‘Lokola libanga ya ntalo ya motane’

NA EMONANELI moko, ntoma Yoane amonaki kiti ya bokonzi ya nkembo na likoló. Moto oyo afandaki na kiti yango azalaki komonana “lokola libanga ya yasipi.” Lisusu, azalaki lokola “libanga ya ntalo ya motane.” (Emoniseli 4:2, 3) Yango ezalaki mabanga nini?

Ezalaki te mabanga oyo engɛngaka kaka na likoló. Na ntango ya kala, liloba ya Grɛki oyo ebongolami na “yasipi” ezalaki kosalelama mpo na kolobela mabanga ya langi ndenge na ndenge, ata mpe mabanga ya ntalo oyo ezalaki lokola talatala. Na buku na ye (Word Pictures in the New Testament), Archibald Robertson alobi ete “libanga ya yasipi oyo balobeli na Emoniseli 4:3 [ezalaki] te yasipi oyo toyebi lelo, oyo etɛkamaka ntalo moke.” Lisusu, mwa mosika na mokanda ya Emoniseli, Yoane alobeli Yelusaleme, engumba ya likoló, na maloba oyo: “Kongɛnga na yango ezalaki lokola libanga ya ntalo koleka, lokola libanga ya yasipi oyo ezali kongɛngangɛnga lokola klisitali.” (Emoniseli 21:10, 11) Ekoki kozala ete mabanga oyo Yoane alobeli ezalaki mabanga oyo emonanaka na kati.

Moto oyo Yoane amonaki na emonaneli afandi na kiti ya bokonzi ezali Oyo aleki na nkembo na molɔ́ngɔ́ mobimba, elingi koloba Yehova Nzambe. Azali pɛto mpe mosantu na lolenge oyo eleki mpenza. Na boyokani na likambo yango, ntoma Yoane akomaki boye: “Nzambe azali pole mpe na bomoko elongo na ye molili ezali ata moke te.” (1 Yoane 1:5) Yango wana, Yoane alendisaki baninga na ye bandimi ‘bámipɛtola ndenge Yehova azali pɛto.’​—1 Yoane 3:3.

Tosengeli kosala nini mpo tózala pɛto na miso ya Nzambe? Ezali na ntina mingi tózala na kondima na makila ya Klisto oyo esopanaki mpo masumu na biso elimbisama. Tosengeli mpe “kotambola na kati ya pole”; elingi koloba koyekola Biblia mpe kosalela mateya na yango na bomoi na biso.​—1 Yoane 1:7.