Misala ya kokamwa ya bozalisi emonisaka nkembo ya Nzambe
Bato mingi basepelaka kotala biloko oyo Nzambe akelá. Kasi kaka bato moke nde bayebaka ete biloko oyo ezalisamá emonisaka makanisi ya Mozalisi na biso Monene mpe ndenge ayokaka. (Rom. 1:20) Na ntango ya kala, Davidi ayekolaki makambo ya Yehova na nzela ya Liloba ya Nzambe. Kasi Davidi ‘amonaki’ mpe apusanaki penepene na Nzambe na nzela ya biloko oyo akelá. (Nz. 8:3, 4) Video oyo ezali na motó ya likambo: Les merveilles de la création révèlent la gloire de Dieu (Misala ya kokamwa ya bozalisi emonisaka nkembo ya Nzambe), esalisaka biso, bana na biso, mpe bato oyo toyekolaka na bango Biblia tómona biloko mosusu oyo Yehova akelá, bizaleli mpe bomoto ya Mozalisi na biso Monene, mpe na bongo tópusana penepene na ye. Nsima ya kotala video yango, talá soki okoki koyanola na mituna oyo elandi.
(1) Ndenge nini bonene ya molɔ́ngɔ́ mpe ndenge oyo ebongisamá etindaka yo ozala na botɔndi mingi epai ya Yehova? (Yis. 40:26) (2) Soki totali mai malamumalamu, makambo nini tokoki koyekola na ntina na Nzambe? (Em. 14:7) (3) Ndenge nini bonene ya mabele mpe ntaka oyo ekabolá yango na moi emonisi bwanya ya Yehova? (4) Sanza esalaka mosala nini? (Nz. 89:37) (5) Nini emonisi ete Yehova akelaki bato mpo básepela na bomoi? (6) ADN ezali nini? (Nz. 139:16) (7) Ndenge nini bato bakeseni na bikelamu mosusu nyonso ya Yehova awa na mabele? (Eba. 1:26) (8) Makambo nini ozali kozela na motema likoló komona na mokili ya sika?
Makambo mosusu: (9) Balangi eutaka wapi? (10) Ndenge nini esalemaka ete mai emata tii na nkasa ya nzete kozanga ete ezonga nsima? (11) Mai esalaka mosala nini na nzoto na biso? (12) Pesá bandakisa oyo emonisi boyokani oyo ezalaka kati na bikelamu ya bomoi. (13) Ndenge nini biloko oyo ezalisamá esalisanaka? (14) “Angle d’or” ezali nini, mpe ndenge nini emonanaka na biloko oyo ezalisamá? (Talá Lamuká! ya Sɛtɛmbɛ 2006, lok. 24, na Lifalanse).
“Bótala malamumalamu” biloko oyo Yehova akelá: Yesu alendisi biso ‘tótala malamumalamu bandɛkɛ,’ mpe ‘tózwa liteya na fololo lísi ya esobe.’ (Mat. 6:26, 28) Kosala bongo ekoki kokómisa kondima na biso makasi, kotinda biso tótyela Mozalisi na biso motema, mpe kosalisa biso tókóma mpenza na botɔndi mpo na bwanya ya Yehova, nguya na ye ya kobikisa mpe bolingo na ye. Na esika ya kolekisa ngonga na makambo ya mpamba ya mokili oyo, zwá ntango mpe salá milende mpo na kotala misala ya kokamwa ya Yehova, mpe kanisá na oyo yango ezali koteya biso na ntina na Nzambe na biso.—Nz. 19:1.