Mituna ya batángi

Na Yisalaele ya kala, pole oyo ezalaki kongɛnga na ndenge ya likamwisi na Esika oyo Eleki Mosantu na tabenakle mpe na tempelo, pole oyo ntango mosusu babengaka Shekina, ezalaki komonisa nini?

Yehova, Tata ya bolingo mpe Mobateli ya bato na ye, azalaki komonisa polele ete azali elongo na bana ya Yisalaele. Lolenge moko oyo azalaki komonisa yango ezalaki na nzela ya lipata oyo ezali kongɛnga oyo ezalaki na esika ya losambo na ye.

Pole wana oyo ezalaki kongɛnga makasi ezalaki komonisa ete Yehova azali wana atako azalaki komonana te. Pole yango ezalaki na Esika oyo Eleki Mosantu ya tabenakle mpe na nsima na tempelo oyo Salomo atongaki. Pole wana ya kokamwa ezalaki kolimbola te ete Yehova azalaki wana. Ndako oyo bato batongi ezali moke mingi mpo Nzambe akoka kofanda wana. (2 Ntango 6:18; Misala 17:24) Pole yango oyo ezalaki kongɛnga na ndenge ya likamwisi na tempelo ekokaki kondimisa nganga-nzambe monene mpe na nzela na ye kondimisa Bayisalaele nyonso ete Yehova azali kobatela bango mpe kokokisa bamposa na bango.

Na monɔkɔ ya Aramɛyɛ, bazalaki kobenga pole yango Shekina; liloba yango elimboli “oyo efandaka” to “ndako.” Liloba Shekina ezali ata esika moko te na kati ya Biblia kasi, ezali na mabongoli ya Makomami ya Liebele na monɔkɔ ya Aramɛyɛ oyo ebengamaka mpe Targoums.

Ntango Yehova apesaki Moize malako mpo na kotonga hema, alobaki na ye boye: “Okotya [ezipeli, NW] na likoló ya sanduku, mpe okotya litatoli ekopesa ngai yo na kati ya sanduku. Ngai nakozwana na yo wana, mpe nakosolola na yo longwa na likoló ya [ezipeli, NW] na kati ya bakeluba mibale bazali na likoló ya sanduku.” (Exode 25:21, 22) Sanduku yango ezalaki na Esika oyo Eleki Mosantu mpe bapakolaki yango wolo. Ezalaki na bakeluba mibale ya wolo likoló na yango.

Yehova azalaki koloba na esika nini? Ye moko apesaki eyano ntango alobaki na Moize boye: “Nakomonana kati ya lipata na likoló ya [ezipeli, NW].” (Levitike 16:2) Lipata yango ezalaki likoló ya Sanduku mosantu na katikati ya bakeluba mibale ya wolo. Biblia elobi te soki lipata yango ezalaki molai ndenge nini to ntaka boni ekabolaki yango na bakeluba.

Lipata yango ezalaki kongɛngisa Esika oyo Eleki Mosantu. Kutu, mwinda mosusu ezalaki te na esika yango. Pole yango ezalaki kosalisa nganga-nzambe monene amona malamu ntango azalaki kokɔta na Esika oyo Eleki Mosantu na Mokolo ya Mbɔndi. Azalaki kotɛlɛma liboso ya Yehova.

Pole wana oyo ezalaki kongɛnga na ndenge ya likamwisi ezali nde na ndimbola moko boye mpo na baklisto? Ntoma Yoane azwaki emonaneli ya engumba moko oyo na kati na yango “butu ekozala te.” Engumba yango ezali Yelusaleme ya Sika, to baklisto nyonso bapakolami nsima ya lisekwa na bango ntango bakoyangela elongo na Yesu. Pole ya engumba yango ya elilingi euti na moi to na sanza te. Nkembo ya Yehova Nzambe ezali kongɛngisa engumba yango, ndenge kaka Shekina ezalaki kongɛngisa Esika oyo Eleki Mosantu. Lisusu, Yesu Klisto, Mwana mpate azali “mwinda” ya engumba yango. “Engumba” yango mpe ezali kongɛngisa na elimo bato ya bikólo nyonso oyo basikolami mpe ezali kosopela bango mapamboli.​—Emoniseli 21:22-25.

Lokola Yehova azali kosopela basambeli na ye ebele ya mapamboli wana, bakoki kondima mpenza ete Ye moko azali Mobateli na bango mpe Tata na bango ya bolingo.