana mpe te lisosoli oyo Nzambe apesi biso. Moto nyonso abotamaka na mayele ya kokesenisa malamu na mabe. (Baloma 2:15) Soki lisosoli na ye ebebisami te na misala mabe, ekoyebisa ye makambo oyo ezali mabe, makambo oyo elongobani te, mpe makambo oyo ezali komonisa etamboli ya nsɔni. Yehova atalelaki likambo yango ntango apekisaki Bayisalaele ete bábalana te na bandeko na bango. Totángi boye: “Bókosala lokola ekosalaka bango na mokili na Ezipito te, kuna efandaki bino, mpe bokosala lokola ekosala bango na mokili na Kanana te, kuna ezali ngai kokenda na bino. Bokotambola na mibeko na bango te.” (Levitike 18:3) Baklisto batelelaka lisosoli na bango oyo eteyami na Biblia ete ezali na ntina mingi mpe batikaka te ete yango ebebisama na ezaleli mabe ya bikólo ya mokili.​—Baefese 4:17-19.

Sikoyo, tokoki koloba nini mpo na yango? Atako baklisto bazali na nse ya Mibeko ya Mose te, kasi lisosoli na bango ezali koyebisa bango polele ete libala ya bandeko​—na ndakisa tata na mwana na ye ya mwasi, mama na mwana na ye ya mobali, ndeko mwasi na ndeko mobali​—eboyami mpenza na libota ya boklisto.a Lokola bondeko esuki kaka kati na libota moko te, baklisto bayebi ete ezali na mibeko mpe na malako oyo etambwisaka libala oyo endimami na mibeko ya Leta mpe ezali na mitinda oyo endimami na bato esika bafandi. Tosengeli kotalela mitinda yango malamumalamu mpo na kotosa toli ya Makomami oyo elobi ete: “Tiká libala ekumisama na kati ya bato nyonso.”​—Baebele 13:4, NW.

[Maloba na nse ya lokasa]