Limpulututu oyo emikómisaka lokola nsɛlɛlɛ

MWA limpulututu moko ya moke ekɔtaka na ndako ya nsɛlɛlɛ mpe emibombaka kuna, na kati ya banguna na yango. Mpo nsɛlɛlɛ eyeba yango te, ebongolaka lolenge ya nzoto na yango mpe esalaka makambo na kobombana. Limpulututu yango esengeli kosala bongo mpamba te, soki ekɔti na ndenge ya mobulu na ndako ya nsɛlɛlɛ, nsɛlɛlɛ ekokóma na nkanda makasi. Lokola nzoto ya limpulututu ekeseni na oyo ya nsɛlɛlɛ, ezali pɛtɛɛ te mpo limpulututu emibomba bongo.

Nsɛlɛlɛ ezali na makolo motoba mpe maseke mibale, nzokande limpulututu ezali na makolo mwambe mpe ezali na maseke te. Na bongo, ndenge nini limpulututu esalaka mpo emonana lokola nsɛlɛlɛ? Ntango ezali na ndako ya nsɛlɛlɛ, limpulututu yango etambolaka na makolo motoba, mpe makolo mosusu mibale, etɛlɛmisaka yango etala liboso, mpo emonana lokola maseke.

Longola yango, limpulututu eningisaka makolo na yango mibale wana mpo emonana mpenza lokola maseke ya solo. Etambwisaka yango na ndenge oyo okoki mpenza kokanisa ete ezali solo maseke ya nsɛlɛlɛ. Nyamankɛkɛ yango oyo ezalaka mpenza na angɛlɛ ekoki ata komekola ndenge nsɛlɛlɛ etambolaka, mbangumbangu mpe nyokanyoka!

Na makambo nyonso, limpulututu wana ezali komeka kozala mpenza lokola nsɛlɛlɛ, mpamba te bomoi na yango ekoki kozala na kimya kaka soki nsɛlɛlɛ eyebi yango lokola moninga na yango oyo afandaka mpe na ndako wana. Limpulututu yango emibatelaka na ndako ya nsɛlɛlɛ, mpe banguna na yango basalaka yango eloko te, lokola limbambambole oyo elyaka limpulututu. Ndɛkɛ oyo elingaka komona limpulututu te, ekozwa yango mpe te. Ezala limpulututu mosusu oyo elyaka baninga na yango, ekoyeba yango lisusu te mpo na “maseke” na yango oyo emekoli nsɛlɛlɛ.

Nzokande, soki ndɛkɛ to moselekete to mpe mwa nyama mosusu ekiti na esika wana mpe ebandi kolya nsɛlɛlɛ, limpulututu ekozongela mpenza mbala moko lolenge na yango ya solosolo mpe ekokima. Limpulututu emonaka malamu koleka nsɛlɛlɛ, limpulututu ekoki mpe kopumbwa, nzokande nsɛlɛlɛ epumbwaka te​—nyonso wana esalaka ete limpulututu yango ekima kozanga mpasi.

Na moi, limpulututu yango esalaka nyonso mpo nsɛlɛlɛ eyeba te ete yango ezali mopaya na kati ya ndako wana. Nzokande na butu, ebandi kosala mosala na yango mpe kolya nsɛlɛlɛ na kati ya ndako na yango moko! Soki nsɛlɛlɛ ebandi koyeba mayele mabe ya limpulututu yango, ekosalela makolo na yango nyonso mwambe mpo na kokima mbangu mpenza.

Ntango mosusu limpulututu ya mwasi ekoki kolanda mobali na yango kuna na ndako ya nsɛlɛlɛ. Limpulututu ya mwasi emonisaka ete ezali sembo epai ya mobali na yango mpe emonisaka lisusu bokɛngi. Kuna na kati ya ndako ya nsɛlɛlɛ, etongaka mwa monyama mpo na kobatela mobali na yango mpe makei oyo ekobota.

Na ntembe te, ezali na makambo mosusu mingi oyo tokoki koyekola epai na limpulututu yango. Kasi, tokoki mpe koyekola makambo mosusu mingi epai ya banyama mosusu oyo ezali na bomoi awa na mabele. Oyo nde esengo tokozala na yango na mikolo ezali koya, ntango tokoyekola makambo ya bikelamu ya kokamwa oyo Nzambe akelá!

[Elilingi na lokasa 31]

Limpulututu na katikati ya nsɛlɛlɛ mibale

[Eutelo ya bafɔtɔ]

Bill Beatty