Okoki kobimaka na mosala ya kosakola mokolo ya lomingo?

1. Likambo oyo Paulo ná baninga na ye basalaki na Filipi ekoki koteya biso nini?

¹ Na mobembo na bango moko ya mosala ya misionɛrɛ, Paulo ná baninga na ye bakómaki na engumba Filipi. Moto moko te alingaki koloba na bango mabe ata soki bápemaka mokolo ya Sabata, mokolo oyo Bayuda oyo bazalaki kofanda na Filipi bazalaki kopema. Nzokande, lokola bayebaki ete Bayuda bayanganaki libándá ya engumba mpo na kobondela, bakendaki kosakwela bango. Na ntembe te, Paulo ná baninga na ye basepelaki mingi ntango Lidia andimaki nsango malamu mpe ye ná libota na ye mobimba bazwaki batisimo! (Mis. 16:13-15) Lelo oyo, lokola bato mingi bapemaka mokolo ya lomingo, mpo na nini te kolekisa mwa bangonga na mosala ya kosakola mokolo yango?

2. Mikakatano nini basaleli ya Yehova balongaki mpo bákoba kosakola mokolo ya lomingo kozanga ete bápekisa bango?

² Mikakatano oyo bandeko balongaki mpo bákoba kosakola mokolo ya lomingo: Na mobu 1927, balendisaki basaleli ya Yehova bálekisaka mwa bangonga na mosala ya kosakola mikolo nyonso ya lomingo. Eumelaki te, batɛmɛlaki bango. Bakangaki bandeko mingi na États-Unis mpo bafundaki bango ete bazalaki kobuka mibeko etali Sabata, kotya mobulu mpe kotɛka kozanga ndingisa. Kasi, basaleli ya Yehova batikaki kosakola te. Na bambula ya 1930, babongisaki “bituluku ya bandeko mpo na kosakola,” elingi koloba basakoli ya masangá ndenge na ndenge bazalaki kokutana na teritware moko mpo na kosakola na teritware yango mobimba. Na bantango mosusu soki bakangi basakoli, basakoli mosusu ebele bazalaki koya esika yango mpe bakonzi bazalaki kokoka kokanga bango te. Ozalaka mpenza na botɔndi mpo na milende oyo bandeko wana basalaki mpo lelo oyo tókoka kosakola mokolo ya lomingo kozanga ete bápekisa biso?

3. Mpo na nini mokolo ya lomingo ezali mokolo malamu mpo na kosakola?

³ Mokolo ya malamu mpo na kosakola: Bato mingi bakendeke mosala te mokolo ya lomingo. Mokolo yango bato bazalaka na misala mingi te. Bato mosusu oyo bakendaka ndako-nzambe basepelaka kobɛta masolo ya makambo ya Nzambe mokolo yango. Soki tosalaka makita mokolo ya lomingo, liboso tókende makita tolataka ndenge oyo tokoki kolata soki tolingi kobima na mosala ya kosakola. Soki bongo, mpo na nini te komityela mokano ya kobima na mosala ya kosakola liboso to nsima ya makita? Soki esengeli, memá mwa eloko ya kolya.

4. Esengo nini tokoyoka soki tolekisi mwa bangonga na mosala ya kosakola na mokolo ya lomingo?

⁴ Ata soki tobimi na mosala ya kosakola mwa bangonga mokolo ya lomingo, tokotikala kaka na ntango oyo tosengeli na yango mpo na kopema. Ntango tokopema, tokozala mpe na esengo mpo tosali mosala mosantu. (Mas. 19:23) Biso mpe tokoki koyoka esengo ya kokutana na moto moko lokola Lidia!