Elembo monene ya kondima!

1. Yesu asakolaki makambo nini ya nsɔmɔ?

¹ Bantoma bayokaki Yesu na likebi mpenza ntango ayebisaki bango makambo etali kozala na ye mpe bosukisi ya makambo ya ntango oyo. Yesu alobaki ete makambo ya nsɔmɔ ekokómela bato: bitumba, kozanga ya bilei, koningana ya mabelé, mpe maladi mabe. Alobaki mpe ete bato bakoyina bayekoli na ye, bakonyokola bango, mpe bakoboma bango. Basakoli ya lokuta bakobima mpe bakobungisa bato mingi nzela. Bolingo ya bato mingi ekokóma mpiɔ.

2. Mpo na nini kosakolama ya nsango malamu na mokili mobimba ezali mpenza likambo ya kokamwa?

² Nsima ya koyoka makambo nyonso wana ya nsɔmɔ, na ntembe te bayekoli ya Yesu bakamwaki mpenza ntango alobaki lisusu ete nsango malamu ya Bokonzi ya Nzambe ekosakolama na mabelé mobimba oyo efandami. (Mat. 24:3-14) Lelo oyo, esakweli kitoko wana ezali kokokisama na ndenge ya kokamwa mpenza. Atako tozali kobika na ntango ya mpasi, Batatoli ya Yehova bazali kosakola nsango malamu na molende mpenza. Atako bolingo ya bato mingi ezali kokóma mpiɔ, oyo ya biso ezali se kokóma makasi. Atako toyinami na “bikólo nyonso,” tokoki koloba ete tozali kosakola na bikoló nyonso.

3. Mitángo nini ya kolendisa omoni na lapolo ya mosala ya kosakola na mokili mobimba?

³ Ezali mpenza likambo ya kolendisa kotalela lisusu mosala oyo Batatoli ya Yehova basalaki na mbula eleki ndenge emonisami na etanda oyo ezali na lokasa 3 tii na lokasa 6. Esali sikoyo mbula 16, Batatoli bazali kolekisa ngonga koleka miliare moko mbula na mbula na mosala ya kosakola mpe ya kokómisa bato bayekoli. Yango ezali komonisa ete bazali mpenza na kondima! Babongisi-nzela mosusu (5,8 %) babakisamaki, basakoli mosusu (3,1 %) babakisamaki, mpe bayekoli ya Biblia mosusu (4,4 %) babakisamaki. Motángo ya bato oyo bazwaki batisimo emataki (20,1 %) koleka oyo ya mbula ya mosala oyo eleki. Ezali esengo mpenza komona bato pene na milio nsambo bazali kosalela Yehova na bosembo nyonso; motángo oyo eleki monene banda mokili ebandá! Makambo nini omoni na etanda, oyo elendisi yo mingi?

4. Mikakatano nini moto moko alongaki mpo na kozwa batisimo?

⁴ Atako mitángo yango ezali minene, tosengeli kobosana te ete ezali nde elembo ya kondima oyo bato bazali komonisa. Tótalela ndakisa ya Guillermo. Guillermo abotamaki na 1935, mpe akolaki na ekólo Bolivie. Ntango azalaki na mbula libwa, akómaki kosala na elanga ya coca (motindo moko ya bangi). Banda bomwana, azalaki kotafuna nkasa ya coca mpo na kobosana mpasi ya mosala makasi oyo azalaki kosala. Lisusu, akómaki kolangwa masanga mpe komɛla makaya. Ntango akómaki koyekola makambo Yehova azali kosɛnga epai na ye, atikaki komɛla makaya mpe kolangwa masanga. Mokakatano monene oyo akutanaki na yango ezalaki ya kotika momeseno na ye ya kotafuna nkasa ya coca. Abondelaki Yehova mingi mpe atikaki momeseno yango. Nsima ya kotika makambo nyonso ya mabe, azwaki batisimo. Alobi boye: “Lelo oyo, nazali komiyoka pɛto, mpe nazali na esengo mingi.”

5. Mposa na yo ezali nini?

⁵ Ya solo, Yehova alingaka mpenza bato. Mposa na ye ezali ete bato nyonso bábongola motema. (2 Pet. 3:9) Yango mpe ezali mposa na biso. Tiká ete mitema na biso etinda biso tósala nyonso oyo tokoki mpo na kokoba kosalisa bato ya mitema sembo báyeba Yehova mpe bálinga ye, lokola biso.