Bóbanga te, Yehova azali na bino!

BAMBULA koleka 50, mwa moke na nsima ya kobwakama ya babɔmbi nikleere ya liboso, Harold C. Urey, oyo azwaki mbano (Prix Nobel) mpo na misala na ye ya siansi, alobaki na ntina na avenire ya bato ete: “Tokolya na nsɔmɔ, tokolala na nsɔmɔ, tokotambola na nsɔmɔ mpe tokokufa na nsɔmɔ.” Lelo oyo, kozanga ntembe, mokili etondi mpenza na nsɔmɔ, mpe yango ekoki kokamwisa biso te! Mokolo na mokolo, bazulunalo ezali kopesa bansango ya nsɔmɔ ya bato ya mobulu oyo bazali kosilisa bato mpe bamaladi ya mabemabe.

Biso baklisto toyebi ntina ya makambo oyo nyonso. Makambo yango ezali komonisa ete tozali na “mikolo ya nsuka” ya ebongiseli mabe oyo, oyo Biblia esakolaki ete ekozala “bantango ya ndenge mosusu mpe ya mpasi mpenza.” (2 Timote 3:1) Na yango, tozali na elikya makasi ete mosika te Yehova Nzambe akosala mokili moko ya sika ya boyengebene. (2 Petelo 3:13) Kasi, yango elingi nde koloba ete biso baklisto tokobanga lisusu eloko te?

Basaleli ya Nzambe mpe babangaka?

Yakobo, Davidi mpe Eliya bazali na kati ya basaleli ya Yehova oyo babangaki ntango bomoi na bango ekómaki na likama. (Genese 32:6, 7; 1 Samwele 21:11, 12; 1 Mikonzi 19:2, 3) Mibali yango bazangaki kondima te. Kutu, bazalaki kotyela mpenza Yehova motema. Nzokande, lokola Yakobo, Davidi mpe Eliya bazalaki kaka bato, bazalaki mpe kobanga. Moyekoli Yakobo akomaki ete: “Eliya azalaki moto na mayoki lokola oyo ya biso.”​—Yakobo 5:17.

Biso mpe tokoki kobanga ntango tokutani na mokakatano moko to tokanisi ete mokakatano moko ekokómela biso. Kobanga ya ndenge wana ezali mabe te. Tóbosana te, Biblia elobi ete Satana Zabolo azali mpenza na ekateli ya ‘kobunda’ ná baoyo “bazali kotosa bakomandema ya Nzambe mpe bazali na mosala ya kopesa litatoli na ntina etali Yesu.” (Emoniseli 12:17) Atako maloba yango ezali kolobela libosoliboso baklisto bapakolami, Paulo akomaki boye: “Baoyo nyonso bazali na mposa ya kozala na bomoi na ezaleli ya kokangama na Nzambe na kati ya boyokani elongo na Klisto Yesu bango mpe bakonyokwama.” (2 Timote 3:12) Kasi, tóbangaka te koleka ndelo soki tokutani na mikakatano. Mpo na nini?

“Nzambe ya kobikisa”

Davidi mokomi ya nzembo akomaki boye: “Nzambe na biso azali Nzambe ya kobikisa.” (Nzembo 68:20) Yehova amonisá mbala na mbala ete azali na makoki ya kobikisa basaleli na ye, ezala na kolongola bango na mpasi to na kopesa bango makasi ya koyika mpiko. (Nzembo 34:17; Danyele 6:22; 1 Bakolinti 10:13) Okoki komikundola mbala boni otángaki masolo ya “kobikisa” ya Nzambe na boyekoli na yo ya Biblia?

Luká na kati ya buku Index des publications de la Société Watch Tower,a masolo lokola Mpela ya ntango ya Noa, kobikisama ya Lota ná bana na ye ya basi na Sodoma ná Gomola, kobima ya Bayisalaele na Ezipito mpe ndenge bakatisaki Mbu Motane na makolo, to ndenge mayele mabe ya Hamana mpo na koboma Bayuda esukaki. Kotánga masolo ya boye mpe kokanisa na yango na mozindo ekondimisa yo mpenza ete Yehova azali Nzambe ya misala ya kobikisa. Mpe soki okutani na komekama, yango ekosalisa yo obanga te.

