Sekele 6: Kolimbisana

“Bókoba kokanga motema moto na moto na makambo ya mosusu mpe kolimbisana na motema moko.”​—Bakolose 3:13.

Elimboli nini? Babalani ya malamu bazwaka liteya na makambo ya kala; kasi, babombaka te makambo oyo esalaki bango mpasi mpo báya kosalela yango mpo na koloba, na ndakisa “ozalaka ntango nyonso na retare” to “oyokaka te.” Mobali mpe mwasi bayebaka ete “kitoko [ya moto] ezali ete alimbisaka likambo oyo ebuki mibeko.”​—Masese 19:11.

Mpo na nini ezali na ntina? Nzambe ‘asepelaka kolimbisa,’ kasi bato bazalaka ntango nyonso bongo te. (Nzembo 86:5) Kozanga kosilisa matata oyo ezali kobima ekoki kobakisa nkanda na motema tii ekoya komonana lokola ete ndenge ya kolimbisa ezali te. Molongani mokomoko akoki koboya koyebisa ndenge oyo azali komiyoka​—na ntango wana, moto na moto aboyi kotalela bamposa ya moninga. Bango nyonso bakomona ete bazali na kati ya libala oyo ezangá bolingo.

Meká kosala boye. Talá bafɔtɔ oyo bokangaki na molongani na yo ntango bobalanaki sika to ntango bozalaki bafianse. Meká kopɛlisa lisusu bolingo oyo ozalaki na yango liboso mikakatano eya mpe ebebisa makanisi na yo mpo na molongani na yo. Na nsima, kanisá makambo malamu ya molongani na yo oyo etindaki yo olinga ye.

◼ Bizaleli nini ya molongani na yo ozali kosepela na yango mingi sikoyo?

◼ Kanisá bolamu oyo okosala bana na yo soki ozali kolimbisa.

Zwá ekateli makasi. Kanisá likambo moko to mibale oyo okoki kosala mpo ozongelaka te mabunga ya kala ntango matata mosusu ebimi kati na yo ná molongani na yo.

Mpo na nini te kokumisa molongani na yo mpo na bizaleli na ye oyo osepelaka na yango?​—Masese 31:28, 29.

Kanisá ndenge oyo okobanda komonisa bana na yo ete olimbisi bango.

Mpo na nini te kosolola na bana na yo ntina ya bolimbisi mpe ndenge oyo kolimbisa esalisaka moto nyonso na libota?

[Elilingi na lokasa 8]

Ntango olimbisi moto, olongoli nyongo. Ozali kosɛnga yango lisusu te