OKOKI KOLONGA MPASI YA KOBUNGISA MOTO NA LIWA
Lisalisi oyo eleki malamu mpo na baoyo babungisi moto na liwa
NA BAMBULA OYO, BATO MINGI YA MAYELE BAZALI KOYEKOLA MPASI YA KOBUNGISA NDEKO TO MONINGA NA LIWA. Kasi, ndenge tomoni yango, mbala mingi batoli eleki malamu oyo bato ya mayele bapesaka eyokanaka na bwanya oyo ezali na Biblia. Likambo yango emonisi polele ete batoli ya Biblia esilaka ngala te. Nzokande, Biblia esuki kaka te na kopesa batoli ya malamu. Ezali na mateya oyo tokoki kokuta epai mosusu te, oyo ekoki mpenza kosalisa moto oyo ndeko to moninga na ye akufi.
Ndeko to moninga na biso oyo akufi akei te na esika oyo azali konyokwama
Mosakoli 9:5 elobi: “Bakufi bayebi ata eloko moko te.” “Makanisi na [bango] ekufi.” (Nzembo 146:4) Yango wana, Biblia ekokanisi liwa na mpɔngi.—Yoane 11:11.
Kondima makasi epai ya Nzambe ekitisaka motema
Nzembo 34:15 elobi: “Miso ya Yehovaa ezali epai ya bayengebene, mpe matoi na ye ezali koyoka kolela na bango mpo na kosɛnga lisalisi.” Kobondela Nzambe mpo na koyebisa ye mpasi oyo tozali na yango na motema ezalaka kaka te mpo na kokitisa motema. Libondeli esalisaka mpe biso tókóma baninga ya Nzambe, oyo akoki kosalela nguya na ye mpo na kopesa biso makasi.
Avenire ya malamu mingi
Kanisá ntango bato oyo bazali na lilita bakozonga lisusu na bomoi awa na mabele! Biblia elobeli ntango yango na bisika mingi. Biblia elobeli ndenge oyo makambo ekozala awa na mabele na ntango wana; elobi ete Nzambe “akopangwisa mpisoli nyonso na miso na [biso], mpe liwa ekozala lisusu te, ná lilaka ná koganga ná mpasi ekozala lisusu mpe te.”—Emoniseli 21:3, 4.
Bato mingi oyo bandimaka Yehova bazwaka makasi mingi oyo esalisaka bango mpe epesaka bango elikya ya komona lisusu bandeko to baninga na bango oyo bakufá. Na ndakisa, Ann, oyo mobali na ye akufaki ntango azalaki na mbula 65, alobi boye: “Biblia epesaka ngai elikya ete bandeko na biso oyo bakufá bazali konyokwama te mpe Nzambe akosekwisa bato nyonso oyo, atako bakufá, abatelaka bango na makanisi na ye. Makanisi wana ezongelaka ngai mbala nyonso oyo nazali kokanisa molongani na ngai, mpe ezali kosalisa ngai na likambo oyo eleki mpasi oyo ekómelá ngai!”
Tina, oyo tolobelaki na masolo eleki, alobi boye: “Banda Timo akufá, namonaka mpenza ndenge Nzambe asalisaka ngai. Namonaka mpenza lobɔkɔ ya Nzambe na ntango ya mpasi. Nandimaka mpenza elikya ya lisekwa. Epesaka ngai makasi mpo nazonga nsima te tii mokolo nakomona lisusu Timo.”
Bato mingi oyo bandimelaka Biblia bakanisaka mpe bongo. Ata soki okanisaka ete makambo oyo Biblia elobi ekoki kosalema te, zwá ata mwa ntango mpo na kotalela makambo oyo ezali kondimisa ete batoli na yango mpe makambo oyo elaki ezali ya solo. Mbala mosusu okomona ete Biblia epesi lisalisi oyo eleki malamu mpo na bato oyo babungisi moto na liwa.
TÁNGÁ MAKAMBO MOSUSU ETALI ELIKYA MPO NA BATO OYO BAKUFÁ
Talá bavideo oyo elobeli likambo yango na site Internet na biso, jw.org
Biblia elobi ete mokolo mosusu tokoyamba bandeko mpe baninga na biso oyo bakufá
MOTO AKÓMAKA NDENGE NINI SOKI AKUFI?
Tokendaka wapi soki tokufi? Biblia epesi eyano oyo ezali mpenza kokitisa motema
OKOLINGA KOYOKA NSANGO MALAMU?
Lokola tozali se koyoka bansango ya mabe, epai wapi tokoki kozwa nsango ya malamu?
Fungolá esika bakomi MATEYA YA BIBLIA > KIMYA MPE ESENGO
a Yehova ezali nkombo ya Nzambe na Biblia.