Imprimerie moko ya kokamwa

EKOKI kozala ete oyo ezali mbala ya liboso te nde omoni zulunalo oyo ozali kotánga sikoyo. Ntango mosusu, Batatoli ya Yehova basilá koya na ndako na yo mpe bapesaki yo Linɔ́ngi ya Mosɛnzɛli mpe Lamuká! mpo na kosalisa yo oyeba Biblia malamu. To mbala mosusu, omoná Batatoli ya Yehova bazali kolakisa bazulunalo yango na balabala to na zando. Kutu, zulunalo yango ebimaka koleka milio 35 sanza na sanza; na mokili mobimba, zulunalo yango ezali zulunalo oyo ebimaka mingi koleka bazulunalo mosusu nyonso oyo elobelaka makambo ya Nzambe.

Kasi, osilá komituna soki bazulunalo yango nyonso esalemaka wapi mpe ndenge nini? Mpo na kozwa eyano, tólobela naino imprimerie oyo ezali na Wallkill, na etúká ya New York, na États-Unis​—moko na baimprimerie ya Batatoli ya Yehova oyo ezali na mikili ndenge na ndenge. Bato mingi oyo batángaka mikanda na biso na mokili mobimba bazali na makoki te ya kokende kotala imprimerie ya Batatoli ya Yehova na États-Unis; na yango, lisolo oyo mpe bafɔtɔ ekosalisa bango báyeba imprimerie yango.

Nzokande, liboso ya kobimisa mikanda, esɛngaka naino kokoma makambo oyo ekozala na mikanda yango. Na nzela ya ordinatɛrɛ, Departema ya Bokomi oyo ezali na Brooklyn, New York, etindelaka Departema ya Infographie makambo oyo esengeli kokende na imprimerie. Kuna, bakomaka makambo yango likoló ya manzanza oyo ekokɔta na masini ya imprimerie. Sanza na sanza, barulo soki 1400 ya papye ekómaka na imprimerie, na Wallkill; mpe imprimerie yango esalelaka tɔni soki 80 to 100 ya papye na mokolo. Bakɔtisaka barulo yango ya papye, oyo mosusu ezalaka kilo koleka 1362, na bamasini mitano ya minene mpo makambo oyo ezali likoló ya manzanza enyatama na bapapye. Na nsima, bakataka bapapye yango oyo ezali na makomi na mezire oyo ebongi mpe bakangisaka yango mpo ezala mokanda ya nkasa 32. Zulunalo oyo ozali kotánga sikoyo ezali mokanda moko ya nkasa 32. Bongo babuku? Mpo na kosala babuku, basangisaka mikanda mingi ya nkasa 32. Ezali na bamasini mibale oyo ekangisaka mikanda; na mokolo moko mpamba, moko na yango ekoki kobimisa babuku 50 000 oyo ezali na ezipeli ya makasi to babuku 75 000 oyo ezali na ezipeli ya pɛtɛpɛtɛ. Masini mosusu oyo ekangisaka mikanda ekoki kobimisa babuku soki 100 000 ya ezipeli ya pɛtɛpɛtɛ na mokolo.

Na 2008, imprimerie yango ebimisaki babuku koleka 28 000 000, kati na yango Babiblia koleka 2 600 000. Kaka na mbula yango, bazulunalo 243 317 564 ebimisamaki. Imprimerie yango ebimisaka mikanda na minɔkɔ soki 380. Soki basilisi kobimisa mikanda, nini esalemaka na nsima?

Masangá 12 754 ya Batatoli ya Yehova ya États-Unis mobimba mpe masangá 1 369 ya bisanga ya Caraïbes mpe ya Hawaii etindaka bakomande ya mikanda na biro ya imprimerie yango. Departema ya kotinda mikanda etyaka na bakartɔ mikanda oyo masangá esɛngaki mpe ezwaka bibongiseli mpo na kotinda yango na bisika oyo esengeli. Sanza na sanza, kilo soki milio 14 ya mikanda etindamaka na masangá ya États-Unis.

Oyo eleki ntina na imprimerie yango ezali bamasini te, kasi bato oyo basalaka kuna. Bato koleka 300 basalaka na bapartema ndenge na ndenge ya imprimerie (Infographie, planification, konyata mikanda, kokangisa mikanda, mpe Departema ya kotinda mikanda). Bato nyonso oyo basalaka kuna bafutamaka te; bazali na mbula kobanda 19 tii 92.

Mposa na bango ya libosoliboso ezalaka ya kosalisa bato, baoyo nyonso bakozwa mikanda yango na esengo mpe bakondima koteyama, kolendisama mpe kotambwisama na mitinda ya Biblia oyo ezali na mikanda yango. Tozali na elikya ete ozali moko ya batángi ya ndenge wana mpe ete mikanda oyo ezali kobimisama awa esalisaka yo okoba kozwa boyebi ya Yehova Nzambe mpe ya Yesu Klisto, oyo ekopesa yo bomoi ya seko.​—Yoane 17:3.

[Bililingi na lokasa 16]

[Elilingi na lokasa mobimba 17]