Mituna ya batángi

Soki moto alapi ndai epai ya Nzambe ete akosala likambo moko, akoki kobongola makanisi na ye lisusu te ata ndenge nini?

Na Biblia, ndai ezali elaka oyo moto apesi Nzambe ete akosala likambo moko boye, akopesa likabo, akosala mosala moko boye to akokóma lolenge moko boye, to akotika makambo mosusu, atako epekisami mpenza te. Biblia ezali na masolo ya bato oyo balapaki ndai ya kosala likambo moko boye soki Nzambe asaleli bango likambo oyo basɛngi. Na ndakisa, Hana, mama ya mosakoli Samwele, “akataki mpe ndai, ye ete, [Yehova] na bibele, . . . soki okokanisa ngai mpe okobosana moombo na yo te nde okopesa moombo na yo mwana mobali, ngai nakopesa ye epai na [Yehova] mikolo nyonso ya bomoi na ye mpe [zilɛti] ekokata nsuki na ye te.” (1 Samwele 1:11) Biblia emonisi mpe ete ndai eutaka na motema ya moto ye moko. Moto asengeli kaka kokokisa ndai nyonso oyo alapi epai ya Nzambe?

Salomo, mokonzi ya Yisalaele ya kala alobaki boye: “Soki okati ndai epai ya Nzambe, zelá te naino ofuti yango te.” Abakisaki ete: “Futá yango ezali na yo na nyongo. Eleki malamu ete okata ndai te kasi ezali mabe kokata ndai nde kofuta te.” (Mosakoli 5:​4, 5) Mobeko oyo Nzambe apesaki Yisalaele na nzela ya Moize elobi ete: “Wana ekosimba yo ndai epai na [Yehova] Nzambe na yo, okozala na gɔigɔi ya kofuta yango te, mpo ete [Yehova] Nzambe na yo akobenga yango na yo solo, mpe ekozala na yo lisumu.” (Deteronome 23:21) Nyonso wana ezali komonisa polele ete kolapa ndai na miso ya Nzambe ezali likambo ya lisɛki te. Moto asengeli kozala na ntina ya malamu oyo azali kolapa ndai mpe asengeli komindimisa ete azali mpenza na likoki ya kokokisa makambo nyonso oyo alaki na ndai na ye. Soki te, eleki malamu alapa ndai te. Kasi asengeli kaka kokokisa ndai nyonso soki asili kolapa yango?

Soki moto alapaki ndai ya kosala likambo moko boye mpe na nsima ayei koyeba ete eyokani na mokano ya Nzambe te, akosala nini? Soki, na ndakisa, ezalaki ndai oyo ezali kosala ete asangisa makambo ya mbindo na losambo ya solo? (Deteronome 23:18) Ezali polele ete moto asɛngisami te kokisa ndai ya ndenge wana. Longola wana, na Mibeko ya Moize, tata ya mwana mwasi to mobali na ye akokaki koboya ndai yango.​—⁠Mituya 30:​3-15.

Tótalela mpe likambo ya moto oyo alapaki ndai na miso ya Nzambe ete akotikala monzemba kasi sikoyo akómi na mokakatano. Akómi komona ete kokokisa ndai yango ekoki kotinda ye abuka mibeko ya Nzambe oyo epekisi pite. Asengeli kaka kosala makasi akokisa ndai na ye? Ekoleka nde malamu akokisa ndai na ye te mpo na kokima pite mpe asɛnga Nzambe ayokela ye mawa mpe alimbisa ye? Moto mosusu te, kaka moto yango ye moko nde akoki kozwa ekateli na likambo yango.

Tokoloba boni soki moto moko oyo alapi ndai ayei komona na nsima ete akanisaki malamu te liboso? Asengeli kaka kokokisa ndai yango? Ezalaki likambo moke te mpo Yefeta akokisa ndai oyo alapaki na miso ya Nzambe, kasi asalaki makasi mpo na kokokisa yango. (Basambisi 11:​30-40) Nzambe akoki koyoka “nkanda” mpo moto akokisi ndai na ye te mpe akobebisa makambo oyo moto yango asalaki. (Mosakoli 5:⁠6) Soki moto azali kozwa na lisɛki likambo ya kokokisa ndai, Nzambe akoki kosepela na ye te.

Yesu Klisto alobaki ete: “Tiká ete liloba na bino Ɛɛ ezala Ɛɛ, Te na bino, Te; mpo oyo ebakisamaka likoló na yango ezali kouta na moto mabe.” (Matai 5:37) Moklisto asengeli koluka kokokisa ndai na ye epai ya Nzambe mpe asengeli lisusu kokokisaka nyonso oyo alaki Nzambe mpe bato. Tokoloba nini soki akómi na mokakatano mpo ete alakanaki na moto mosusu na likambo oyo amonaki mabe te kasi, nsima ya kotalela yango na likebi mpenza, amoni ete ezali likambo ya malamu te? Esengeli kozwa makambo ya ndenge wana na lisɛki te. Kasi nsima ya kosolola malamu, moto alakanaki na ye akoki kondima kolongola ye mokumba ya kokokisa elaka yango.​—⁠Nzembo 15:4; Masese 6:​2, 3. 

Na likambo etali kolapa ndai mpe na makambo mosusu, tosengeli koluka libosoliboso kosala nini? Tólukaka ntango nyonso kobatela boninga na biso na Yehova Nzambe.

[Bililingi na lokasa 30]

Hana akakatanaki te mpo na kokokisa ndai na ye

[Bililingi na lokasa 31]

Yefeta akokisaki ndai na ye, atako ezalaki mpasi