Nkomá ya batángi

Ngenga ya bana basi: Matɔ́ndi mingi lokola bolimboli lolenge kokatakata biboteli ya basi ezali momeseno mabe mpe ya nsɔ́mɔ! (“Bamilió ya bana bazali komona mpasi: Likoki lizali ya kosalisa bango?” Lamuká! ya Yulí-Sɛtɛ́mbɛ 1993.) Lokola likoki lizwami na kopɛngwisa mwana mwasi mpasi oyo euti na libomi wana ya nsɔ́mɔ, boye kobimisama ya lisoló wana ezalaki mpenza na ntina.

J.C., Etats-Unis

Miso na ngai matondaki na mpisoli wana nakanisaki lolenge baboti bazali konyokola bana motindo wana. Bansango motindo wana ebimisamaka na bazulunalo na biso te. Matɔ́ndi mingi ndenge boyebisi biso yango.

C.M., Brésil

Kobebisa basi: Mayoki na ngai mazalaki yango te ntango nazwaki nimero ya Lamuká! ya Yulí-Sɛtɛ́mbɛ 1993 “Kobebisa basi: makambo mazali kosalema.” Mama na ngai azalaki mopalanganisi ya nsango malamu ya ntango nyonso uta bambula mingi, abebisamaki na lolenge makasi kati na ndako na bango. Botángi masoló wana esalisaki ye mingi.

P.G., Etats-Unis

Nazali mokambi-molandi ya lisangá moko likobundisaka mobulu kati na libota mpe kosangisa nzoto na makasi. Ezali na nzela na moko na bilenge na bino nde tobandaki kotánga Lamuká! ntango alakisaki biso nimero oyo elobeli kobebisa bana [Ɔkɔtɔ́bɛ 8, 1991 (ebimeli ya Lifalansé)]. Sikawa tosili kosala abonemá. Nalingi bóyeba na meko nini banimero oyo elobelaki mobulu kati na libota mpe kobebisa basi esimbaki motema na ngai. Ekomamaki malamu mpe eyekolamaki malamu mpenza.

D.G., Etats-Unis

Mituna ya Biblia: Nasepelaki mingi na lokasa “Osilá naino te komituna?” kati na nimero ya Lamuká! Yanuáli-Sɛtɛ́mbɛ 1994. Nasalaki bakopi na yango mingi, oyo natindelaki baninga na ngai, basangani ya libota na biso mpe bato mosusu oyo basepelaki na lisoló yango. Nalendisaki bango ete bátalela mikapo nyonso ya Biblia oyo mipesami mpe ete bákomela ngai mituna bazali na yango. Masoló lolenge wana ebongi mpenza mpo na kobanda masoló ya Biblia. Nasɛngi bino ete bólanda kobimisa yango.

M.S., Etats-Unis

Botɔ́ndi mpo na bililingi: Nasepelaki mingi ntango namonaki elilingi ya mokili ya sika na ezipeli ya Lamuká! ya Ɔkɔtɔ́bɛ 22, 1993 (ebimeli ya Lifalansé). Natalaki yango na boumeli ya mwa ntango, na kobondeláká ete nazala na likoki ya kofanda na mokili motindo wana. Natalaki yango lisusu mikolo mibale na nsima, mpe ezalaki sé na bopusi yango moko. Matɔ́ndi mingi mpo na bilendiseli wana ya ntina.

S.H., Etats-Unis

Nayebi bayemi na bino te, kasi mosala na bango ezali mpenza ya kokamwa! Bamoko na bililingi bileki kitoko kati na oyo nasilá komona ezali kati na babúku na bino mpe bazulunalo na bino. Ngai moko nazali moyemi, mpe nayebi kososola mosala oyo mosalemi na lolenge ya malamu.

D.W., Etats-Unis

Kosolola: Mobali na ngai azali nkulutu mpe mopalanganisi ya ntango nyonso ya nsango malamu oyo azali kosala mosala malamu kati na lisangá. Nzokande, uta tobalanaki, tozalaka ntango nyonso na mpasi mpo na kosolola, yango nde ezalaki kobimisela biso mikakatano. Masoló ya [Lamuká! ya Yanuáli 22, 1994 (ebimeli ya Lifalansé)] mamonisaki biso ntina ya mikakatano yango. Tondimisami ete yango ekosalisa biso na kobongisa boyokani na biso.

C.A., Japon

Kokende na mokili mosusu: Nazali na esengo ya komonisa bino botɔ́ndi na ngai mpo na lisoló “Mituna bilenge batunaka . . . Nasengeli kokende na mokili ya bozwi?” (Lamuká! Yulí-Sɛtɛ́mbɛ 1993). Nazali na mibu 16 mpe nazalaki na likanisi ya kokende kofanda na mboka moko epai nakokaki kozala na biloko mingi. Sikawa lokola natángi lisoló wana, namoni ete esika ozali kofanda ezali likambo lileki ntina te. Na kotyáká Bokonzi ya Yehova na esika ya liboso kati na bomoi na biso, tozali kozanga eloko moko te na [elimo], mpo ete Yehova azali kosalisa biso.

V.A., Brésil