Kosangisa nzoto mibali na mibali to basi na basi ekoki kondimama?

NA MIKILI mingi, bato bakómi kondima likambo ya kosangisa nzoto mibali na mibali to basi na basi. Na ndakisa na États-Unis, bato ya lingomba moko balingi ete bato bátalela lisusu oyo Biblia elobi mpo na likambo yango mpo eyokana na ndenge ekómi kotalelama mikolo oyo. Na Brésil, pastɛrɛ moko oyo auti kobala moninga na ye mobali asɛngi mpe ete bato “bátalela mibeko ya Biblia na ndenge ya sika,” mpo eyokana na makanisi ya mikolo oyo mpe ya lingomba na ye.

Epai mosusu, soki moto andimaka te likambo ya kosangisa nzoto mibali na mibali to basi na basi, mbala mingi bato bamonaka ete ayinaka baoyo basalaka bongo to akaniselaka bango mabe. Biblia elobi nini mpo na likambo ya kosangisa nzoto mibali na mibali to basi na basi?

Biblia elobi nini?

Biblia etindaka moto te akanisela basusu mabe. Kasi, elobeli polele likambo ya kosangisa nzoto mibali na mibali to basi na basi.

“Osengeli te kolala na mobali ndenge olalaka na mwasi. Ezali likambo oyo eyinamá.”​—Balevi 18:22.

Mobeko wana, oyo ezali kati na Mibeko ya Moize oyo esangisaki mibeko mosusu mingi etali bizaleli malamu, epesamaki kaka na ekólo ya Yisraele. Atako bongo, mobeko yango emonisi ndenge oyo Nzambe atalelaka likambo ya kosangisa nzoto mibali na mibali to basi na basi, ezala epai ya Bayuda to epai ya bato ya bikólo mosusu, ntango elobaki ete: “Ezali likambo oyo eyinamá.” Bato ya bikólo ya zingazinga ya Yisraele bazalaki kosala bongo, mpe lisusu kosangisa nzoto na ndeko ya libota, kosala ekobo, mpe makambo mosusu oyo Mibeko epekisaki. Yango wana, bikólo wana ezalaki mbindo na miso ya Nzambe. (Balevi 18:24, 25) Kasi, na ntango ya bakristo, likanisi ya Biblia na likambo wana ebongwanaki? Tótalela vɛrsɛ oyo:

“Nzambe atiki bango bálanda bamposa ya kosangisa nzoto na ndenge ya nsɔni, mpo basi na bango batiki ndenge oyo esengeli kosangisa nzoto, bakómi kosangisa nzoto na ndenge oyo esengeli te; mibali mpe ndenge moko batiki ndenge oyo esengeli kosangana na mwasi mpe bakómi kozika mpenza na mposa makasi bango na bango, mibali ná mibali, bazali kosala makambo ya nsɔni.”​—Baroma 1:26, 27.

Mpo na nini Biblia elobi ete kosangisa nzoto mibali na mibali to basi na basi ezali ndenge oyo esengeli te mpe likambo ya nsɔni? Mpamba te, Nzambe abongisaki te ete ezala bongo. Mobali na mobali to mwasi na mwasi bakoki kobota te. Lisusu, Biblia ekokanisi likambo ya ndenge wana na oyo baanzelu batomboki, oyo na nsima babengamaki bademo basalaki liboso ya Mpela na ntango ya Noa, ntango basangisaki nzoto na basi. (Ebandeli 6:4; 19:4, 5; Yuda 6, 7) Na miso ya Nzambe makambo nyonso wana ezali ndenge oyo esengeli te.

Ezali na makambo mosusu oyo ekoki kosala ete endimama?

Bato mosusu bakoki komituna boye: ‘Bongo soki moto asalaka bongo mpo abotamá na bamposa wana, to akolá esika oyo basalaka bongo, to akutaná na makambo ya mpasi na bomoi na ye na ndakisa bábebisa ye, ekoki kondimama?’ Te. Tózwa ndakisa moko: Moto moko akoki kozala na bamposa oyo minganga mosusu balobaka ete abotamá na yango, lokola mposa ya komɛla masanga, to akolá na libota oyo bato bazalaki na momeseno ya kolangwa masanga. Na ntembe te, bato mingi bakoyokela moto ya ndenge wana mawa. Atako bongo, moto moko te akolendisa ye akoba kolangwa to atika kosala milende mpo alangwa lisusu te kaka mpo abotamá na mposa yango to akolá na libota ya ndenge wana!

Ndenge moko mpe, Biblia elobi te ete moto oyo azali kobundana na mposa ya kosangisa nzoto ya ndenge wana azali moto mabe; kasi epekisi nde kokokisa bamposa yango, ezala moto abotamá na yango to eutá na makambo mosusu. (Baroma 7:21-25; 1 Bakorinti 9:27) Kutu, Biblia epesi toli oyo ekoki kosalisa mpe kolendisa bato bálonga bamposa wana.

Ndenge nini Nzambe atalelaka bato oyo bazalaka na bamposa ya kosangisa nzoto na baninga na bango mibali to basi?

Biblia elobi ete mokano ya Nzambe ezali ete “bato ya ndenge nyonso bábika mpe bázwa boyebi ya sikisiki ya solo.” (1 Timote 2:4) Atako Biblia epekisi kosangisa nzoto mibali na mibali to basi na basi, elobi te ete tóyina bato oyo basalaka bongo.

Tokoki te kolɛmbisa likanisi ya Nzambe na oyo etali kosangisa nzoto mibali na mibali to basi na basi. Na 1 Bakorinti 6:9, 10, Biblia elobi polele ete “mibali oyo balalaka na mibali” bazali na molɔngɔ ya bato oyo “bakozwa libula ya bokonzi ya Nzambe te.” Kasi vɛrsɛ 11 ebakisi likanisi ya kolendisa oyo ete: “Nzokande bamosusu na kati na bino bazalaki ndenge wana. Kasi bosukwami pɛɛ, kasi bosantisami, kasi botángami bayengebene na nkombo ya Nkolo na biso Yesu Kristo mpe na elimo ya Nzambe na biso.”

Ezali polele ete baoyo balingaki mpenza kosambela Nzambe na ndenge oyo andimaka, bayambamaki na bolingo nyonso na lisangá ya bokristo. Ezali mpe bongo lelo oyo mpo na bato nyonso ya motema sembo oyo bazali koluka kondimama na Nzambe. Balukaka te kobongola mibeko ya Biblia, kasi babongolaka nde bomoi na bango mpo eyokana na Biblia.

OSILÁ KOMITUNA?

● Biblia elobi nini mpo na kosangisa nzoto mibali na mibali to basi na basi?​—Baroma 1:26, 27.

● Biblia elobi ete tosengeli kotyola bato oyo bazalaka na bamposa ya ndenge wana?​—1 Timote 2:4.

● Moto akoki kolonga kopekisa bamposa ya ndenge wana?​—1 Bakorinti 6:9-11.

[Elilingi na lokasa 25]

Esengeli nde kobongola ndenge oyo Nzambe atalelaka kosangisa nzoto mibali na mibali to basi na basi?