Basepelaki na bango mpo balingaka Biblia

MARIANNA, elenge moko Motatoli ya Yehova oyo afandaka na engumba moko na sudi ya Italie, azali na mbula 18 mpe na kelasi ya nsuka. Atángaka na eteyelo moko ná bilenge mosusu Batatoli ya Yehova.

Marianna akomi boye: “Banda mwa bambula, na ntango ya bopemi, tozalaka na momeseno ya kotánga mokapo ya mokolo na mwa buku Tótángaka Makomami mokolo na mokolo. Tokokaki kosala yango kaka na kulware, pembeni ya ndako oyo balakisi bapemaka. Esika yango ezalaka mpenza kimya te. Balakisi mingi bazalaki komona biso ntango bazali koleka mpe bamosusu bazalaki kotɛlɛma mpo na kotala soki tozali kosala nini. Mbala mingi, bazalaki kotuna biso mituna mpe tozalaki kopesa bango biyano. Mokolo na mokolo, molakisi ata moko azalaki kotɛlɛma mpo na kosolola na biso. Bamosusu bazalaki kotɛlɛma mpo na koyoka ndenge tozalaki kotalela mokapo ya mokolo mpe bazalaki komonisa ete basepelaka na biso Batatoli mpo tomipesaka na makambo ya Nzambe. Mokolo moko, molandi ya mokambi ya eteyelo asɛngaki biso tókende kosolola na ndako oyo balakisi bapemaka.

“Ntango molakisi na biso amonaki esika oyo tosololaka, atunaki mokambi ya eteyelo soki akoki kopesa biso ndingisa ete tósalaka yango na kelasi moko epai makelele ezali te. Mokambi andimaki mpe molakisi na biso apesaki biso longonya liboso ya bana-kelasi nyonso mpo na ndakisa malamu na biso. Tozali na esengo mingi mpenza mpo na libaku malamu oyo Yehova apesi biso.”