Mituna oyo bilenge batunaka
Mpo na nini nalobi bongo?
Lisolo oyo ekosalisa yo otalela
MPO NA NINI ntango mosusu olobaka makambo oyo ebongi te
NINI osengeli kosala soki ekómeli yo
NDENGE ya kopekisa lolemo na yo
“Nayebaka kopekisa lolemo na ngai, kasi ekómelaka ngai nabɛta libaku mpe na nsima nayokaka lokola nazinda!”—Chase
“Ekómelaka ngai naloba likambo oyo bato mosusu mpe bazali kokanisa kasi bayebi ete bakoki kobimisa polele te . . . E ngai e!”—Allie
MPO NA NINI EKÓMAKA
Vɛrsɛ oyo ekosalisa yo: “Soki moto abɛtaka libaku na maloba te, ye azali moto ya kokoka.” (Yakobo 3:2) Yango elimboli nini? Moto moko te akoki kopekisa mpenza lolemo na ye. Mingi bamonaka lokola Annette,a oyo alobi boye: “Ntango mosusu monɔkɔ na ngai ezalaka na frein te.”
Likambo ekómelaki ye: “Moninga na ngai moko asepelaki na bilamba oyo nazalaki kolata lisusu te. Kozanga kokanisa, nayebisaki ye ete: ‘Nandimi te ete ekokoka yo.’ Azongiselaki ngai ete: ‘Nini? Omoni ngai nazali monene mingi?’”—Corrine.
Mpo oyeba nini etindaka yo obɛta libaku na maloba, talelá makambo oyo elandi.
● Nini ebɛtisaka yo libaku?
․․․․․ Mbala mingi nalobaka soki nasiliki
․․․․․ Mbala mingi nalobaka kozanga kokanisa
․․․․․ Mbala mingi nalobaka kozanga koyoka
․․․․․ Mosusu ․․․․․
Ndakisa: “Nasalaka masɛki mingi mpe bato mosusu bazwaka yango mabe.”—Alexis.
● Obɛtaka libaku mbala mingi epai ya nani?
․․․․․ Moboti
․․․․․ Ndeko
․․․․․ Moninga
․․․․․ Mosusu ․․․․․
Ndakisa: Christine (mbula 20) alobi boye: “Likambo ya mawa, bato oyo nazokisaka mingi na maloba ezali nde bato oyo nalingaka mingi. Nakanisi ete nakebaka te na maloba na ngai mpo tomesaná mingi.”
NINI OSENGELI KOSALA SOKI EKÓMI
Vɛrsɛ oyo ekosalisa yo: “Tólanda makambo oyo etyaka kimya.” (Baroma 14:19) Lolenge moko ya kosalela toli yango ezali kosɛnga bolimbisi.
Likambo oyo ekómelaki ye: “Mama akufaki ntango nazalaki naino na sanza zomi, mpe tata asundolá ngai; yango wana mama-nkulutu ná mobali na ye nde babokolaki ngai. Mokolo mosusu, ntango nazalaki na mbula soki 10 to 11, namiyokaki mpenza ete nazali ngai moko mpe nayokaki nkanda mpo na liwa ya mama, mpe nalukaki kopesa foti yango na moto moko. Yango wana ntango mama-nkulutu asɛngaki ngai nasalela ye mosala moko boye, natombokelaki ye; mpe na nsuka nayebisaki ye ete ‘Nalingaka yo te’ mpe ‘Ozali kutu mama na ngai te.’ Esalaki mama-nkulutu mabe mingi; akɔtaki na shambrɛ na ye mpe akangaki porte. Nayokaki ye azali kolela. Esalaki ngai mpasi mingi. Ye nde moto abɔkɔlaki ngai mpe asalaki nyonso mpo na ngai, bongo nalobela ye mabe boye? Papa-nkulutu asololaki na ngai likambo yango mpe alakisa ngai bavɛrsɛ oyo elobeli kopekisa lolemo. Na nsima, nasɛngaki mama-nkulutu bolimbisi na motema moko. Esengelaki namona ete nasalaki mabe.”—Karen.
Komá awa na nse likambo moko oyo ekoki kosala ete kosɛnga bolimbisi ezala mpasi mpo na yo.
․․․․․
Mpo na nini kosɛnga bolimbisi ekoki kokitisa yo motema?
․․․․․
Lisalisi: Talelá toli ya Masese 11:2 mpe Matai 5:23, 24.
Malamu osala makasi opekisa lolemo na yo na esika oloba mabe mpe na nsima esɛnga yo osɛnga bolimbisi. Ndenge nini?
NDENGE YA KOPEKISA LOLEMO NA YO
Vɛrsɛ oyo ekosalisa yo: ‘Yokaká noki, kowelaka koloba te, koyokaka nkanda noki te.’ (Yakobo 1:19) Mwa makanisi oyo elandi ekosalisa yo osalela toli yango.
Tángá bavɛrsɛ oyo elandi, mpe yokanisá vɛrsɛ mokomoko na likanisi na yango.
1 “Komimona te ete ozali na ntina mingi koleka; yango ekosalisa yo osilika nokinoki te.”—Danette.
2 “Nabimaka mpo natambola mwa moke; esalisaka ngai nazala ngai moko mpe nkanda ekita.”—Brielle.
3 “Ntango nazalaki mwana moke, nazalaki kolekisa likambo te, mpe nazalaki koswana mpo na likambo nyonso. Kasi sikoyo nayebi ete makambo mosusu bakipaka te.”—Celia.
4 “Soki moto azali kogangela yo mpe ofandi nyɛɛ, nsukansuka akolɛmba. Zalá motema molai. Kobakisa mafuta na mɔtɔ te.”—Kerrin.
5 “Ekómaka ete moto apesa ngai nkanda mpe nabanda kokanisa nyonso oyo nakoki kozongisela ye. Kasi soki nalekisi mwa ntango, namonaka ete nyonso wana ezali na yango ntina te. Namoni mpenza ete, ntina ya kowela koloba ezali te.”—Charles.
Okokuta masolo mosusu na “Mituna oyo bilenge batunaka” na Internet na esika oyo: www.pr2711.com
[Maloba na nse ya lokasa]
a Na lisolo oyo, bankombo mosusu ezali ya bango te.
[Etanda/Bililingi na lokasa 18]
Allie—Liboso naloba, namitunaka boye: ‘Ekobongisa makambo to te? Moto nazali koloba na ye, akozwa yango ndenge nini?’ Ntango ozali koyeba te soki oyo olingi koloba ebongi to te, malamu oloba te.
Chase—Soki nalingi koloba likambo, nalukaka liboso koyeba ndenge bato bakozwa yango. Namoni ete kokola ezali kosalisa ngai nayeba kopekisa lolemo na ngai malamu koleka. Makambo tokutanaka na yango, eteyaka mpenza.
[Etanda na lokasa 19]
OKOKI KOTUNA BABOTI NA YO
Lokola biso nyonso tozali bato ya kozanga kokoka mpe “biso nyonso tobɛtaka mabaku mbala mingi,” ndenge Yakobo akomaki yango, sololá na baboti na yo mpe tuná bango mikakatano oyo bakutanaki na yango mpo na kopekisa lolemo na bango.—Yakobo 3:2.
[Elilingi na lokasa 18]
“Soki obimisi nkisi ya mino, mwaye ozongisa yango lisusu na kati ezali te. Ezali mpe bongo mpo na maloba na biso. Soki obimisi liloba ya mabe, mwaye ozongisa yango lisusu ezali te.”—James.