“Moto oyo apesaka mbano na baoyo bazali koluka ye na mposa makasi”

Yehova azwaka na motuya makambo oyo basaleli na ye basalaka mpo na kosepelisa ye? Bato mosusu bakoki koloba ete ezali bongo te mpe akipaka biso te. Kasi, koloba boye etindaka bato bákanisa ete Nzambe azali mabe. Biblia, Liloba na ye emonisi makambo polele. Emonisaka biso ete Yehova asepelaka na milende oyo basaleli na ye ya sembo basalaka. Tótalela maloba ya ntoma Paulo oyo ezali na Baebre 11:6.

Esɛngaka nini mpo na kosepelisa Yehova? Ntoma Paulo akomaki: “Soki moto azali na kondima te akoki kosepelisa [Nzambe] ata moke te.” Simbá ete ntoma Paulo alobi te ete ezali mpasi kosepelisa Nzambe soki ozali na kondima te. Kasi, alobi nde okokoka ata moke te kosepelisa Nzambe soki ozali na kondima te. Na maloba mosusu, kondima ezali na ntina mingi mpo na kosepelisa Nzambe.

Yehova asepelaka na kondima ya ndenge nini? Kondimela Nzambe esɛngaka makambo mibale. Ya liboso, ‘tosengeli kondima ete ye azali.’ Ndenge nini tokoki kosepelisa Nzambe soki tozali kondima te ete azali mpenza? Kondima ya solo esɛngaka makambo mingi, mpo ata bademo mpe bandimaka ete Yehova azali. (Yakobo 2:19) Kondima ete Nzambe azali esengeli kotinda biso tómonisa yango na misala, elingi koloba, kozala na bomoi oyo esepelisaka ye.​—Yakobo 2:20, 26.

Ya mibale, ‘tosengeli kondima ete’ Nzambe azali “moto oyo apesaka mbano.” Moto oyo azali na kondima ya solosolo ayebaka mpenza ete milende oyo azali kosala mpo na kosepelisa Nzambe ezali mpamba te. (1 Bakorinti 15:58) Ndenge nini tokoki kosepelisa Yehova soki tozali kondima te ete azali na likoki to na mposa ya kopesa biso mbano? (Yakobo 1:17; 1 Petro 5:7) Moto oyo alobi ete Nzambe azali mafumafu, azalaka na botɔndi te mpe akabaka te, ayebi Nzambe oyo Biblia elobeli te.

Yehova apesaka banani mbano? Ntoma Paulo alobi: “Baoyo bazali koluka ye na mposa makasi.” Buku moko ya babongoli ya Biblia emonisi ete maloba ya Grɛki oyo ebongolami na “koluka na mposa makasi” elimboli kosala milende mpo na kosambela Nzambe, kasi kaka te koluka ye to koyekola makambo na ye. Buku mosusu elobi ete verbe wana ya Grɛki ezali na likanisi ya kotinda moto asala milende mpenza to kotya makanisi nyonso na likambo moko. Ya solo, Yehova apesaka mbano na baoyo kondima na bango etindaka bango basambela ye na motema na bango mobimba, na bolingo na bango mpe na molende.​—Matai 22:37.

Mbano nini Yehova apesaka basaleli na ye ya sembo? Alaki biso likabo moko ya motuya mingi na mikolo ezali koya, oyo ezali komonisa ete akabaka mingi mpe alingaka biso. Likabo yango ezali: bomoi ya seko na paradiso awa na mabele. (Emoniseli 21:3, 4) Ata sikoyo, baoyo balukaka Yehova na mposa makasi bazwaka mapamboli mingi. Na lisalisi ya elimo santu na ye mpe ya bwanya oyo ezali na Liloba na ye, bazalaka na bomoi ya esengo mpe ya malamu.​—Nzembo 144:15; Matai 5:3.

Ya solo, Yehova azali Nzambe oyo azalaka na botɔndi mpo na mosala ya sembo ya basaleli na ye. Koyeba bongo etindi yo opusana penepene na ye? Soki ezali bongo, mpo na nini te koyekola ndenge oyo okoki kokóma to komonisa kondima oyo ekosala ete Yehova apesa yo mbano?