Mokanda ya Biro

Bandeko basakoli ya Bokonzi:

“Nzambe azalaki kokolisa.” (1 Kol. 3:6) Ezali likambo ya esengo mpenza komona bokoli oyo esalemi na Congo-Brazzaville mpe Congo-Kinshasa! Na boumeli ya mobu ya mosala 2003, bato koleka 100 000 babandaki koyekola Biblia. Bobongi mpenza kozwa longonya mpo na yango.

Yehova azali kopambola mosala ya kosakola na teritware na biso oyo ezali na minɔkɔ ndenge na ndenge. Mpo mosala ya kobimisa mikanda na minɔkɔ ya teritware na biso etambola malamu lisusu koleka, Lisangani ya Mikóló-Bakambi ezwi ekateli ete babiro mosusu mibale efungwama mpo na kobongola mikanda na minɔkɔ yango: biro moko na Lubumbashi, na province ya Katanga (R.D.C.), mpo na monɔkɔ ya Kiluba mpe ya Uruund, mpe mosusu na Mbuji-Mayi, na Kasai oriental (R.D.C.), mpo na monɔkɔ ya Otetela mpe ya Tshiluba. Babiro yango ezali kaka Betele. Bafungoli babiro yango mpo na kosalisa bandeko oyo babongolaka mikanda na minɔkɔ yango bázala esika oyo balobaka minɔkɔ yango.

Mosala ezali kosalema mpo na koyeisa monene ndako ya konyata mikanda oyo ezali na fɛrmɛ ya Wallkill, na etúká ya New York (États-Unis) mpo na kobimisa mikanda ebele na kotalela bokoli oyo ezali komonana na mokili mobimba na mosala ya kosakola. Mosala ya kobakisa ndako oyo ezali monene ya hectares 1,4 ezali kotambola malamu. Ndako yango oyo bazali kobakisa ekokani na Bandako ya Bokonzi 30 ya mwa minene. Masini mibale ya minene ya modɛlɛ ya sika mpo na konyata mikanda ekotyama na ebandeli ya mobu 2004. Masini mokomoko ekoki konyata bazulunalo 25 na segɔnde moko. Masini mosusu ya kokangisa nkasa ya mikanda mpe mosusu oyo ekosalisa na mosala ya kotinda mikanda bipai na bipai ekotyama mpe kaka na mobu 2004. Masini yango ekosala mosala mingi mpe ekosɛnga basali mingi te.

Na ebandeli ya mobu ya mosala 2004 oyo, tozali kobondela Yehova elongo na bino mpo ‘alanda kokolisa.’

Bandeko na bino,

Biro ya filiale ya Congo (Kinshasa)