Watchtower MIKANDA OYO EZALI NA INTERNET
Watchtower
MIKANDA OYO EZALI NA INTERNET
Lingala
  • BIBLIA
  • MIKANDA
  • MAKITA
  • w20 Mai nk. 8-11
  • Bakonzi mibale oyo bayokanaka te na ntango ya nsuka

Video ezali awa te.

Esimbi te. Video oyo esali mwa mindɔndɔ.

  • Bakonzi mibale oyo bayokanaka te na ntango ya nsuka
  • Linɔ́ngi ya Mosɛnzɛli eyebisaka Bokonzi ya Yehova (ya boyekoli)—2020
  • Masolo mosusu
  • ”Mokonzi ya nɔrdi” na ntango ya nsuka
    Linɔ́ngi ya Mosɛnzɛli eyebisaka Bokonzi ya Yehova (ya boyekoli)—2020
  • Yehova amonisi makambo oyo ‘ekosalema nsima ya mwa ntango moke’
    Linɔ́ngi ya Mosɛnzɛli eyebisaka Bokonzi ya Yehova—2012
  • Nani nde “mokonzi ya nɔrdi” lelo oyo?
    Linɔ́ngi ya Mosɛnzɛli eyebisaka Bokonzi ya Yehova (ya boyekoli)—2020
  • Libombami na nsomo elimbolami
    Emoniseli—Kokokana na yango monene ebelemi!
Makambo mosusu
Linɔ́ngi ya Mosɛnzɛli eyebisaka Bokonzi ya Yehova (ya boyekoli)—2020
w20 Mai nk. 8-11

Bakonzi mibale oyo bayokanaka te na ntango ya nsuka

Bisakweli mosusu oyo ezali na etanda oyo, elobeli makambo oyo esalemaki nzela moko. Yango emonisi mpenza ete tozali na “ntango ya nsuka.”​—Dan. 12:4.

Elilingi oyo ezali kolakisa bisakweli mpe mokonzi ya nɔrdi ná mokonzi ya sudi kobanda 1870 tii na mikolo na biso.
  • Elilingi ya liboso ezali kolakisa bisakweli na ntango ya nsuka mpe oyo esalemaki kobanda mobu soki 1870 tii 1918. Bambula kobanda 1914 ebengami ntango ya nsuka. Esakweli 1: Nyama mabe ya mitó nsambo oyo emonani banda na ebandeli ya elilingi. Na ntango ya Etumba ya Liboso ya mokili mobimba, motó ya nsambo ya nyama mabe yango ezoki. Kobanda 1917, motó na yango ya nsambo ebiki mpe nyama mabe ezongeli lisusu makasi na yango. Esakweli 2: Na 1870 mokonzi ya nɔrdi mpe mokonzi ya sudi bayebani. Na 1871, Allemagne nde ezalaki mokonzi ya nɔrdi. Na ebandeli, Grande-Bretagne nde ezalaki mokonzi ya sudi, Kasi na 1917 bokonzi ya Anglo-américain nde ezwaki esika na yango. Esakweli 3: Kobanda 1870, Charles T. Russell mpe baninga na ye nde bazalaki ‘momemi-nsango.’ Na 1881 Linɔ́ngi ya Mosɛnzɛli ya Siona elendisaki batángi na yango básakola nsango malamu. Esakweli 4: Kobanda 1914 eleko ya kobuka mbuma. Matiti mabe ekabolami ná blé. Esakweli 5: Ndimbola ya makaka ya ebende mpe ya mabele ya lima eyebani. Mpe ezali kolakisa Etumba ya Liboso ya mokili mobimba oyo esalemaki kobanda 1914 tii 1918. Makambo oyo ezalaki na bopusi likoló ya Batatoli ya Yehova: kobanda 1914 tii 1918, bakɔtisi Batatoli ya Yehova ya Grande-Bretagne mpe ya Allemagne na bolɔkɔ. Na 1918, bakɔtisi bandeko ya biro monene oyo bazalaki kofanda na États-Unis na bolɔkɔ.
    Esakweli 1.

    Bavɛrsɛ Em. 11:7; 12:13, 17; 13:1-8, 12

    Esakweli “Nyama mabe” eyangeli bato bambula ebele. Na ntango ya nsuka, motó na yango ya nsambo ezoki. Na nsima, motó yango ebiki mpe “mabele mobimba” elandi nyama mabe. Satana asaleli nyama mabe yango mpo na “kobunda etumba na bato ya momboto ya mwasi yango oyo batikalaki.”

