Tósalela mikanda na biso oyo elimbolaka Biblia na mayele
1, 2. Bato mingi bakanisaka nini mpo na mikanda na biso, mpe motuna nini yango ezali kobimisa?
1 Moto moko akomelaki biro monene ya Batatoli ya Yehova boye: “Natángaka mikanda na bino kobanda 1965. Ntango nazali kotánga, natalaka mpe na Biblia, mpe makambo nyonso oyo ezali na mikanda na bino eyokanaka mpenza na oyo Biblia elobi. Nalingaka mpenza koyeba solo na ntina na Nzambe mpe Yesu, mpe nakoki koloba ete nazwaka biyano ya solo na mikanda na bino mpe na Biblia.” Na mokanda yango, asɛngaki mpe bátindela ye moto ayekola na ye Biblia.
2 Lokola moto wana oyo amonisaki botɔndi mpenza, bamilio ya bato na mokili mobimba basepelaka na mikanda oyo tosalelaka mpo na koyekola na bato Biblia, oyo “moombo ya sembo mpe ya mayele” azali kobimisa. (Mat. 24:45) Mbula na mbula, ebele ya mikanda ezali kobimisama mpo na kosalisa bato ya mitema sembo “bákóma na boyebi ya sikisiki ya solo.” (1 Tim. 2:4) Ndenge nini tokoki kosalela mikanda na biso oyo elimbolaka Biblia na mayele mpenza?
3. Tokoki kosala nini mpo tóbebisaka mikanda na biso mpambampamba te?
3 Kobebisa yango mpambampamba te: Nsima ya mwa ntango, tokoki kokóma na mikanda mingi koleka oyo tokosalela. Tokoki kosala nini mpo mikanda na biso wana ya motuya mingi ebebaka mpambampamba te? Tosengeli kosalela bososoli ntango tozali kozwa mikanda mpo na kobima na yango na mosala ya kosakola. Na esika ya kozwa mikanda mingi mpo na kokende kokabola yango, tokoki mbala mosusu kozwa kaka mokanda moko to mikanda mibale mpe kozonga kozwa mosusu soki tosilisi kokabola oyo tozwaki. Yango ekosala ete tózala na mikanda ebele ebele te na bandako na biso. Ndenge moko mpe, soki tozali na bazulunalo mingi oyo tokaboli naino te, ekozala malamu tokitisa motángo ya bazulunalo oyo tosɛngaka.
4. Lisangá ekoki kosala nini soki mikanda eleki mingi na libombo na bango?
4 Soki mikanda eleki mingi na libombo: Soki mikanda eleki mingi na libombo ya lisangá, Motaleli na mikanda asengeli kotala soki masangá mosusu ya esika yango ekoki kosalela mikanda mosusu. Basakoli bakoki kopesa mikanda ya kala epai ya bandeko na bango oyo bazali Batatoli te, epai ya bato oyo bayekolaka na bango Biblia, mpe bato mosusu. Bato oyo bayei sika na lisangá bakoki kosepela kozwa mikanda yango mpo na kosala bibliotɛkɛ na bango moko.
5. Ndenge nini tokoki komonisa botɔndi mpo na mikanda na biso?
5 Tolingi ete mikanda na biso ekokisa mokano na yango, elingi koloba, esalisa bato ya mitema sembo báyekola makambo mingi oyo etali mikano kitoko ya Yehova. Ndenge kaka Yesu aboyaki kobebisa biloko oyo etikalaki ntango aleisaki ebele ya bato na ndenge ya likamwisi, mokano na biso esengeli kozala ya kosalela malamu mikanda ya ntina mingi oyo elimbolaka Biblia, oyo tozwaka. (Yoa. 6:11-13) Nsango oyo ebikisaka bomoi ya bato, oyo ezali na mikanda na biso, ekoki kosimba mitema ya bato ya sembo te soki tobombi yango na libombo na biso to na sakosi na biso. Na bongo, tosengeli kozala na bososoli ntango tozali kozwa mikanda mpo na kobima na yango na mosala ya kosakola mpe kosalela yango na mayele mpo esalisa bato mosusu.—Filp. 4:5.