Molakisi moko abongoli makanisi na ye

◼ Eleki mwa bambula, molakisi moko na engumba Batumi, na ekólo Géorgie, asɛngaki bana-kelasi na ye bátánga Mibeko Zomi. Molakisi yango akamwaki mingi ntango mwana-kelasi moko, Anna, atángaki yango malamu mpenza. Anna ayanolaki mpe na mituna mosusu ya Biblia na ndenge ya malamu mpenza. Molakisi akamwaki mingi mpe atunaki ye ndenge nini ayebaki makambo nyonso wana. Ntango Anna ayebisaki ye ete ayekolaka Biblia na Batatoli ya Yehova, molakisi akataki ye maloba, mpe alobaki ete amonaka ete Batatoli bazalaka na bindimeli ya makasimakasi.

Mokolo mosusu, molakisi yango asɛngaki bana-kelasi bákoma lisolo moko oyo elobeli bomoi na Géorgie mpe mikakatano mosusu oyo ezali na ekólo yango. Na nsuka ya lisolo na ye, Anna akomaki boye: “Milende nyonso oyo bato bakosala mpo na kobongola mpenza mokili ekolonga te mpo, ndenge Yilimia 10:23 elobi: ‘Nzela ya moto ezali kati na ye moko te, ekoki na motamboli te ete atambolisa makolo na ye moko.’ Kaka Bokonzi ya Nzambe nde ekosilisa mikakatano nyonso.”

Na mokolo oyo elandaki, molakisi akumisaki lisolo ya Anna liboso ya bana-kelasi nyonso mpe alobaki boye: “Nasepeli na lisolo ya Anna oyo eleki nyonso, mpe akomi yango na maloba na ye moko. Na lisolo yango, alimboli ndenge oyo makambo ya mokili ekoki kobonga.” Molakisi asepelaki mpe na etamboli ya Anna, akumisaki ye liboso ya bana-kelasi nyonso mpo na bizaleli na ye ya malamu mpe molato na ye ya mindɔndɔ te.

Ntango Batatoli ya Yehova bakendaki kotala molakisi na ndako na ye, alobaki ete liboso azalaki komona bango lokola bato oyo bazalaka na bindimeli ya makasimakasi kasi abongoli makanisi na ye mpo na mwana-kelasi na ye Anna. Na 2007, molakisi yango ayanganaki na Ekaniseli ya liwa ya Yesu Klisto elongo na Batatoli ya Yehova mpe alandaki likita yango na likebi.

Nsima ya Ekaniseli, molakisi ya Anna andimaki ete akamwaki mpenza komona ete Batatoli ya Yehova bayebi Biblia malamu. Lelo oyo, Batatoli bayekolaka na ye Biblia mbala na mbala. Na ntembe te, lokola molakisi wana, yo mpe otingamaka kaka na makanisi na yo te, yango wana olingaka koyeba oyo etindaka bato mosusu bándima mateya boye to bázala na etamboli boye. Mpo na nini te kosɛnga Motatoli ya Yehova moko ayekolaka Biblia na yo ofele?

[Elilingi na lokasa 9]

Anna azali kokoma lisolo na ye