    Kokokisama Nsima ya Mpela, baguvɛrnema oyo etɛmɛlaki Yehova ekómaki koyangela bato. Nsima ya bambula koleka 3 000, na ntango ya Etumba ya Liboso ya mokili mobimba, Grande-Bretagne, moko ya baguvɛrnema yango, ezalaki lisusu na nguya mingi te. Ezwaki lisusu nguya ntango esalaki boyokani ná États-Unis. Mingimingi na ntango oyo ya nsuka, Satana azali kosalela bibongiseli na ye nyonso ya politiki mpo na konyokola basaleli ya Nzambe.

  • Esakweli 2.

    Bavɛrsɛ Dan. 11:25-45

    Esakweli Mokonzi ya nɔrdi mpe mokonzi ya sudi bazali kowelana na ntango oyo ya nsuka.

    Kokokisama Allemagne ebundaki na Grande-Bretagne mpe États-Unis. Na 1945, Union soviétique mpe bikólo oyo ezalaki kopesa yango mabɔkɔ, ekómaki mokonzi ya nɔrdi. Na 1991, Union soviétique ekweaki, mpe na nsima, Russie ná bikólo oyo epesaka yango mabɔkɔ ezwaki esika ya mokonzi ya nɔrdi.

  • Esakweli 3.

    Bavɛrsɛ Yis. 61:1; Mal. 3:1; Luka 4:18

    Esakweli Yehova atindi “momemi-nsango” na ye mpo na “kobongisa nzela” liboso Bokonzi ya Masiya etyama. Momemi-nsango yango ayebisi “bato ya komikitisa nsango malamu.”

    Kokokisama Kobanda na 1870, ndeko Russell ná baninga na ye bayekolaki Biblia na mozindo mpo na koyeba makambo oyo yango eteyaka mpenza. Na 1881, bamonaki ete ezali na ntina mingi basaleli ya Nzambe básakolaka. Na yango, babimisaki masolo lokola “Tozali koluka basakoli 1 000” mpe “Batyami mafuta na elimo mpo na koteya.”

  • Esakweli 4.

    Bavɛrsɛ Mat. 13:24-30, 36-43

    Esakweli Moto moko aloni blé na elanga. Na nsima, monguna moko ayei kolona matiti mabe na kati ya elanga yango. Matiti mabe yango ekoli mpe ezipi blé. Na ntango ya kobuka mbuma, bakaboli blé na matiti mabe.

    Kokokisama Kobanda na 1870, bokeseni kati na bakristo ya solo mpe oyo ya lokuta ekómaki komonana polele. Na boumeli ya ntango ya nsuka, bakristo ya solo bazali koyanganisama mpe kokabwana ná bakristo ya lokuta.

  • Esakweli 5.

    Bavɛrsɛ Dan. 2:31-33, 41-43

    Esakweli Makaka ya ebende oyo esangani na mabele ya lima ya ekeko moko monene, oyo esalemi na biloko ndenge na ndenge.

    Kokokisama Mabele ya lima emonisi bato oyo bokonzi ya Anglo-américain ezali koyangela, mpe oyo bazali kotombokela bokonzi yango. Bato yango bazali kolɛmbisa bokonzi ya Anglo-américain mpe kopekisa yango esala lokola ebende.

  • Elilingi lokasa 2, ezali kolakisa bisakweli oyo ezali kokokisama na ntango ya nsuka, kobanda 1919 tii 1945. Tii na 1945 Allemagne nde ezalaki mokonzi ya nɔrdi. Bokonzi ya Anglo-américain nde mokonzi ya sudi. Esakweli 6: Na 1919, bakristo oyo batyami mafuta na elimo, bayanganisami na kati ya lisangá oyo epɛtolami. Kobanda 1919 mosala ya kosakola ekómi kosalema na molende. Esakweli 7: Na 1920, Société des Nations esalemi mpe ekobi tii na ntango ya Etumba ya Mibale ya mokili mobimba. Elilingi: Esakweli 1, nyama mabe ya mitó nsambo ekobi kozala na bomoi. Esakweli 5, makaka ya ebende mpe ya mabele ya lima ekobi kozala na bomoi. Makambo oyo esalemaki na mokili kobanda 1939 tii 1945, Etumba ya Mibale ya mokili mobimba. Makambo oyo ezalaki na bopusi likoló ya Batatoli ya Yehova: Kobanda 1933 tii 1945, batyaki Batatoli ya Yehova koleka 11 000 ya ekólo Allemagne na bolɔkɔ. Na 1945, na ekólo Grande-Bretagne batye Batatoli ya Yehova pene na 1 600 na bolɔkɔ. Kobanda na 1940 tii 1944 na États-Unis, bato mabe babundisi Batatoli ya Yehova koleka mbala 2 500.
    Esakweli 6.

