Tóyebana malamu na bandeko na biso

¹ Biblia elobi ete moninga ya solosolo ezali moto oyo azali na bokangami makasi koleka ndeko, oyo alingaka ntango nyonso, azalaka sembo ntango nyonso, mpe asalisaka moninga na ye na ntango ya mpasi. (Mas. 17:17; 18:24) Tokoki kozanga baninga motindo wana te kati na lisangá soki tozali kosala milende ya koyebana mpe ya kolingana.​—Yoa. 13:35.

² Liboso mpe nsima ya makita ezali mabaku malamu ya koyebana malamu na bandeko na biso. Mpo na nini te kokóma na makita mwa liboso ya ngonga mpe kotikala mwa moke na nsima mpo na kolekisa mwa ntango malamu elongo na bandeko na biso? Tóluka kosolola na bandeko ndenge na ndenge, ezala mibange oyo baumeli na lisangá, ezala bilenge to mpe baoyo bazalaka nsɔninsɔni.

³ Tóbandaka mwa lisolo: Tópesaka bandeko na biso bobele mbote ya likolólikoló te. Tokoki mpe kobanda mwa lisolo na likambo moko oyo tokutanaki na yango na mosala ya kosakola, kolobela mwa likambo moko ya kosepelisa oyo totángaki na zulunalo oyo euti kobima, to kolobela likita oyo liuti kosalema. Tokoki koyeba makambo mingi ya bandeko na biso soki tozali koyokamela bango malamu, kolendisáká bango ete bálobelaka makambo oyo bakutanaka na yango mpe oyo bazali koyekola. Bobele kotuna ndeko moko lolenge ayebaki Yehova, tokoki koyeba makambo mingi. Bamoko kati na bomoi na bango bakutanaki na makambo oyo elendisaki kondima na bango, nzokande basusu bazali koyika mpiko na mikakatano oyo ekoki kokamwisa bato mingi. Soki toyebi yango, lokola tozali baninga ya solosolo, ekosalisa biso ete tómitya na esika ya bandeko na biso mpe tósalisa bango na bamposa na bango.

⁴ Tósalisanaka: Nsima ya liwa ya mwana na ye, ndeko mwasi moko azalaki na mokakatano ya koyemba nzembo ya Bokonzi oyo elobelaka lisekwa. Amikundolaki ete: “Mokolo moko, ndeko mwasi moko oyo afandaki na molɔngɔ mosusu amonaki ete nazali kolela. Ayaki, azingaki ngai na mabɔkɔ na ye, mpe ayembaki elongo na ngai kino nsuka ya loyembo. Natondaki na bolingo mpo na bandeko mibali mpe basi mpe nazalaki na esengo monene ete toyaki na makita, kososoláká ete ezali kuna esika ya kozwa lisalisi, kuna na Ndako ya Bokonzi.” Tosengeli kosalisa bandeko na biso na kobɔndisáká bango na ntango ya mpasi mpe na kolendisáká bango ntango nyonso.​—Ebe. 10:24, 25.

⁵ Lokola mokili oyo enuni ezali se kokóma mabe koleka, tózwa ekateli ya koyebana malamu na bandeko na biso. Bilendiseli ya solosolo oyo tokopesana ekozala lipamboli mpo na biso banso.​—Lom. 1:11, 12.