Biblia elobi nini na likambo ya kosangisa nzoto mibali-mibali to basi-basi?

Eyano ya Biblia

Nzambe abongisá ete kosangisa nzoto ezala kaka kati na mwasi ná mobali oyo babalani. (Ebandeli 1:27, 28; Balevi 18:22; Masese 5:18, 19) Longola kaka bato oyo babalani, Biblia epekisi bato oyo bazali mwasi ná mobali te básala makambo ya kosangisa nzoto, ezala mpe kosangisa nzoto basi-basi to mibali-mibali. (1 Bakorinti 6:18) Makambo ya kosangisa nzoto elimboli ata kosimba enama ya kobotela ya moto mosusu, kosangisa nzoto na monɔkɔ, to na esumbeli.

Biblia epekisi kosangisa nzoto basi-basi to mibali-mibali. Kasi epekisi mpe koyina bato oyo basangisaka nzoto basi-basi to mibali-mibali. Biblia esɛngi nde bakristo ‘bómemya bato bánso.’​—1 Petro 2:17, Biblia Liloba lya Nzambe.

Moto akoki kobotama na mposa ya kosangisa nzoto na moninga mwasi to moninga mobali?

Biblia elobi polele te soki moto akoki kobotama na bamposa ya ndenge wana. Kasi emonisi ete biso nyonso tobotamaka na mposa ya kobuka mibeko ya Nzambe. (Baroma 7:21-25) Atako Biblia emonisi te soki bamposa ya kosangisa nzoto na moninga mwasi to moninga mobali eutaka wapi, epekisi kosala likambo yango.

Ndenge nini kosepelisa Nzambe ntango ozali na mposa ya kosangisa nzoto na moninga mwasi to moninga mobali?

Biblia elobi boye: “Nzoto na bino etambwisa bino te. Bóboma mposa nyonso ya kosangisa nzoto na ndenge ya mabe.” (Bakolose 3:5, Contemporary English Version) Mpo na koboma bamposa ya mabe, oyo ememaka na misala ya mbindo, osengeli kobatela makanisi na yo. Soki ozali kokɔtisa makambo ya pɛto na bɔɔngɔ na yo, ekozala mpasi te mpo obengana bamposa na yo ya mabe. (Bafilipi 4:8; Yakobo 1:14, 15) Na ebandeli, ekoki kosɛnga obunda mpenza, kasi na nsima ya mikolo okomesana. Nzambe alaki ete akosalisa yo ‘okómisama sika na kati ya bokasi oyo ezali kotambwisa makanisi na yo.’​—Baefese 4:22-24.

Bamilio ya bato bazali mpe kobunda etumba mpo na kopekisa mposa ya kosangisa nzoto na moto oyo babalani te; bazali kosala bongo mpo balingi kotosa mibeko ya Biblia. Na ndakisa, baoyo bazali minzemba mpe oyo elikya ya kobala ezali mingi te to mpe baoyo babalá kasi molongani akoki kosangisa nzoto te bazwaka ekateli ya kokanga bamposa na bango ya kosangisa nzoto ata soki bakutani na komekama ya ndenge nini. Bato yango bazali na bomoi ya esengo. Bato oyo bazalaka na mposa ya kosangisa nzoto na moninga mwasi to moninga mobali bakoki mpe kolonga kopekisa mposa yango soki balingi mpenza kosepelisa Nzambe.​—Kolimbola Mibeko 30:19.