    Bavɛrsɛ Mat. 13:30; 24:14, 45; 28:19, 20

    Esakweli “Blé” eyanganisami na kati ya “ndako ya kobomba biloko” mpe “moombo ya sembo mpe ya mayele” atyami mpo na kobatela “basali ya ndako.” Mpe “nsango malamu ya Bokonzi” ekómi kosakolama na “mabele mobimba esika bato bafandi.”

    Kokokisama Na 1919, moombo ya sembo atyamaki mpo na kokamba basaleli ya Nzambe. Kobanda na ntango wana, bayekoli ya Biblia bakómaki kosakola lisusu mingi koleka. Lelo oyo, Batatoli ya Yehova bazali kosakola na mikili koleka 200 mpe bazali kobimisa mikanda oyo elimbolaka Biblia na minɔkɔ koleka 1 000.

  • Esakweli 7.

    Bavɛrsɛ Dan. 12:11; Em. 13:11, 14, 15

    Esakweli Nyama mabe ya maseke mibale ezali koyebisa bato oyo bafandi na mabele ete básala “elilingi ya nyama mabe” mpe epesi “mpema na nyama mabe yango.”

    Kokokisama Bokonzi ya Anglo-américain nde esalaki Société des Nations. Bikólo mosusu mpe epesaki ebongiseli yango mabɔkɔ. Kobanda 1926 tii 1933, mokonzi ya nɔrdi azalaki mpe na kati ya ebongiseli yango. Ndenge moko na ONU, bato bazalaki kotya motema ete Société des Nations ekotya kimya na mokili mobimba; likambo oyo kaka Bokonzi ya Nzambe nde ekoki kosala.

  • Elilingi 3, ezali kolakisa bisakweli oyo ekokisami na ntango ya nsuka, kobanda 1945 tii 1991. Union soviétique mpe na nsima Russie mpe bikólo oyo epesaka yango mabɔkɔ nde mokonzi ya nɔrdi. Bokonzi ya Anglo-américain nde mokonzi ya sudi. Esakweli 8: Molinga moko monene oyo ezali lokola mayebo ezali kobima ntango bokonzi ya Anglo-américain ebwaki bombi atomike, yango emonisi ete libebi moko monene euti kosalema. Esakweli 9: ONU esalemi na 1945, mpe ezwi esika ya Sociétés des Nations. Elilingi ezali kolakisa mpe: Esakweli 1, nyama mabe ya mitó nsambo ezali kaka na bomoi. Esakweli 5, makaka ya ebende mpe ya mabele ya lima ekobi kozala na bomoi. Esakweli 6, na 1945 basakoli koleka 156 000. Na 1991, basakoli koleka 4 278 000. Makambo oyo ezalaki na bopusi likoló ya Batatoli ya Yehova: Kobanda 1945 tii 1950 na bikólo ya Union soviétique, bamemaki Batatoli ya Yehova ebele bakangami na Sibérie.
    Esakweli 8.

    Bavɛrsɛ Dan. 8:23, 24

    Esakweli Mokonzi moko oyo azali na elongi ya nkandankanda, “abebisi mpenza kobebisa.”

    Kokokisama Bokonzi ya Anglo-américain ebomi bato ebele mpe ebebisi biloko ebele. Na ndakisa, na Etumba ya Mibale ya mokili mobimba, États-Unis ebwakaki babɔmbi atomike mibale na ekólo oyo ezalaki kobundisa Grande-Bretagne mpe États-Unis. Babɔmbi yango ebomaki bato mpe ebebisaki biloko ebele na ndenge oyo esalemá naino te.

  • Esakweli 9.

    Bavɛrsɛ Dan. 11:31; Em. 17:3, 7-11

    Esakweli Nyama mabe ya “langi ya motane makasi” oyo ezali na maseke zomi ebimi na libulu mozindo mpe ezali mokonzi ya mwambe. Mokanda ya Danyele ebengi mokonzi yango “eloko ya bosɔtɔ oyo ezali koyeisa libebi.”

    Kokokisama Na ntango ya Etumba ya Mibale ya mokili mobimba, Société des Nations esukaki. Na nsima ya etumba, ONU “etyamaki.” Ndenge moko na Société des Nations, bapesaka mpe ONU lokumu oyo esengeli kopesama na Bokonzi ya Nzambe. ONU ekobundisa mangomba.

