Mbongo ya bibende mibale ya motuya moke

Likambo moko oyo tokoki kosala mpo mosala ya Bokonzi ekende liboso ezali kopesa makabo ya mbongo mpo na mosala ya kosakola nsango malamu na mokili mobimba. Bongo soki tozali na mbongo mingi te?

Mokolo moko, Yesu amonaki mwasi moko mobola oyo mobali akufá azali kotya mbongo ya bibende mibale ya motuya moke na kɛsi ya makabo na tempelo. Atako mwasi yango azalaki kokelela, bolingo oyo alingaki Yehova etindaki ye apesa “nyonso oyo azalaki na yango, nyonso oyo azalaki na yango mpo na kobikela.” (Mrk. 12:41-44) Lokola Yesu alobelaki likambo oyo mwasi yango asalaki, emonisi ete likabo na ye ezalaki na motuya mingi na miso ya Nzambe. Ndenge moko mpe, bakristo ya liboso bazalaki te kokanisa ete kaka bandeko na bango oyo bazali bazwi nde basengeli kopesa makabo ya mbongo mpo na mosala ya kosakola. Ntoma Paulo apesaki ndakisa ya bakristo ya Masedonia oyo, atako bazalaki na bobola ya makasi “bakobaki kobondela . . . makasi mpenza ete bázwa libaku malamu ya kopesa biloko na boboto.”​—2 Ko. 8:1-4.

Na yango, soki tokoki ata kopesa likabo ya “mbongo ya bibende mibale ya motuya moke,” tóbosana te ete makabo ya mikemike oyo bandeko mingi bapesi ekómaka mbongo mingi. Soki tozali kopesa makabo na motema moko ekosepelisa Tata na biso ya likoló oyo akabaka mingi, mpo “Nzambe alingaka moto oyo apesaka na esengo.”​—2 Ko. 9:7.