Nkoma ya batángi

Nkombo ya Nzambe  Masolo “Oyebaka Nzambe na nkombo na ye?” (22 Yanuali 2004, na Lifalanse), ezali moko ya masolo oyo elobeli nkombo ya Nzambe malamu mpenza mpe na mozindo na ndenge oyo natángá naino te kobanda nakómá Moklisto na 1973. Ezipeli na yango ya kitoko, ndenge basali yango, makanisi na yango ya kosilisa ntembe, esali ete masolo yango ezala kitoko mpenza. Longonya!

D. L., États-Unis

Nauti kokóma mobongisi-nzela, mpe nazali komiyoka ete nakómi penepene na Yehova koleka ndenge nazalaki liboso. Yango wana, masolo oyo elobeli nkombo ya Nzambe esepelisaki ngai mingi mpenza. Etanda oyo elobi: “Dieu vous connaît par votre nom” (Nzambe ayebi yo na nkombo na yo) emonisi ete atako bato bazali mingi na mabelé, Nzambe atyelaka moko moko na biso likebi. Yango epesi ngai mposa ya koyekola lisusu makambo mingi mpo na Yehova mpe kosala oyo esepelisaka ye.

M. J., Japon

Ntango natángaki masolo yango, namonaki ete ezali mpenza koteya, bato oyo bakomaki yango basalaki bolukiluki mingi, mpe bakomi yango na ndenge ya malamu mpenza mpe ya kobenda likebi. Lisusu, nasepelaki mingi komona ndenge batandi nkombo ya Yehova na minɔkɔ 39 ekeseni na likoló ya nkasa oyo ezali na masolo yango. Masolo wana ezali kotinda bato bándima nkombo ya Yehova mpe bápesa yango lokumu, mpe yango esengeli kosepelisa bato ya motema malamu.

G. D. M., États-Unis

Kondima ya moto moko ya​—⁠siansi  Nasepelaki mingi na lisolo “Ntina oyo nandimaka Biblia​—⁠Moto moko ya siansi abɛti lisolo na ye.” (Ɔkɔtɔbɛ-Desɛmbɛ 2004) Eleki sikoyo mbula 6, ngai mpe nakomá kondima ete Biblia elobaka solo, nsima ya kotalela makambo oyo moto akoki kotya ntembe te, oyo ezali mpenza solo. Lelo oyo, ngai mpe nazali kosepela mingi na makambo oyo nayekolaki. Masolo lokola oyo ya Alton Williams elendisaka kondima na ngai. Nazali kotɔnda Yehova ndenge amonisaka moto na moto bilembeteli oyo ebongi na ye.

E. L., Hongrie

Bafololo ya Afrika  Nakomeli bino mpo na kotɔnda bino mpo na lisolo “Likamwisi na Namaqualand” (22 Yanuali 2004, na Lifalanse) Ezali mpenza esengo komona ndenge Yehova akelá mitindo ndenge na ndenge ya fololo mpo na kosepelisa biso. Ntango natángaki lisolo yango, nakanisaki maloba ya David, mokomi ya nzembo, oyo elobi ete: “Misala na yo ezali ya kokamwa mpe molimo na ngai eyebi yango malamu.”​—⁠Nzembo 139:⁠14.

A. J., Mexique

Devuare  Nazali na kelasi ya liboso ya eteyelo ya ntei, mpe nakokaka te kosalela ntango na ngai malamu. Lisolo “Les jeunes s’interrogent . . . Comment trouver le temps de faire mes devoirs? (Ndenge nini nakoki kozwa ntango ya kosala badevuare na ngai?)” (22 Yanuali 2004) esalisi ngai mingi. Nazalaki mpenza kotala televizyo mingi te. Kasi, soki nafandi mpo na kotala yango, nazalaki kotala baemisyo mingi. Sikoyo natalaka yango lisusu te.

R. O., Japon

Natángaka kelasi oyo batindelaka ngai mateya ya kotindela, mpe esengeli mpenza komipesa disipilini mpo na koyekola mikolo nyonso. Batoli oyo bopesi na lisolo oyo ekosalisa ngai nazwa ntango ya kosala badevuare na ngai.

X. R., États-Unis

Badevuare eleki mingi! Ezali yango nakoki koloba mpo na badevuare na ngai. Mbala mosusu, baboti na ngai bakanisaka ete nalekisaka ntango mingi na kosala badevuare mpo nazali mayele mingi te. Kasi mbala mingi, ezalaka nde mpo badevuare yango ezalaka makasi to mingi. Natɔndi bino ndenge bomonisi biso ndenge ya kozwa ntango ya kosala badevuare mpe kosalela ntango na biso malamu mpenza.

J. S., États-Unis

Ntango natángaki lisolo yango, namonaki ete ebongi mpenza. Batoli oyo ezali na motó ya likambo moke “Employez votre temps efficacement.” (Salelá ntango na yo malamu mpenza.) esalisi ngai nabongisa ndenge na ngai ya koyekola.

B. L., Italie