Mabe ekoki kosila te?

Mwana moko ya mobali ya moke alɔkɔti bɔmbi na elanga mpe bɔmbi yango ebomi ye miso mpe ebebisi ye mpenza nzoto. Mama moko asundoli bebe na ye oyo auti kobota, abombi ye na kati ya ekunde moko na pembeni ya balabala. Moto moko oyo balongolaki na mosala azongi na esika azalaki kosala mpe abomibomi bato nyonso oyo akutani na bango mpe na nsima amibomi. Moto moko oyo bato bapesaka lokumu asangisi nzoto na bana mike.

LIKAMBO ya mawa ezali ete, makambo ya ndenge wana ekómi koyokana mingi mpenza na ntango na biso. Likambo ya mawa lisusu koleka ezali ete bansango yango ezali kolobela bato oyo bazali koboma bato ya bikólo mosusu na mokano ya kosilisa bango, terorisme mpe bongo na bongo. Zulunalo moko oyo ebimaki na 1995 elobaki ete: “Mabe mingi oyo esalemi na ekeke ya 20 emonisi mpenza ete ekeke yango ezali ya Satana. Ata na ekeke moko te liboso, bato bazwá mayele mpe mposa ya koboma bamilio ya bato mosusu mpo bazali bato ya mposo mosusu, lingomba mosusu to mpo bazali bazwi to babola, ndenge ezali kosalema na ekeke oyo.”

Lisusu, bato bazali kobebisa mopɛpɛ, mabelé mpe biloko na yango, mpe yango ezali kosala ete lolenge mingi ya banyama elimwa. Bato bakoki kosilisa mabe nyonso wana mpe kokómisa mabelé esika moko kitoko mpe ya kimya? To komeka kosala bongo ekozala nde lokola moto azali komeka komɛla mai na kanya? Profesɛrɛ moko oyo akomaki mingi mpo na likambo etali mabe, alobaki boye: “Nazalaki na mposa makasi mpenza ya kobongola mokili mpe kobongisa yango. Kasi, emonani polele ete mokili ezali kobonga te.” Ntango mosusu yo mpe omonaka bongo.

Ndenge oyo mokili ezali kotambola ezali lokola masuwa oyo ezali kotambola na kati ya mbu oyo mbonge mpe makama ezali kobakisama mokolo na mokolo. Atako moto moko te alingi masuwa yango ebunga, milende nyonso oyo bato bazali kosala mpo na kozongisa yango na nzela ezali kolonga te. Mopɛpɛ ya makasi ezali komema masuwa yango mbangumbangu.

Tokoki koloba ete soki makambo ebebi mpenza makasi boye, ekoki kozala mpe mpo na kozanga kokoka ya bato. (Baloma 3:23) Atako bongo, ndenge oyo mabe ezali kobakisama emonisi ete nguya mosusu ezali na nsima na yango. Ekoki kozala ete nguya moko ya mabe mpenza oyo emonanaka te nde ezali kotinda bato básala mabe? Soki ezali bongo, nguya yango ezali nini mpe ndenge nini tokoki komibatela na yango? Lisolo oyo elandi ekoyanola na mituna yango.

[Maloba mpo na kolimbola eutelo ya bafɔtɔ na lokasa 3]

© Heldur Netocny/Panos Pictures