3. Mpo na nini bato malamu bamonaka mpasi?
Ntina ya koyeba yango
Mpo na koloba solo, ezali sembo te komona ndenge bato malamu bazali komona mpasi. Bato mosusu bamonaka ete ezali na ntina te kozala moto malamu soki okomona kaka mpasi.
Kanisá naino
Bato mosusu bakanisaka ete moto akufaka mpe abotamaka mbala na mbala. Balobaka ete bato oyo basalaki makambo ya malamu, babotamaka lisusu na bomoi ya malamu. Kasi, bato oyo basalaki makambo ya mabe, babotamaka na bomoi oyo ekozala mpasi na mpasi. Mpo na bato yango, moto malamu akoki komona mpasi soki asalaki makambo ya mabe na bomoi na ye oyo eleká. Kasi . . .
Mpo na nini moto oyo abotami lisusu mpe abosani bomoi na ye oyo eleká, asengeli komona mpasi?
Ezali na ntina tóbatela sante mpe tókima makama, soki maladi mpe makama ekokómela biso kaka mpo na makambo ya mabe tosalá na bomoi oyo eleká?
MPO NA KOYEBA MAKAMBO MOSUSU
Talá video Mpo na nini Nzambe atiki nzela na bampasi? ezali na jw.org.
Oyo Biblia elobi
Bampasi ezali etumbu ya Nzambe te.
Kasi, bampasi mingi eyaka na mbalakaka mpo mbala mingi eyelaka moto mpo azalaki na esika mpe na ngonga oyo likambo ya mabe esalemaki.
“Ezali te bato ya mbangu mingi nde balongaka na momekano ya kopota mbangu, to bato ya nguya nde balongaka na etumba, ezali mpe te bato ya bwanya nde bazwaka bilei, ezali mpe te bato ya mayele nde bazwaka bomɛngo, mpe ezali kutu te bato oyo bazali na boyebi nde bandimamaka; mpamba te ntango ná makambo oyo ekanami te ekwelaka bango nyonso.”—MOSAKOLI 9:11.
Tomonaka mpasi mpe mpo tozali bato ya masumu.
Mbala mingi bato bakanisaka ete lisumu ezali makambo mabe oyo moto asalaka. Kasi, Biblia elobelaka mpe lisumu mpo na komonisa lisumu oyo eutá epai ya Adama, oyo bato nyonso, ezala bato malamu to bato mabe, babotamaka na yango.
“Na libunga nabotamaki na kati ya mpasi, mpe na lisumu mama na ngai azwaki zemi na ngai.”—NZEMBO 51:5.
Lisumu ya Adama ebebisá bomoi ya bato.
Ebebisá boyokani na biso na Nzambe mpe na bikelamu mosusu ya Nzambe. Yango wana, bato nyonso bakutanaka na bampasi.
“Ntango nalingi kosala oyo ezali malamu, oyo ezali mabe nde ezali epai na ngai.” —BAROMA 7:21.
“Biloko nyonso oyo ezalisamá ezali se kokimela elongo mpe konyokwama elongo.”—BAROMA 8:22.