Makambo etali Azia

Koteya bana ebatelaka bango

Bato ya mayele ya Chine na makambo ya mibeko balobi ete soki baboti bateyi bana na bango te makambo etali kosangisa nzoto ntango bazali naino mike, bana bakozala na likama mpo bato mabe bakoki kosangisa na bango nzoto. Na bambula minei oyo eleki, bazuzi ya Chine basambisaki bato 8 000 oyo bafundaki bango ete basangisaki nzoto na bana mike. Profesɛrɛ moko na makambo ya mibeko na iniversite ya Beijing, alobi ete lokola bana “bazalaka na likoki ya komibatela te, ezalaka mpasi te mpo básala bango mabe. Yango wana, koteya bana ekobatela bango mpo básala bango mabe te.”

OYO BIBLIA ELOBI: Baboti ya bwanya bateyaka bana na bango ndenge ya komibatela na “moto oyo alobaka makambo ya kilikili.”​—Masese 2:1, 10-12.

Liwa nsima ya mopɛpɛ makasi

Ankɛtɛ moko emonisi ete na Philippines, motángo ya bana mike ya basi oyo bakufaki mbula moko na nsima ya mopɛpɛ makasi oyo ebɛtaki na ekólo yango eleki mbala 15 motángo ya bato oyo bakufaki na mopɛpɛ yango. Ekoki kozala ete nsima ya mopɛpɛ makasi, makambo lokola kozanga mosala, mbongo ya kotonga lisusu bandako, ndenge ya kosalela mbongo oyo ebimaka mpo na bana mike ya basi, ata mpe kozanga bilei mpe lisalisi ya minganga nde esalaki ete bákufa mingi ndenge wana.

OYO BIBLIA ELOBI: ‘Kabolá limpa na yo na moto oyo azali na nzala, mpe kɔtisá na ndako na yo bato ya mpasi, bato oyo bazangá ndako. Soki omoni moto moko bolumbu, latisá ye.’​—Yisaya 58:7.

Likambo ya komiboma epai ya mibange na Corée du Sud

Na 2011, na bato oyo bamibomaki na Corée du Sud, mingi na bango (25%) bazalaki mikóló ya mbula 65 to koleka. Bato mosusu ya mayele bamoni ete yango ezalaki mpo bato bazali kokipe mibange lisusu te ndenge ezalaki liboso to mpo na kozanga mbongo. Mibange mingi (50%) ya ekólo yango bazali babola. Mwa ndambo ya bato ya Corée du Sud bamoni sikoyo ete bana basengeli kokipaka baboti na bango oyo bakómi mibange.

OYO BIBLIA ELOBI: “Kumisá tata na yo mpe mama na yo.”​—Baefese 6:2.