Bobangé epekisaki ye te mpo na kosalela Yehova

MIBANGÉ mingi bazalaka na mayoki ete bambula na bango oyo etikali na bomoi na bango ezali na elikya mingi te ya kopesa esengo. Nkutu mwasi moko, mobangé, oyo ayebani mingi lokola mosani alobaki ete: “Nasili kobebisa bomoi na ngai, mpe sikawa nakoki lisusu kobongola yango te . . . Wana natambolaka ngai moko, nakanisaka na ntina na bomoi na ngai, mpe nazali na esengo te na lolenge oyo nasalelaki yango . . . Bipai binso nazali na kimya te mpe nakoki te kofanda esika moko.”

Mwasi moko mobangé oyo azalaki na bomoi esili koleka mibu 2 000 akutanaki na mikakatano motindo oyo soko moke te. Azalaki mokufeli-mobali ya mibu 84, kasi azalaki na makasi, na esengo mpe azwaki ngolu mingi epai na Nzambe. Nkombo na ye ezalaki Ana, mpe azalaki na ntina mpenza ya kozala na esengo. Yango ezalaki nini?

“Azalaki kozanga soko moke te na Tempelo”

Luka, mokomi ya Evanzile azali kolakisa biso Ana. Alobi ete: “Mosakoli mwasi, Ana mwana na Fanwele, moto na libota na Asele” na Yisraele. Lokola azalaki mosakoli, azalaki na likabo ya elimo santu ya Nzambe, to nguya oyo ekosalaka mosala, na lolenge ya sikisiki mpenza. Mpe Ana azalaki na libaku moko kitoko ya kosakola likambo moko ya ntina mingi.

Luka abakisi ete: “[Mwasi wana, NW] ajalaki mobange mingi; ajalaki na mobali mbula nsambo nsima na libala na ye, mpe na nsima na kufa na mobali afandaki kino mbula ntuku mwambe na minei.” (Luka 2:36, 37) Emonani mpenza ete, Ana akómaki mokufeli-mobali wana azalaki mpenza elenge. Basi baklisto nyonso oyo bakufeli mibali bayebi mpasi oyo eutaka na kokufela mobali oyo balingaki mingi. Nzokande, lokola basi mingi oyo babangaka Nzambe na ntango na biso, Ana apesaki nzela na likambo wana ya mawa te ete epekisa mosala na ye mpo na Nzambe.

Luka ayebisi biso ete Ana “azalaki kozanga soko moke te na tempelo” na Yelusaleme. (Luka 2:37, NW) Asepelaki mingi na mapamboli oyo mautaka na kosala kati na ndako ya Nzambe. Misala na ye mizalaki komonisa ete, lokola Davidi, mokonzi mokomi na Nzembo na Yisraele, ye azalaki bobele na eloko moko oyo asɛngaki epai na Yehova. Eloko yango nini? Davidi ayembaki ete: “Nalɔmbi elɔkɔ mɔkɔ epai na [Yehova], nakolanda yango; yango ete nafanda kati na ndako na [Yehova]; mikɔlɔ yɔnsɔ na bomɔi na ngai, ete natala boboto na [Yehova] mpe [nakanisela tempelo na ye na botɔ́ndi nyonso, NW].” (Njembo 27:4) Kati na likambo oyo, Ana akokanaki mpe na basi baklisto oyo na mikolo na biso bazali kosepela mingi kozala ntango nyonso na esika ya losambo ya Yehova.

Ana azalaki kosala mosala ya bulee mpo na Yehova butu na moi. Azalaki “kokila mpe na kobɔndɛla,” oyo ezalaki komonisa mawa mpe mposa makasi oyo azalaki na yango. (Luka 2:37) Boombo uta bikeke mingi oyo Bayuda bazalaki kati na yango na nsé ya biyangeli ya bapakano, bakisá mpe kobeba kati na makambo ya losambo oyo ekómaki kino kati na tempelo mpe bonganga na yango, ekokaki mpenza kozala ntina ya kokila bilei mpe mabondeli ya Ana epai na Yehova Nzambe. Kasi ye azalaki mpe na ntina malamu ya kozala na esengo, mingi mpenza mpo na likambo moko monene oyo lisalemaki na mokolo ya ntina mingi na mobu 2 L.T.B.

Lipamboli oyo amizelaki na yango te

Na mokolo wana ya ntina mingi, mwana Yesu akumbamaki na mama na ye, Malia, mpe na tata mobɔkɔli na ye Yosefe, kati na tempelo ya Yelusaleme. Mobangé Simeona amonaki mwana moke mpe abimisaki maloba ya esakweli na libaku yango. (Luka 2:25-35) Ana azalaki kati na tempelo lokola na momeseno. Luka ayebisi ete: “Ayaki na ntango yango mpenja.” (Luka 2:38) Oyo nde esengo monene Ana azalaki na yango lokola miso na ye oyo ebandaki kolemba, emonaki ye oyo asengelaki kokóma Masiya!

