“Bóya epai na ngai, . . . mpe nakobɔndisa bino”
“Bóbatela etonga ya Nzambe”
“Bozangaka ntango te mpo na koyoka biso mpe koloba na biso maloba euti na Biblia oyo elendisaka biso mpenza.”—Pamela.
“Matɔndi mingi mpo na nyonso oyo bozali kosala mpo na biso. Esalisaka biso mpenza.”—Robert.
PAMELA ná Robert bakomaki maloba yango mpo na kopesa bankulutu ya masangá na bango matɔndi. Na mokili mobimba, basaleli ya Nzambe bazalaka na botɔndi mpo na lisungi oyo bandeko oyo bazali ‘kobatela etonga ya Nzambe’ bapesaka bango. (1 Petelo 5:2) Basaleli ya Yehova bazali na botɔndi mpo na makambo ndenge na ndenge oyo bankulutu basalelaka bango mpe mpo na ndenge oyo basalaka makambo yango.
‘Bazali na mingi ya kosala’
Baklisto oyo bazali bankulutu bazalaka na mikumba ebele. (Luka 12:48) Babongisaka masolo oyo basalaka na makita mpe basakolaka nsango malamu ya Bokonzi ya Nzambe. Bakendaka mpe kotala bandeko na bango bandimi mpo na kolendisa bango. Bankulutu batalaka bandeko oyo bazali na mposa ya lisalisi, na ndakisa mibange mpe bandeko mosusu. Basalaka nyonso wana kozanga ete bábosana bolamu ya elimo mpe ya mosuni ya mabota na bango moko. (Yobo 29:12-15; 1 Timote 3:4, 5; 5:8) Bankulutu mosusu bapesaka mabɔkɔ na mosala ya kotonga Bandako ya Bokonzi. Basusu bazali na Bakomite ya boyokani elongo na minganga to mpe na kati ya bituluku ya bandeko mpo na kotala bato ya maladi. Lisusu, bankulutu mingi bamipesaka mpo na kosala misala etali mayangani. Bankulutu bazalaka mpenza na “mingi ya kosala na kati ya mosala ya Nkolo.” (1 Bakolinti 15:58) Yango wana bandeko na kati ya masangá basepelaka mingi na bankulutu yango ya molende oyo basalisaka bango!—1 Batesaloniki 5:12, 13.
Bankulutu oyo bakendaka kotala bandeko na bango baklisto na bandako to na bisika mosusu mpo na kosunga bango na elimo balendisaka mpenza. Thomas, ye abɔkwamaki kaka na mama na ye, alobaki boye: “Soki bankulutu básungaka ngai te mpe bálendisaka ngai te, nakanisi ete lelo oyo mbɛlɛ nazali kosalela Yehova na mosala ya ntango nyonso te.” Bilenge mingi oyo babɔkwamaki kaka na moboti moko bandimaka ete bankulutu basalisaki bango mingi mpo bákóma baninga mpenza ya Nzambe.
Bandeko oyo bazali mibange basepelaka mpe soki bankulutu bakei kotala bango mpo na kolendisa bango na elimo. Bankulutu mibale bakendaki kotala ndeko mobali moko na mwasi na ye oyo bazali bamisionɛrɛ mpe bazali na mbula koleka 80; mwa moke na nsima, bandeko yango bakomaki boye: “Tolingi kopesa bino matɔndi na ndenge boyaki kotala biso. Nsima na bino, totángaki lisusu mikapo oyo botángelaki biso. Tokobosana ata mokolo moko te bilendiseli na bino.” Mobange mwasi moko ya mbula 70 oyo akufelá mobali akomelaki bankulutu mokanda oyo kati na yango alobaki boye: “Nazalaki kobondela Yehova asalisa ngai, mpe atindelaki ngai bino mibale. Kotala oyo boyaki kotala ngai ezalaki mpenza lipamboli ya Yehova!” Yo mpe, oyambaki bankulutu ya lisangá na bino mikolo oyo na ndako na yo? Na ntembe te biso nyonso tosepelaka na milende na bango mpo na kobatela etonga oyo bapesi bango!
