Sekele 4: Limemya

“Koganga mpe maloba ya kofinga elongwa mosika na bino.”​—Baefese 4:31.

Elimboli nini? Ezala na mabota ya malamu to na oyo ezali na mikakatano, matata ezangaka te. Kasi mabota ya malamu balobelaka makambo kozanga kotyolana, kofingana to kobimisa maloba mosusu ya mabe. Bato ya mabota yango basalelaka basusu makambo ndenge oyo bakolinga ete básalela bango.​—Matai 7:12.

Mpo na nini ezali na ntina? Maloba ekoki kokóma bibundeli mpo na kosala moto mabe. Lisese moko ya Biblia elobi boye: “Malamu kutu ófanda na mboka oyo ezangá bato, esika tè ófanda ná mwasi ya makelele pe ya kanda.” (Batoli 21:19, Bible na lingala ya lelo oyo) Ezali mpe bongo mpo na mobali ya makelele. Epai ya baboti, Biblia elobi boye: “Bósilikisaka bana na bino te, mpo bálɛmba nzoto te.” (Bakolose 3:21) Bana oyo baboti na bango batyolaka bango ntango nyonso bakoki komona ete bakoki kosepelisa baboti na bango ata moke te. Bakoki kotika komeka ata komeka.

Meká kosala boye. Yanolá mituna oyo elandi mpo na koyeba soki bopesanaka limemya na libota na bino.

◼ Soki matata ebimi na libota na biso, nsukansuka moto moko abimaka na nkanda?

◼ Ntango nalobaka na mwasi na ngai to na bana na ngai, nasalelaka maloba ya kofinga lokola “zoba,” “bolole,” to maloba mosusu ya ndenge wana?

◼ Nakolá na esika oyo bato bazalaki kofinga mingi?

Zwá ekateli makasi. Kanisá mokano moko to mibale oyo okoki komityela na oyo etali komonisa limemya na maloba na yo. (Likanisi: Zwá ekateli ya kosalela liloba “ngai” na esika ya liloba “yo.” Na ndakisa, “Nayokaki mpasi ntango osalaki . . . ,” na esika ya “Ozalaka ntango nyonso . . .”)

Mpo na nini te koyebisa molongani na yo mokano to mikano oyo omityeli? Nsima ya sanza misato, tuná ye ayebisa yo soki obongisi makambo mosusu.

Kanisá ndenge okoki kosala mpo otika maloba ya kofinga ntango ozali kosolola na bana na yo.

Mpo na nini te kosɛnga bana na yo bolimbisi soki esalemi ete ogangela bango na ndenge ya mabe to ya kotyola?

[Elilingi na lokasa 6]

Kaka ndenge mbonge ya mbu ekoki kolya libanga mokemoke, maloba ya mabe ekoki kobebisa libota