Kotalelama na Yehova—Mpo na nini ezali na litomba?
1 Moto nyonso alingaka kozala na nzoto kolongɔ́nɔ́; na bongo bomoi ekozala mpenza malamu koleka. Yango wana, ata bato oyo bazali na nzoto kolongɔ́nɔ́ basalisaka mbala na mbala ekzamɛ́ ya nzoto epai ya monganga. Mpo na nini? Mpo ete balingaka koyeba soki bokɔnɔ moko ebombami; na bongo bakozwa meko mpo na komisalisa ntango yango ezali naino na ebandeli. Kasi eleki mpenza ntina ete tósɛnzɛlaka mpo na kolongɔ́nɔ́ na biso ya elimo. Mpo ete tóndimama na Yehova, tosengeli kotikala ‘makasi kati na kondima.’—Tito 1:13.
2 Oyo ezali ntango ya komitika kotalelama na Yehova. Mpo na nini bongo? Mpamba te Yehova azali na tempelo na ye ya bulɛɛ mpe azali kotalela mitema ya bato nyonso. (Nz. 11:4, 5; Mas. 17:3) Lokola Davidi, tozali kosɛnga na Yehova ete atalela biso na mobimba: “Ɛ [Yehova], meká ngai mpe sosolá ngai, [“pɛtolá,” NW] motema na ngai mpe makanisi na ngai.”—Nz. 26:2.
3 Lokola nzoto na biso ezangi kokoka, tosengeli kosɛnzɛla mpo na ezaleli nyonso oyo ezali kati na motema na biso, oyo ekoki kotya kolongɔ́nɔ́ na biso ya elimo na likámá. Masese 4:23 epesi toli oyo ete: “Batelá motema na yo na mpiko nyonso mpo ete makambo na bomoi ikoutaka wana.”
4 Kolongɔ́nɔ́ na biso ya elimo ezali mpe na likámá liboso na mokili oyo ezingi biso, oyo ebebisami mpe etondi na etamboli ya mbindo. Soki tomitiki kozala pene mpenza na ebongiseli oyo mabe, tokokóma kokanisa lokola yango mpe komekola bizaleli mpenza ya mokili. To mpe tokoki komekola lolenge ya bomoi oyo mokili ezali kokumisa mpe bongo kozwama na elimo na yango.—Ef. 2:2, 3.
5 Mpo na kobebisa biso na elimo, Satana akoki kosalela minyoko to botɛmɛli ya polele. Kasi mingimingi, na lolenge ya bokosi, asalelaka bopusi ya mokili. Petelo asɛngi na biso ete ‘tótikala na makanisi na biso ya sembo mpe tósɛnzɛlaka,’ mpo ete Satana azali “lokola nkɔsi konguluma, kolukáká soko akolya nani.” Tóbyangami ete ‘tótɛmɛla ye makasi kati na kondima.’—1 Pet. 5:8, 9.
6 Ezali mpenza na ntina ete tóbatela kolongɔ́nɔ́ na biso ya elimo na kozaláká na kondima makasi, kondima oyo ezali kobatelama mokolo na mokolo. Ntoma Paulo azali kopesa biso toli ete tómekaka ntango nyonso kondima na biso. Mayele ezali kotinda biso ete tólanda batoli ya monganga malamu; lolenge moko, esengeli na biso ete tóyoka Yehova ntango ekzamɛ́ na ye ya elimo emonisi biso ete tozali na maladi oyo tosengeli komisalisa na yango. Na kosaláká bongo, ‘tokomibongisa na elimo.’—2 Kol. 13:5, 11.
7 Na ntembe te, Yehova azali mpenza Monganga monene koleka minganga mosusu nyonso. Makambo oyo ye amonaka na ekzamɛ́ na ye mazalaka ntango nyonso ya solo. Ayebi malamumalamu nini tozali na yango mposa. Na lisalisi ya Liloba na ye mpe na “moombo ya sembo,” azali kopesa biso bilei kitoko ya elimo lokola nkisi. (Mat. 24:45; 1 Tim. 4:6) Na kozaláká na momeseno ya kolya bilei yango kitoko ya elimo, ezala na ndako na biso to na makita ya lisangá, tokozala na kolongɔ́nɔ́ na elimo. Kosala mpe ngalasisi ya elimo mbala na mbala, na nzela ya mosala na biso ya kosakola mpe misala mosusu ya boklisto, ezali mpe na litomba. Yango wana, tómitika kotalelama mbala na mbala na Yehova, awa toyebi ete akopesa biso kolongɔ́nɔ́ ya elimo.