Biblia elobi nini?

Ezali mabe kolongwa na lingomba na yo?

Ntango Avtar abandaki koyekola Biblia, bato ya libota na ye oyo bazali na Lingomba ya Sikh basilikaki. Ye moko alobi boye: “Na mboka na biso, soki olongwe na lingomba na yo, bato nyonso bakosundola yo. Ata bankombo na biso ezalaka na ndimbola ya makambo ya lingomba. Soki otiki lingomba na yo, emonanaka lokola obungi nzela mpe ozangi limemya epai ya bato ya libota na yo.”

NSUKANSUKA, Avtar akómaki Motatoli ya Yehova. Asalaki mabe ndenge alongwaki na lingomba na ye? Ntango mosusu okoki kozala na likanisi ndenge moko na bato ya libota na ye. Okoki kokanisa ete lingomba na yo ekangani na libota mpe mimeseno na bino mpe osengeli kotika lingomba yango te.

Ezali na ntina tómemyaka libota na biso. Biblia elobi boye: “Yoká tata na yo oyo abotaki yo.” (Masese 23:22) Kasi, ezali na ntina koluka koyeba solo mpo na Mozalisi mpe mikano na ye. (Yisaya 55:6) Tokoki koyeba solo yango? Soki ezali bongo, koluka yango ezali na ntina nini mpo na yo?

Ndenge ya koyeba solo

Mangomba ya mokili ezalaka na bomoko te na mateya na yango. Yango wana, mateya yango ekoki kozala nyonso solo te. Mpo na yango, ezali na bato mingi oyo Biblia elobi ete “bazali na molende mpo na Nzambe; kasi nde na boyebi ya solosolo te.” (Baroma 10:2) Kasi na 1 Timote 2:4, ntoma Paulo alobi ete mokano ya Nzambe ezali ete “bato ya ndenge nyonso . . . bázwa boyebi ya sikisiki ya solo.” Ndenge nini moto akoki kozwa boyebi yango?

Mpo na nini tosengeli koyekola Biblia? Paulo, mokomi moko ya Biblia alobaki boye: “Makomami nyonso ekomami na litambwisi ya elimo ya Nzambe mpe ezali na litomba mpo na koteya.” (2 Timote 3:16) Ntango ozali koluka koyeba solo, talelá bilembeteli oyo ezali kondimisa ete Biblia elobaka solo. Luká komona yo moko bwanya, bosolo ya masolo na yango, mpe kokokisama ya bisakweli na yango.

Na esika ya komonisa ete mangomba nyonso ezali ndenge moko na miso ya Nzambe, Biblia elendisi batángi bándimaka te makambo nyonso oyo bazali koyoka, kasi ‘bámekaka maloba yango mpo na komona soki euti mpenza na Nzambe.’ (1 Yoane 4:1) Na ndakisa, mateya nyonso oyo euti na Nzambe esengeli koyokana na bomoto na ye, ata mpe ezaleli na ye oyo eleki monene, bolingo.​—1 Yoane 4:8.

Biblia amonisi ete Nzambe alingaka bato báyeba ye mpenza. (Misala 17:26, 27) Lokola Mozalisi na biso alingi tóluka koyeba solo, ezali mabe te tósalela boyebi yango, ata soki yango ekosɛnga tólongwa na lingomba na biso. Kasi, ezali boni mpo na mikakatano oyo yango ekoki kobimisa?

Tózala na bokatikati

Ntango moto akómi na lingomba mosusu, akoki kozwa ekateli ya kotika kosangana na milulu to bafɛti ya lingomba na ye. Yango ekoki kobimisa matata na kati ya libota. Yesu ayebaki yango. Ayebisaki bayekoli na ye boye: “Nayaki kokabola: moto akotombokela tata na ye, mpe mwana mwasi akotombokela mama na ye, mpe elenge mwasi ya libala akotombokela bokilo na ye ya mwasi.” (Matai 10:35) Yesu alingaki nde koloba ete mateya ya Biblia esengeli se kobimisaka matata? Te. Alobelaki kaka likambo oyo ekoki kosalema ntango bato ya libota moko basepeli te mpo ndeko na bango akómi na bindimeli mosusu.

Tokoki mpenza kolonga kosala ete mikakatano ezala te na libota? Biblia elobi ete bana basengeli kotosa baboti na bango mpe mwasi asengeli kotosa mobali na ye. (Baefese 5:22; 6:1) Kasi, esɛngi bato oyo balingaka Nzambe ‘bátosa Nzambe mpo azali mokonzi na esika ya kotosa bato.’ (Misala 5:29) Yango wana, na bantango mosusu, bosembo epai ya Nzambe ekoki kosɛnga yo ozwa ekateli oyo ekosepelisa bato ya libota na yo te.

Atako Biblia emonisi polele bokeseni kati na losambo ya solo mpe oyo ya lokuta, Nzambe apesi moto mokomoko bonsomi ya kopona. (Kolimbola Mibeko 30:19, 20) Bakoki kotinda moto na makasi te akangama na losambo oyo amoni ete ebongi te, to mpe apona soki alingi libota na ye to bindimeli na ye. Mateya ya Biblia epanzaka mabota? Te. Kutu, Biblia elendisaka mobali ná mwasi oyo bazali na mangomba ekeseni bákabwana te.​—1 Bakorinti 7:12, 13.

Longolá kobanga

Okoki kobanga ete bato ya mboka na bino bakosepela te soki obandi koyekola Biblia ná Batatoli ya Yehova. Mariamma alobi boye: “Libota na ngai ezalaki kobanga ete nakozwa mobali ya malamu te oyo akokokisa bamposa na ngai. Yango wana balingaki te nayekola Biblia.” Mariamma atyelaki Yehova Nzambe motema mpe akobaki koyekola. (Nzembo 37:3, 4) Yo mpe okoki kosala bongo. Na esika ya kobanga oyo bato bakoloba, talelá nde matomba oyo okozwa. Nsango ya Biblia ebongolaka bomoi ya bato mpe bizaleli na bango. Eteyaka bato bálinga mabota na bango. Moto akoki kotika bizaleli mabe lokola kofinga, kobunda, kolangwa masanga mpe komela makaya. (2 Bakorinti 7:1) Biblia esalisaka bato bákóma bato ya bosembo mpe bázala makasi na mosala. (Masese 31:10-31; Baefese 4:24, 28) Mpo na nini te koyekola Biblia mpe komona matomba ya kosalela mateya na yango na bomoi na yo?

OSILÁ KOMITUNA?

◼ Mpo na nini osengeli kotalela bindimeli ya lingomba na yo?​—Masese 23:23; 1 Timote 2:3, 4.

◼ Ndenge nini okoki koyeba mateya ya solo?​—2 Timote 3:16; 1 Yoane 4:1.

◼ Botɛmɛli ya libota esengeli kopekisa yo koyekola Biblia?​—Misala 5:29.

[Likanisi ya paragrafe na lokasa 19]

Nsango ya Biblia ebongisaka bomoi mpe bizaleli ya bato

[Elilingi na lokasa 19]

Mariamma ná mobali na ye