  • Elilingi 4, ezali kolakisa bisakweli oyo ezali kokokisama na ntango ya nsuka tii na ntango ya etumba ya Armagedone. Russie mpe bikólo oyo epesaka yango mabɔkɔ nde mokonzi ya nɔrdi. Bokonzi ya Anglo-américain nde mokonzi ya sudi. Esakweli 10: Bakonzi ya mokili balobi maloba ‘kimya, likambo ya kobanga ezali te!’ Na nsima, bolɔzi-monene ebandi. Esakweli 11: Bikólo ebundisi bibongiseli ya mangomba ya lokuta. Esakweli 12: Baguvɛrnema ya mokili ebundisi basaleli ya Nzambe. Bakristo oyo batyami mafuta na elimo oyo bazali naino awa na mabele, bayanganisami na likólo. Esakweli 13: Etumba ya Armagedone. Moto oyo afandi likoló ya mpunda moko ya mpɛmbɛ alongi tii na nsuka. Nyama mabe ya mitó nsambo ebomami; bapanzi makaka ya ekeko monene oyo esalemi na ebende mpe na mabele ya lima. Elilingi mosusu: Esakweli 1, nyama mabe ya mitó nsambo ekobi kozala na bomoi tii na ntango ya etumba ya Armagedone. Esakweli 5, makaka ya ebende oyo esalemi na mabele ya lima ekobi kozala na bomoi tii na ntango ya etumba ya Armagedone. Esakweli 6, lelo oyo ezali na basakoli koleka 8 580 000. Makambo oyo ezali na bopusi likoló ya Batatoli ya Yehova: Na 2017, bakonzi ya ekólo Russie batyaki Batatoli ya Yehova na bolɔkɔ mpe babotɔlaki bandako ya Betele.
    Esakweli 10 mpe 11.

    Bavɛrsɛ 1 Tes. 5:3; Em. 17:16

    Esakweli Bikólo elobi “kimya likambo ya kobanga ezali te,” mpe “maseke zomi” ná “nyama mabe” ebundisi “mwasi ya ndumba” mpe ebomi ye. Na nsima, bikólo mpe ebebisami.

    Kokokisama Bikólo ekotuta ntolo ete etye kimya mpe likambo ya kobanga ezali te na mokili. Na nsima, bikólo oyo epesaka ONU mabɔkɔ ekobebisa bibongiseli ya mangomba ya lokuta. Yango nde ekozala ebandeli ya bolɔzi monene. Bolɔzi monene yango ekosuka ntango Yesu akobebisa bibongiseli nyonso ya mokili ya Satana na etumba ya Armagedone.

  • Esakweli 12.

    Bavɛrsɛ Ezk. 38:11, 14-17; Mat. 24:31

    Esakweli Goge amati mpo na kobundisa ekólo ya bato ya Nzambe. Na nsima, baanzelu “bayanganisi bato oyo Nzambe aponá.”

    Kokokisama Mokonzi ya nɔrdi ná baguvɛrnema mosusu bakobundisa basaleli ya Nzambe. Nsima ya etumba yango, bakristo oyo batyami mafuta na elimo, oyo bakozala naino awa na mabele, bakoyanganisama na likoló.

  • Esakweli 13.

    Bavɛrsɛ Ezk. 38:18-23; Dan. 2:34, 35, 44, 45; Em. 6:2; 16:14, 16; 17:14; 19:20

    Esakweli “Moto oyo afandi” likoló ya “mpunda moko ya mpɛmbɛ” ‘alongi tii na nsuka’ na ndenge abebisi Goge ná limpinga na yango. ‘Nyama mabe ebwakami na laki ya mɔtɔ’ mpe libanga moko epanzi ekeko yango ya monene.

    Kokokisama Yesu, Mokonzi ya Bokonzi ya Nzambe oyo azali koyangela, akobikisa basaleli ya Nzambe. Ye ná bato 144 000 mpe limpinga ya baanzelu, bakobebisa bikólo nyonso oyo ekobundisa basaleli ya Nzambe. Yango nde ekosukisa mokili ya Satana.

    Mikanda na Lingala (1984-2026)
    Bimá
    Kɔtá
    • Lingala
    • Kotindela moto
    • Makambo oyo olingi
    • Copyright © 2025 Watch Tower Bible and Tract Society of Pennsylvania
    • Ndenge ya kosalela
    • Kobomba makambo ya moto
    • Kobongisa makambo na yo
    • JW.ORG
    • Kɔtá
    Kotindela moto