Pusaná penepene na Nzambe

Mobateli ya mpate oyo akipaka yo

Matai 18:12-14

‘NZAMBE akipaka ngai mpenza?’ Soki omituná motuna wana, yebá ete ozali yo moko te. Mingi kati na biso tokutanaka na makambo ya mpasi, mpe ntango mosusu tokoki komituna soki Mozalisi ya molɔ́ngɔ́ oyo atyelaka mpenza biso likebi. Tosengeli kozwa eyano na motuna oyo: Yehova Nzambe akipaka mpenza mokomoko na biso? Ntango azalaki awa na mabelé, Yesu, oyo ayebaki Yehova malamu mpenza apesaki ndakisa moko oyo epesi eyano oyo ezali mpenza kosimba motema.

Asalelaki ndakisa ya mobateli ya mpate, mpe alobaki ete: “Soki moto moko azali na bampate monkama mpe moko na yango ebungi, akotika te ntuku libwa na libwa na bangomba mpo na kokende koluka oyo ebungi? Mpe soki ekómi ete amoni yango, nazali koyebisa bino ya solo, akosepela mingi mpo na yango koleka mpo na ntuku libwa na libwa oyo ebungaki te. Ndenge moko ezali likambo ya malamu te mpo na Tata na ngai oyo azali na likoló ete moko ya bana oyo ya mike abeba.” (Matai 18:12-14) Tótala ndenge nini Yesu asaleli ndakisa yango mpo na komonisa ndenge Yehova akipaka mosambeli na ye mokomoko.

Na ntango ya kala, mobateli ya mpate azalaki koyeba ete azali na mokumba liboso ya mpate na ye mokomoko. Soki mpate moko ebungi, azalaki koyeba oyo wapi ebungi. Ayebaki mpate mokomoko na nkombo oyo ye moko apesaki yango. (Yoane 10:3) Mobateli ya mpate oyo akipaka etonga na ye, azalaki kokoba koluka mpate oyo ebungi tii ntango ekozonga na etonga. Ntango akei koluka mpate oyo ebungi, azalaki kotika te bampate 99 oyo etikali na likama. Babateli ya mpate bazalaki mbala mingi esika moko, mpe yango ezalaki kosala ete bitonga na bango esangana na bitonga mosusu.a Na yango, mobateli ya mpate oyo azalaki kokende koluka mpate oyo ebungi, azalaki kotika bampate na ye mosusu mpo na mwa ntango na mabɔkɔ ya baninga na ye babateli ya mpate. Soki amoni mpate yango mpe ezoki te, mobateli yango akopumbwa na esengo. Akomema yango na lipeka na ye, akozongisa yango na etonga epai ekoki kobatelama.​—Luka 15:5, 6.

Ntango Yesu azalaki kolimbola ndakisa yango, alobaki ete Nzambe alingaka te ete “moko ya bana oyo ya mike abeba.” Liboso, Yesu akebisaki bayekoli na ye ete bábɛtisa “moko ya bato mike oyo bandimelaka [ye]” libaku te. (Matai 18:6) Na yango, ndakisa wana ya Yesu eteyi biso nini na ntina na Yehova? Azali mobateli ya mpate oyo akipaka mpate na ye mokomoko, ezala “bato mike,” elingi koloba baoyo bato bamonaka mpamba. Ya solo, na miso ya Nzambe, mosambeli na ye mokomoko azali na ntina.

Soki olingi koyeba ete ozali na ntina na miso ya Nzambe, luká koyeba makambo mingi na ntina etali Yehova Nzambe, Mobateli Monene ya mpate, mpe ndenge okoki kosala mpo opusana penepene na ye. Soki osali bongo, okoki kokóma na kondima lokola ntoma Petelo, oyo na ntembe te, ayokaki mpenza ntango Yesu apesaki ndakisa ya mpate oyo ebungi. Na nsima, Petelo akomaki boye: ‘Bwaká mitungisi na yo likoló na Nzambe, mpamba te ye atyelaka yo likebi.’​—1 Petelo 5:7.

[Maloba na nse ya lokasa]