Ntango omoni ete olɛmbi bomoi

MOKOLO na mokolo na mokili mobimba, bato pene na 3 000 balukaka kosukisa bomoi na bango. Biblia elobeli likambo oyo etindaka bato mingi bákoma na makanisi ya ndenge wana. Emonisi ete mikolo na biso oyo, ezali “ntango moko ya mpasi mpenza mpe ya mikakatano.” Bato bazali konyokwama makasi na mikakatano ya bomoi. (2 Timote 3:1; Mosakoli 7:7) Ntango moto amoni ete mitungisi ya bomoi elekeli ye, akoki koluka komiboma mpo mpasi esila. Okoki kosala nini soki makanisi ya ndenge wana eyelaka yo?

Ozali yo moko te!

Ata soki omoni lokola ete osuki, kobosana te ete ozali yo moko te; yebá mpe ete pene na moto nyonso azali na oyo ya ye bampasi. Biblia elobi ete: “Biloko nyonso oyo ezalisamá ezali se kokimela elongo mpe konyokwama elongo tii sikoyo.” (Baroma 8:22) Ata soki sikoyo ezali komonana lokola ete mikakatano na yo ekosila te, kobosana te ete mbala mingi makambo ebongaka nsima ya mikolo. Kasi, lisalisi nini okoki kozwa sikoyo?

Yebisá moninga moko oyo akɔmeli, oyo otyelaka motema. Biblia elobi boye: “Moninga ya solosolo alingaka ntango nyonso, mpe azali ndeko oyo abotami mpo na ntango ya mpasi.” (Masese 17:17) Yobo, moto ya sembo oyo Biblia elobeli, afungolelaki baninga na ye motema ntango azalaki konyokwama. Ntango mpasi ekómelaki ye makasi tii ‘ayokaki bomoi na ye mpii mpenza,’ alobaki boye: “Nakobimisa lobanzo oyo nazali na yango mpo na ngai moko. Nakoloba na bololo ya molimo na ngai!” (Yobo 10:1) Koyebisa moninga ekitisaka mpasi ya motema, mpe ekoki kosalisa yo obongola lolenge na yo ya kotalela mikakatano na yo.

Fungolelá Nzambe motema na yo na libondeli. Bato mosusu bakanisaka ete libondeli esalisaka mpenza te. Kasi Biblia elobi bongo te. Na Nzembo 65:2, Yehova Nzambe abengami “Moyoki ya libondeli,” mpe 1 Petro 5:7 elobi ete: ‘Atyelaka biso likebi.’ Biblia elobeli mbala na mbala ntina ya kotyela Nzambe motema. Na ndakisa, elobi boye:

“Tyelá Yehova motema na yo mobimba mpe kondimela mayele na yo moko te. Na banzela na yo nyonso, kanisá ye, mpe ye akosembola banzela na yo.”​—MASESE 3:5, 6.

“[Yehova] akokokisa mposa ya baoyo bazali kobanga ye, mpe akoyoka kolela na bango mpo na kosɛnga lisalisi, mpe akobikisa bango.”​—NZEMBO 145:19.

“Kotya motema oyo totyelaka ye yango oyo: ete, ezala eloko nini biso tokosɛnga na boyokani na mokano na ye, akoyoka biso.”​—1 YOANE 5:14.

“Yehova azali mosika mpenza na bato mabe, kasi ayokaka libondeli ya bayengebene.”​—MASESE 15:29.

Soki oyebisi Nzambe mikakatano na yo, akosalisa yo. Yango wana Biblia elendisi biso ete: ‘Tótyela ye motema ntango nyonso . . . Tósopa motema na biso liboso na ye.’​—Nzembo 62:8.

Soki lisalisi mosusu esengeli

Baankɛtɛ emonisi ete bato mingi oyo bamibomaka bazalaki liboso konyokwama na makanisi.a Yango emonisi ete ntango mosusu esɛngaka moto akutana na monganga. Monganga akoki kokomela ye nkisi to kopekisa ye kolya biloko mosusu. Mbala mosusu, ekosɛnga alanda programe ya ngalasisi mpo esalisa ye. Lisalisi ya minganga esalisaki bato mingi.b

Biblia ezali na makambo mingi oyo esalisaka mpe epesaka moto elikya. Na ndakisa, Emoniseli 21:4 elobi mpo na Yehova Nzambe ete: “Akopangwisa mpisoli nyonso na miso na bango, mpe liwa ekozala lisusu te, ná lilaka ná koganga ná mpasi ekozala lisusu mpe te. Makambo ya kala eleki.” Yango ezali elaka euti na Nzambe, mpe kokanisa yango ekoki kokitisa mpasi ya motema.

Batatoli ya Yehova bazali koyebisa elikya wana oyo euti na Biblia na bato nyonso ya mokili mobimba. Yango esalisi bato mingi bákóma na elikya ya solosolo na mikolo oyo ya mpasi. Soki olingi koyeba makambo mosusu, kende na Ndako ya Bokonzi ya Batatoli ya Yehova na esika ofandi, to tindá mokanda na moko ya baadrɛsi oyo ezali na lokasa 5 ya zulunalo oyo. Okoki mpe kotala na Internet na adrɛsi oyo: www.pr2711.com.

[Maloba na nse ya lokasa]

[Etanda na lokasa 20]

BAVƐRSƐ OYO EKOKI KOSALISA YO

● “Bómitungisa ata na likambo moko te, kasi na makambo nyonso na libondeli mpe na lilɔmbɔ ná matɔndi, kosɛnga na bino eyebana epai ya Nzambe; mpe kimya ya Nzambe oyo eleki makanisi nyonso ekobatela mitema na bino mpe makanisi na bino na nzela ya Kristo Yesu.”​—Bafilipi 4:6, 7.

● “Natunaki Yehova, mpe ayanolaki ngai, mpe abikisaki ngai na makambo nyonso oyo ezalaki kopesa ngai nsɔmɔ.”​—Nzembo 34:4.

● “Yehova azali pene na baoyo motema ebukani; mpe abikisaka baoyo elimo etutami.”​—Nzembo 34:18.

● “Abikisaka baoyo bazoki na motema, mpe akangaka bampota na bango oyo ezali kosala mpasi.”​—Nzembo 147:3.

[Etanda na nkasa 21, 22]

SOKI MAKANISI YA KOMIBOMA EYELI YO . . .

Yebisá moninga moko oyo otyelaka motema

Fungolelá Nzambe motema na yo na libondeli

Luká lisalisi ya monganga

[Etanda/​Elilingi na lokasa 22]

EPAI YA BANINGA NÁ LIBOTA

Mbala mingi, bandeko ya libota mpe baninga ya motema nde bazalaka bato ya liboso ya komona ete moto oyo azali konyokwama na makanisi alingi komiboma. Soki basalisi ye bakoki kobikisa bomoi na ye! Yoká moto yango na boboto nyonso. Monisá ye ete ondimi mpenza ete azali na mikakatano. Biblia elobi boye: “Bólobaka na ndenge ya kobɔndisa epai ya milimo oyo enyokwami na makanisi.” (1 Batesaloniki 5:14) Lendisá moto yango aluka lisalisi, mpe soki esengeli, landelá ete azwa mpenza lisalisi oyo ebongi.