“Bókomela Antone!”

● Antone, elenge mobali moko oyo azalaki Motatoli ya Yehova, azalaki kofanda na Chtchelkane, mboka moko ya mosika na etúká ya Stavropol, na ekólo Russie. Banda bomwana na ye, minganga bamonaki ete azali na maladi moko oyo esilaka te na nkombo dystrophie de Duchenne. Maladi yango ebebisaka misisa nokinoki mpe mbala mingi ebomaka moto liboso akokisa mbula 20. Ntango Antone akómaki na mbula libwa, azalaki kotambola to kotɛlɛma lisusu te.

Ntango Ievgueni ná mwasi na ye Diana bakendeki kotala lisangá moko ya Batatoli ya Yehova, bakutaki Antone kuna. Diana alobi boye: “Nzoto elɛmbaki mpenza, kasi boyokani na ye na Nzambe ezalaki makasi. Lokola yaya na ye ya mobali akufaki na maladi yango ntango akómaki na mbula 19, Antone ayebaki ete mikolo na ye etikali ya kotánga. Kasi, azalaki kaka na esengo mpe na elikya.”

Diana ná mobali na ye balendisaki Antone amipesa na kosakola na kokomeláká bato ya bamboka mosusu ya mosika mikanda. Na 2005, akomaki mikanda soki 500 mpe atindelaki yango bato ya bamboka yango. Kasi, alɛmbaki nzoto mpo azwaki ata eyano moko te. Atako bongo, Antone akobaki kokoma mikanda, mpe abondelaki Nzambe makasi mpo asalisa ye ayeba koteya bato na ndenge ya malamu atako azalaki na maladi.

Mokolo moko ntango Antone azalaki kotánga zulunalo moko, amonaki mokanda ya mwasi moko oyo azalaki kobɛla mpe azalaki na mposa bábɔndisa ye. Antone akomelaki mwasi yango mokanda. Kaka zulunalo yango ezongelaki ndambo ya makambo oyo akomaki na mokanda wana; alobaki boye: “Atako nazali na maladi oyo ekoki kosila te, kotánga Biblia esalisaka ngai nazala na elikya mpo na mikolo ezali koya. Nasepelaka bákomela ngai mikanda mpe nazelaka yango ntango nyonso.”

Makambo oyo Antone akomaki esimbaki motema ya mwasi yango mpe mwasi yango akomaki lisusu. Mokanda na ye ebimaki kaka na zulunalo yango na molɔngɔ moko oyo elobaki ete: “Bókomela Antone!” Mwasi yango amonisaki ete asepeli mingi ndenge Antone alobelaki makambo ya kotánga Biblia mpe abakisaki boye: “Tósalisa Antone! Tókomela ye mikanda! Elenge mobali yango azali mpenza na mposa ya maloba ya boboto!” Batyaki mpe adrɛsi ya Antone.

Mokolo na mokolo, Antone azalaki kozwa mikanda koleka 30 na mwa posita ya mboka na bango! Ezalaki kouta na Russie mobimba, na Estonie, Lettonnie, na Lituanie, na Allemagne, ata mpe na France. Bato oyo batángaka zulunalo yango batindelaki ye bankama ya mikanda. Diana alobi boye: “Antone asepelaki mingi mpenza. Sikoyo akómaki na bankama ya bato oyo akokaki kokomela bango mpo na koyebisa bindimeli na ye oyo euti na Biblia.”

Antone ná bato wana nyonso bakomelanaki na boumeli ya mbula mobimba na ndambo. Mokemoke, lokola misisa ya mabɔkɔ na ye elɛmbaki, akómaki koyebisa moto mosusu maloba na ye mpo akomela ye mikanda. Na sanza ya Sɛtɛmbɛ 2008, Antone akufaki. Azalaki na mbula 20. Atako nzoto ya Antone elɛmbaki mpenza, kondima na ye mpe bolingo na ye mpo na mosala ya kosakola epesaki ye nzela ya kosolola na bato ebele.