Tokoki kosala misala minene koleka
1 Na mosala na ye ya kosakola, Yesu asalaki misala minene. Na lolenge ya likamwisi, aleisaki bankóto ya bato, abikisaki bato mingi ya maladi, mpe asekwisaki basusu. (Mat. 8:1-17; 14:14-21; Yoa. 11:38-44) Mosala na ye ya kosakola ebendaki likebi ya ekólo mobimba. Kasi, na mpokwa ya mokolo ya nsuka liboso ya liwa na ye, ayebisaki bayekoli na ye ya sembo ete: “Ye oyo akondima ngai, akosala mpe misala ngai nazali kosala, mpe akosala misala minene koleka oyo.” (Yoa. 14:12, NW) Lolenge nini tokoki kosala misala ‘minene’?
2 Na kosakoláká teritware mobimba: Mosala ya kosakola oyo Yesu asalaki esukaki na Palestine, kasi ayebisaki bayekoli na ye ya liboso ete bakotatola “kino bipai bileki mosika na mokili,” elingi koloba koleka bisika oyo Yesu ye moko asakolaki. (Mis. 1:8, NW) Mosala ya kosakola oyo ye abandaki ekoli mingi sikawa, ekómi na mikili 232. (Mat. 24:14) Ozali mpenza kosala mingi na mosala ya kosakola na teritware ya lisangá na bino?
3 Na kokutanáká na bato mingi koleka: Yesu atikaki bobele mwa bayekoli moke oyo basengelaki kokoba kosala mosala ya kosakola. Nzokande, lokola bapesaki litatoli na molende na Pantekote ya mobu 33 T.B., baoyo bandimaki solo mpe bazwaki batisimo bazalaki bato soko nkóto misato. (Mis. 2:1-11, 37-41) Mosala ya koyanganisa bato “babongi mpo na bomoi” ekobi kosalema kino ntango na biso. Lelo oyo tozali kobatisa bato soko 1 000 na mokolo. (Mis. 13:48, NW) Ozali kosala nyonso oyo okoki kosala mpo na kokutana na bato ya motema malamu bipai nyonso oyo bakoki kozala mpe ozongelaka noki baoyo basepelaki koyoka nsango ya Bokonzi?
4 Na kosakoláká ntango molai: Mosala ya kosakola oyo Yesu asalaki eumelaki bobele mbula misato na ndambo. Mingi kati na biso tozali kosakola uta bambula mingi koleka Yesu. Na boumeli ya ntango oyo tokopesamela nzela ya kokoba kosala mosala yango, tokozala na esengo ya kosalisa moyekoli ya sika mokomoko ete abanda kotambola na nzela oyo ezali komema na bomoi. (Mat. 7:14) Ozali mpenza kosala mingi sanza na sanza na mosala ya Nkolo?—1 Kol. 15:58.
5 Tokoki ntango nyonso komindimisa ete na lisalisi ya Yesu, tokosala ntango nyonso mosala monene lokola bayekoli na ye ya solo.—Mat. 28:19, 20.