Mikolo ntuku minei na liboso, anzelu moko ya Nzambe akamwisaki babateli na mpate penepene na Beteleme na maloba oyo: “Tala, napɛsi bino nsango malamu na esɛngɔ monɛnɛ ekojala na bato yɔnsɔ. Mpɔ ete Mobikisi, ye Klisto Nkolo, abotameli bino lɛlɔ na mboka na Dawidi.” Ebele na limpinga ya likoló ekumisaki Yehova mpe ebakisaki ete: “Nkɛmbɔ na Njambe na bisika-bileki-Likolo, mpe kimia na nse kati na bato [na boboto, NW].” (Luka 2:8-14) Bobele bongo, Ana apusamaki sikawa na kopesa litatoli na ntina na Ye oyo asengelaki kozala Masiya!

Nsima na kotala mwana Yesu, Ana “atɔndaki Njambe, mpe asololaki na ntina na mwana yango na bango yɔnsɔ bajalaki kotalela lisiko na Yelusaleme.” (Luka 2:38) Lokola mobangé Simeona, oyo azalaki mpe na libaku malamu ya komona mwana Yesu kati na tempelo, na ntembe te, Ana azalaki na mposa makasi, azalaki kobondela mpe kozela Mobikisi oyo alakamaki. Nsango malamu oyo ete Yesu azalaki Ye oyo alakamaki elekaki mpenza kitoko, na boye ete akokaki kobomba yango mpo na ye moko te.

Atako Ana akokaki te komizela ete azala na bomoi kino Yesu akokóla, kasi ye asalaki nini? Atatolaki na esengo nyonso epai na basusu na ntina na kosikolama oyo ekosalema na Masiya oyo asengelaki koya.

Ndakisa kitoko ya Ana

Bato boni oyo bamipesá na makambo ya Nzambe kati na mokili, balingaki kopesa litatoli motindo yango to kolanda kosalela Nzambe mosala ya bulee butu na moi wana bazali na mibu 84? Basengelaki mpenza kosɛnga pension mibu mingi na liboso. Ana mpe Simeona basalaki bongo te. Batikaki ndakisa moko kitoko mpo na mibangé nyonso oyo bazali basaleli ya Yehova. Ya solo, balingaki ndako ya losambo ya Yehova mpe basanzolaki ye na motema na bango mobimba.

Tozali kokuta epai na Ana ndakisa moko kitoko ya mwasi-mokufeli mobali oyo azalaki kobanga Nzambe. Ya solo, maloba ya Luka oyo mazali kolobela mobangé mwasi wana makokani mpenza na bizaleli ya mwasi-mokufeli mobali ya sembo lokola yango elobami na 1 Timoté 5:3-16. Kuna ntoma Paulo alobi ete mwasi-mokufeli mobali motindo yango “akoumelaka na bisengeli mpe na mabɔndɛli butu na moi,” azali “mwasi na mobali bobɛlɛ mɔkɔ,” mpe ‘atiaki motema na ye kati na misala yɔnsɔ malamu.’ Ana azalaki lolenge ya mwasi motindo wana.

Lelo oyo, tozali na basi bakufeli-mibali ya sembo, baoyo bazali kosalela Nzambe mosala ya bulee butu na moi kati na masangá ya Batatoli ya Yehova na mabelé mobimba. Tozali mpenza kosepela na ba “Ana” wana ya mikolo na biso, baoyo bazali katikati na biso!

Atako bapusani mingi na mbula, mibali mpe basi bakoki komipesa epai na Nzambe mpe komonisa yango na batisimo ya mai. Mpo na mibangé ntango mpenza eleki te mpo na kosalela Yehova mpe kotatola na ntina na Bokonzi ya Masiya oyo esilaki kotyama na makoló mpe oyo mosika te ekomema mapamboli mingi epai na bato ya botosi. Bato oyo basili kopusana na mbula, baoyo bazali sikawa kosalela Nzambe mosala ya bulee, bakoki kotatola na ntina na mapamboli ya Nzambe oyo basili kozwa, lolenge moko na Ana oyo azwaki mapamboli minene bikeke mingi na liboso. Azalaki mpenza mobangé mingi te mpo ete atika kosalela Yehova mpe kosanzola nkombo na ye mosantu​—bango mpe batiki kosala yango te.