Babateli ya mpate oyo bazali kolanda ndakisa ya Nzambe mpe ya Klisto
Yehova azali Mobateli ya mpate oyo atondi na bolingo. (Nzembo 23:1-4; Yilimia 31:10; 1 Petelo 2:25) Yesu Klisto azali mpe Mobateli malamu mpenza ya bampate na elimo. Kutu, Biblia ebengi ye “mobateli ya bampate oyo aleki malamu,” “mobateli monene ya bampate,” mpe “mobateli ya mpate mokonzi.” (Yoane 10:11; Baebele 13:20; 1 Petelo 5:4) Yesu azalaki kosala nini na bato oyo bazalaki na mposa ya kokóma bayekoli na ye? Alobaki na bango na boboto mpenza ete: “Bóya epai na ngai, bino nyonso oyo bozali komona mpasi na mosala mpe kokumbisama mikumba, mpe ngai nakopemisa bino.”—Matai 11:28.
Lelo oyo mpe, bankulutu bazali kosala makasi mpo na kopemisa mpe kobatela etonga. Bato yango ‘bazalaka lokola ebombamelo mpo na mopɛpɛ, ezipelo na ntango ya mbula makasi; lokola bitima ya mai kati na esika ekauki, mpe lokola molili na libanga monene kati na mokili molɛmbisami na moi.’ (Yisaya 32:2) Bampate bamemyaka babateli wana ya boboto oyo babɔndisaka mpe Nzambe asepelaka na bango.—Bafilipi 2:29; 1 Timote 5:17.
Basi na bango basungaka mpenza
Basaleli ya Nzambe bazalaka na botɔndi mingi mpo na bankulutu mpe mpo na ndenge oyo basi ya bankulutu yango basungaka mibali na bango. Mbala mingi, basi yango bamipimelaka makambo mosusu mpo na kosunga mibali na bango. Ntango mosusu batikalaka bango moko na ndako ntango mibali na bango bazali kosala makambo mosusu ya lisangá to ntango bakendaka kotala bampate. Ntango mosusu bandimaka ata kobongola makambo mosusu oyo bango na mibali na bango basilaki kobongisa malamu mpo ete likambo moko ya mbalakaka ebimi na lisangá. Michelle alobaki boye: “Atako bongo, soki nazali komona ndenge oyo mobali na ngai azali komipesa mpo na kobongisa makita to kotala bampate, nayebaka ete azali kosala mosala ya Yehova, mpe nasungaka ye na ndenge oyo nakoki.”
Cheryl, ye mpe azali mwasi ya nkulutu, alobaki boye: “Nayebi ete bandeko na lisangá bazalaka na mposa ya bankulutu mpo na kosolola na bango, mpe nalingaka komonisa bango ete bakoki koya epai ya mobali na ngai ata na ntango nini oyo bazali na mposa na ye.” Basi lokola Michelle na Cheryl, oyo basungaka mibali na bango, bandimaka komipimela makambo mosusu mpo ete mibali na bango bábatela bampate ya Nzambe. Bandeko basepelaka na basi ya bankulutu mpo na elimo na bango ya kosunga mibali na bango.
Atako bongo, nkulutu oyo amipesaka mpo na bandeko na ye asengeli te kobosana bamposa ya elimo mpe bamposa mosusu ya mwasi na bana na ye. Nkulutu oyo abalá asengeli kozala moto “oyo afundami na likambo ata moko te, mobali ya mwasi kaka moko, oyo azali na bana oyo bazali bandimi baoyo bafundami te mpo na misala ya mbindo mpe bazali mitó makasi te.” (Tito 1:6) Asengeli kobatela libota na ye na ndenge oyo Makomami ezali kosɛnga mpo na bakɛngɛli baklisto.—1 Timote 3:1-7.
Mpo na nkulutu oyo amipesaka na misala mingi, mwasi oyo ayebi kosunga azali na motuya mingi! Bankulutu oyo bazali na basi bakanisaka ndenge yango. Ezali se ndenge oyo Biblia elobi yango ete: “Moto azwi mwasi malamu? Azwi eloko ya malamu.” (Masese 18:22, NW) Na maloba mpe na misala na bango, bankulutu ya ndenge wana bamonisaka ete basepelaka na basi na bango. Mibali baklisto wana babongisaka ntango mpo na kobondela mingi mpe koyekola na esengo elongo na basi na bango; kasi, bazwaka mpe ntango ya kosala makambo mosusu elongo, makambo lokola kokende kotambola pembeni ya mai, na zamba, to na parkɛ moko. Ya solo, bankulutu bayokaka esengo mingi na kobatela basi na bango na bolingo.—1 Petelo 3:7.
Bankulutu oyo bamipesaka mpo na kobatela etonga ya Nzambe balendisaka mpenza basaleli ya Yehova na elimo. Bazali mpenza “makabo oyo ezali bato” mpe lipamboli mpo na lisangá!—Baefese 4:8, 11-13.