Alingaki bomoi mpe bato

DANIEL SYDLIK, oyo aumeli mingi na Lisangani ya Mikóló-Bakambi ya Batatoli ya Yehova, asukisaki bomoi na ye awa na mabelé mwamibale 18 Aprili 2006. Azalaki na mbula 87 mpe asalaki na Betele ya Brooklyn, na etúká ya New York, na boumeli ya mbula 60.

Ndeko Dan, ndenge baninga na ye ya motema bazalaki kobenga ye, ayaki na Betele na 1946. Liboso, azalaki mobongisi-nzela monene na etúká ya Californie, mpe na Etumba ya Mibale ya mokili mobimba, akɔtaki bolɔkɔ mpo aboyaki kokɔta na politiki. Makambo oyo akutanaki na yango na eleko wana, elobelamaki na lisolo ya bomoi na ye, oyo ebimaki na Linɔ́ngi ya Mosɛnzɛli ya 1 Yuni 1985, oyo ezalaki na motó ya likambo: “Que ton amitié est précieuse, ô Dieu!”

Ndeko Sydlik ayebanaki lokola moto ya komikitisa, oyo bandeko bazalaki kokakatana te kosolola na ye. Ntango azalaki kotambwisa mokapo ya mokolo na Betele, maloba na ye ya ebandeli oyo: “Ezali malamu ndenge tozali na bomoi mpo na kosalela Nzambe ya solo mpe ya bomoi,” ezalaki komonisa ete azalaki na kondima makasi mpe alingaki bomoi. Na masukulu na ye, azalaki kolendisa basusu bákóma kotalela makambo lokola ye. Asalaki masolo lokola oyo: “Esengo ezali na bato oyo [Yehova] azali Nzambe na bango,” “Bómonisa esengo ya Yehova,” “Bóboma te mɔtɔ ya elimo ya Nzambe,” mpe “Makambo malamu mingi ekoya.”

Na 1970, Ndeko Sydlik abalaki Marina Hodson, oyo autaki na Angleterre, azalaki koloba ete ndeko mwasi yango “azali likabo ya Nzambe.” Basalelaki Yehova elongo mbula koleka 35.

Na boumeli ya bambula oyo asalaki na Betele, ndeko Sydlik asalaki na badepartema ndenge na ndenge, na ndakisa asalaki na departema ya imprimerie mpe na oyo ya Bokomi. Asalaki mpe na radio WBBR. Na nsima, na sanza ya Novɛmbɛ 1974, akómaki moko ya Mikóló-Bakambi mpe, nsukansuka, asalaki na Komite oyo etalelaka bandeko oyo basalaka na Betele mpe na Komite ya Bokomi.

Na boumeli ya mbula koleka 30 oyo ndeko Sydlik asalaki na Komite oyo etalelaka bandeko ya Betele, amonisaki ete azalaki mpenza kolinga bato. Azalaki kolendisa bato mingi na mongongo na ye ya makasi mpe kolobela ntango nyonso libaku malamu oyo tozali na yango ya kosalela Yehova. Azalaki komonisa mbala na mbala ete bolamu ya solosolo eutaka na bozwi to makambo mosusu te, kasi nde na boyokani na biso ná Yehova mpe na lolenge oyo totalelaka bomoi.

Atako bandeko ya Betele bamonaka lisusu ndeko Sydlik te, kasi babosanaka te ndakisa na ye, ya moto oyo alingaki mpenza bomoi mpe bato. Tozali na elikya ete azali moko ya bato oyo Emoniseli 14:13 elobeli ete: “Esengo na bakufi oyo bazali kokufa na bomoko elongo na Nkolo banda sikoyo. Ɛɛ, elimo elobi ete, tiká bápema na misala makasi oyo basalaki, mpo makambo oyo basalaki ezali kokende na bango nzela moko.”