Bandakisa ya mikolo na biso

Okoki koyeba bato oyo bayikelaki mikakatano mpiko na esika oyo ofandi? Ekoki kozala mbala mosusu bato oyo bakɔtaki bolɔkɔ mpo batikalaki sembo epai na Nzambe. Mbala mosusu oyebi moklisto moko ya mobange oyo azali kosalela Yehova atako nzoto ezali lisusu malamu te. To kanisá bilenge oyo bazali koboya kokɔta na makambo ya mokili atako baninga na bango ya kelasi bazali koluka kobenda bango na makambo yango. To mpe moboti oyo azali kobɔkɔla bana ye moko kozanga molongani to baoyo bazali kosalela Yehova atako bazali kotungisama mpo bazangi balongani. Ozwaka liteya nini ntango omonaka bango? Etamboli na bango ya sembo ekoki kosalisa yo oyika mpiko mpe obanga te ntango okutani na mikakatano ata ya ndenge nini.

Tosengeli kobanga te kaka ntango tokutani na botɛmɛli mpe minyoko, kasi mpe soki tokómi na ntembe na motema ete Yehova alingaka biso te. Tosengeli kozala na kondima makasi ete Klisto amikabaki mpo na mokomoko na biso. (Bagalatia 2:20) Soki tosali bongo, tokoki kopusana penepene na Yehova kozanga kobanga. Soki tozali kokanisa ete Yehova akoki kolinga biso te, tokoki kokanisa maloba oyo Yesu alobaki na bayekoli na ye: “Batɛkaka te bakɛngɛli-mboka mibale na mbongo moko ya ebende ya motuya moke? Nzokande moko te na yango ekokwea na nse kozanga ete Tata na bino ayeba. Kasi nsuki mpenza ya motó na bino etángami yango nyonso. Na yango bóbanga te: Bino boleki bakɛngɛli-mboka ebele na motuya.”​—Matai 10:29-31.

Mbala mingi, Linɔ́ngi ya Mosɛnzɛli ná Lamuká! ebimisaka masolo ya Batatoli ya Yehova ya mikolo na biso oyo babangaki te ntango bakutanaki na mikakatano. Yango elingi koloba te ete bazalaki ata mokolo moko te komitungisa mpo na mikakatano na bango. Kasi, bapesaki nzela te ete mikakatano yango epekisa bango kosalela Yehova. Masolo na bango oyo ebimá na mikanda ekoki kosalisa yo mpe olongola kobanga. Tózwa ndakisa mibale:

Likama oyo ebongolaki bomoi na ye

Lamuká! ya 22 Aprili 2003 ezali na lisolo oyo elobi: “Likama oyo ebongolaki bomoi na ngai.” Na lisolo yango, Stanley Ombeva, Motatoli moko ya Yehova na Kenya, alobeli mikakatano oyo ekómelaki ye nsima ya likama ya motuka. Lokola nzoto na ye ebebaki, abungisaki mosala na ye mpe makambo nyonso ya malamu oyo azalaki kozwa na mosala yango. Ndeko Ombeva alobi ete : “Ntango nayebaki maladi na ngai malamu, nakómaki komona kaka ete esili na ngai, nakómaki nkandankanda mpe komitalela kaka ngai moko. Ntango mosusu nazalaki kosilika mpambampamba.” Atako azalaki kotungisama makasi, Ombeva ayikaki mpiko. Atikaki te ete mawa na ye emɛla ye libela. Atyelaki nde Yehova motema mobimba. Abakisi ete: “Yehova azalaki ntango nyonso kosunga ngai, mpe nakómaki kutu ntango mosusu koyoka nsɔni. Nazwaki ekateli makasi ya kotánga mpe kokanisa na mozindo na bavɛrsɛ ya Biblia oyo nayebaki ete ekoki kobɔndisa ngai.”

Makambo ya bosembo oyo Ndeko Ombeva alobaki esalisaki ebele ya bandeko mosusu báyikela mikakatano mpiko kozanga kobanga. Ndeko moko ya mwasi akomaki ete: “Ntango natángaki lisolo yango, mai ya miso etangaki ngai. Namonaki mpenza ete na nzela ya lisolo wana, Yehova azalaki komonisa ngai bolingo na ye mpe kobɔndisa ngai.” Motatoli mosusu akomaki boye: “Masolo lokola oyo, ezali kolendisa biso baoyo tozali kotungisama mpe konyokwama na mitema lokola Ombeva.”

Ndenge ya kolonga mitungisi

Lisolo mosusu ya kolendisa ezali oyo ya Herbert Jennings, oyo ebimaki na lisolo: “Oyebi te ndenge bomoi na yo ekozala lobi.”b Ndeko Jennings abɛlaka maladi ya motó. Na ntina na ntango oyo maladi na ye ebandaki, alobaki boye: “Koyangana na makita ya boklisto ekómaki etumba. Kasi, nayebaki ete koyangana na makita ezali na ntina mingi. Mpo na yango, nazalaki na momeseno ya kokɔta na Ndako ya Bokonzi soki bato bafandi mpe soki makita esili, nazalaki kobima liboso ya bandeko nyonso.”

Kosakola ezalaki mpe mpasi. Ndeko Jennings abakisi boye: “Ntango mosusu, soki nakómi na lopango moko, nazalaki kokoka te kobɛta monɔkɔ ya lopango. Nzokande, nazalaki kotika te, mpamba te nayebi ete mosala na biso ezali kobikisa biso moko mpe bato nyonso oyo bazali kondima yango. (1 Timote 4:16) Na nsima, nazalaki kokanga motema, kokende na lopango oyo elandi mpe komeka lisusu kobɛta. Lokola nazalaki kokoba kosakola, nalɛmbaki te na elimo mpe yango ebakiselaki ngai makoki ya kolonga mokakatano na ngai.”

Lisolo wana ya Ndeko Jennings esalisaki batángi mingi oyo bazalaki kotungisama bázala na mpiko lokola ye. Na ndakisa, ndeko moko ya mwasi akomaki ete: “Na boumeli ya mbula 28 oyo nazali kotánga Linɔ́ngi ya Mosɛnzɛli ná Lamuká!, naino natángá te lisolo oyo esimbá motema na ngai makasi lokola oyo. Lokola nasengelaki kotika mosala ya mobongisi-nzela, nakómaki komona lokola namemi ngambo; nazalaki koloba na motema ete soki nazalaki na kondima makasi nalingaki kotika yango te. Nsima ya kotánga ndenge Ndeko Jennings atikaki mosala ya ntango nyongo mpo na komisalisa esalisaki ngai natalela likambo na ngai na bokatikati. Yehova ayokaki mpenza mabondeli na ngai!”

Ndeko mobali moko mpe akomaki boye: “Nsima ya kosala mbula zomi lokola nkulutu ya lisangá, nasengelaki kotika mokumba yango mpo na maladi ya motó. Lokola nazalaki kotungisama mingi, mbala mingi nazalaki kokoka te kotánga masolo ya bomoi, masolo oyo mbala mingi elobelaka makambo minene oyo basaleli ya Yehova bazali kosala. Kasi, mpiko ya Ndeko Jennings elendisi ngai mingi. Nazongelá lisolo yango mbala na mbala.”

Tókende liboso na elikya nyonso

Lokola Ndeko Ombeva ná Jennings, Batatoli ya Yehova mingi bazali kokoba kosambela Yehova na mpiko atako bazali kokutana na mikakatano makasi. Soki yo mpe ozali na kati na bango, topesi yo longonya. Kobosana te likambo oyo: “Nzambe azali te moto oyo azangi boyengebene mpo abosana mosala na bino mpe bolingo oyo bomonisaki mpo na nkombo na ye, na ndenge bosalelaki basantu mpe bozali kokoba kosalela bango.”​—Baebele 6:10.

Kaka ndenge Yehova asalisaki basaleli na ye ya sembo na ntango ya kala bálonga banguna na bango, akoki mpe kosalisa yo olonga mokakatano nyonso oyo ekoki kokómela yo. Na yango, kobosana te maloba oyo Yehova alobaki na nzela ya mosakoli Yisaya: “Bangá te, zambi ngai nazali na yo; yoká nsɔmɔ te mpo ete ngai nazali Nzambe na yo. Nakokembisa yo, nakosunga yo, nakotombola mpe yo na lobɔkɔ na ngai ya boyɛngɛbɛnɛ.”​—Yisaya 41:10.

[Maloba na nse ya lokasa]

[Bililingi na lokasa 16]

Lokola Stanley Ombeva (na likoló) mpe Herbert Jennings (na lobɔkɔ ya mobali), Batatoli mingi bazali kosalela Yehova na mpiko

[Maloba mpo na kolimbola eutelo ya bafɔtɔ na lokasa 14]

Fɔtɔ ya USAF